15
Be apostol no bexa nchansu be xmen Jesús mzhealbe Jerusalén
1 Weꞌe leꞌa pla men utoꞌo Judea ulayaꞌ Antioquía wa, cha usaxan nluu xa be xmen Jesús sa wa, ndab bexa ndoꞌ bexa naꞌanpa xa judio, leꞌa tal leꞌa be xabgiꞌi lá yoo beꞌe lak ndab ley ten Moisés, leꞌa Dios naꞌanpa koꞌo bexa ndoꞌ be ke ten bexa. 2 Leꞌa Pabl no Bernabé uzheꞌeb uteyotoꞌono bexa li nluꞌu ta wa. Ta weꞌe leꞌa be xmen Jesús ndencho sa wa cha mbidiꞌizh yaꞌ Pabl no Bernabé no stapla bexa gast Jerusalén, ndontsa gudiꞌizhno bexa be apostol no bexa nchansu be xmen Jesús sa wa, ná xteꞌe nak ta wa. 3 Leꞌa be xmen Jesús ncho gezh Antioquía cha mtuꞌub bexa wa. Leꞌa nes wa nchaꞌtid bexa sa nsaleaꞌ Fenicia no Samaria, cha mbidiꞌizh bexa ndoꞌ be xmen Jesús sa wa, ná xteꞌe no bexa naꞌanpa xa judio mbingea ladna Jesús. Cha uzheꞌeb mten ladna bexa na mbiꞌín ta wa.
4 Gor ulayaꞌ bexa Jerusalén, leꞌa be apostol nsea bexa nchansu no iteata be xmen Jesús wa utsin mbinno bexa. Leꞌa Pabl no be ltsaꞌa xa cha usaxan ndadiꞌizh xteꞌeta ndakno Dios bexa. 5 Ná leꞌa pla bexa fariseo na ndangea ladna Jesús ngwasoꞌ ndab:
—Leꞌa bexa naꞌanpa xa judio nsabndoꞌka yoo beꞌe be xabgiꞌi wa, no yankeaka bexa ley ten Dios, ta mkeꞌa Moisés.
6 Leꞌa be apostol no bexa nchansu be xmen Jesús wa cha mzhealbe, mbidiꞌizh bexa ná xteꞌe nsabndoꞌ gun bexa. 7 Ngol gor tant dub stub bexa ndeyadiꞌizhbe, leꞌa Pedr cha ngwasoꞌ ndab:
—Bego nak beuna xmen Jesús, leꞌa bego uniꞌíka leꞌa mas polta leꞌa Dios mti naꞌ gayadiꞌizh naꞌ diꞌizh wen ten Jesús ndoꞌ bexa naꞌanpa xa judio, ndontsa no bexa gungea ladna‑yá. 8 Leꞌa Dios, xa nchandoꞌ ladoꞌo beuna, msaꞌa Espíritu ten na ndoꞌ bexa wa lak msaꞌa xa‑yá ndoꞌ beuna, ta nluu leꞌa Dios no bexa wa nkweaꞌ ladna. 9 Leꞌa Dios parej mbinno bexa wa no beuna, mtsambiꞌi xa ladoꞌo bexa, geal leꞌa bexa ndangea ladna Jesús 10 Ná nat, ¿xtaꞌan nlad bega gun bega dub ta lá nsak ladna Dios zha? ¿Xtaꞌan nlad bega yankea bexa be ley ni be usan gox ten beuna ni leꞌa beuna lá ngun gan ngankea‑yá? 11 Leꞌa beuna ndi uniꞌíka leꞌa ta na nkweaꞌ ladna Jesús beuna, ta weꞌe uloꞌo Dios beuna ndoꞌ be ke ten beuna no liga bexa naꞌanpa xa judio.
12 Weꞌe leꞌa itea be men wa ndon xe ute. Cha mlaꞌach bexa ta ndadiꞌizh Bernabé no Pabl xteꞌe mbintiꞌin Dios bexa, mbin bexa sian be uyon ten Dios lat be men naꞌanpa xa judio. 13 Leꞌa gor na mtayadiꞌizh Bernabé no Pabl, leꞌa Jacob ukaꞌab ndab:
—Bego nak beuna xmen Jesús, blaꞌach bego ta gáp naꞌ ndee. 14 Leꞌa Simón Pedr baꞌ mbidiꞌizh xteꞌe utsin mbinno Dios bexa naꞌanpa xa judio lak gor ned, ndontsa no bexa gak xmen Dios. 15 Leꞌa ta wa nak lak ta mkeꞌa bexa mbidiꞌizh sakndoꞌ Dios tiemp polta, ndab Dios:
16 Leꞌa gal dub wizh leꞌa naꞌ ilengal,
cha usoꞌ naꞌ dub xa inibeꞌe lak unibeꞌe David.
Leꞌa ta unibeꞌe David wa cuent dub niꞌi gox ulate, ná leꞌa naꞌ ixiste‑yá,
yunchaꞌaw naꞌ‑yá lakka ngok‑a zha ned wa,
17 ndontsa iteata be men syoꞌo gan ukwaꞌan naꞌ,
bexa na mti naꞌ gak bexa xmen naꞌ.
18 Leꞌa naꞌ nak Dios Xa Nibeꞌe ndáp ta ndee ndoꞌ be men tiemp polkata.
19 Weꞌe no ndab Jacob:
—Ta weꞌe nsak naꞌ naꞌanpa kich ladna beuna bexa naꞌanpa bexa judio, bexa nlad gak xmen Dios. 20 Ndi utuꞌubtsa beuna dub git gab‑a naꞌantapa gaw bexa be xnab nsaꞌa be men ndoꞌ be dios gizhliyo, no naꞌanpa ugal bexa dub xa naꞌanpa xa ten xa, no lá gaw bexa be man lá utsiꞌi ten no ni ten lá gaw bexa. 21 Leꞌa bexa nsabndoꞌ li gun, leꞌa gast tiemp polta leꞌa kadga dub gezh nchoka men ndoꞌol ley mkeꞌa Moisés. Kadga wizh neꞌe bexa ndoꞌolga bexa ta wa len be niꞌi sa nzhealbe beuna bexa judio.
Be apostol mtuꞌub git ndoꞌ bexa naꞌanpa xa judio
22 Weꞌe leꞌa be apostol, no bexa nchansu be xmen Jesús, no iteata be xmen Jesús wa cha mbidiꞌizh utuꞌub bexa pla be xabgiꞌi yaꞌno Pabl no Bernabé gezh Antioquía. Mti bexa Judas xa no nsaleaꞌ Barsabás, no Silas, top xabgiꞌi nsak lat bexa wa. 23 Lndeꞌe ndab git goꞌo bexa Antioquía wa:
“Leꞌa besa nak be apostol no besa nchansu be xmen Jesús no iteata be xmen Jesús sa ndee, ntuꞌub besa git ndee ndoꞌ bego naꞌanpa xa judio no nak xmen Jesús wa, bego ncho Antioquía no Siria no Cilicia. 24 Leꞌa besa mbiꞌín leꞌa ncho be men utoꞌo lat besa, nluu bexa dub taꞌa ngochgek bega. Nibeꞌe bexa yoo beꞌe bega xabgiꞌi no yankea bega ley mkeꞌa Moisés. Ná leꞌa besa naꞌanpa leꞌa utuꞌub bexa uluu bexa ta wa. 25 Nat mbidiꞌizh besa ulaxoꞌob besa pla xabgiꞌi ncho lat besa ndee. Leꞌa bexa wa giꞌidno Pabl no Bernabé be ltsaꞌa beuna, 26 bexa ndun tiꞌin ten Jesucristo guniꞌi xteꞌe gunno be men bexa. 27 Ta weꞌe utuꞌub besa Judas no Silas, leꞌa bexa wa giꞌid yadiꞌizh masta xteꞌe nak ta mkeꞌa besa ndoꞌ git ndee. 28 Leꞌa Espíritu ten Dios mluu ndoꞌ besa lá gabta besa ni stub taꞌa mas gun bega, guntsa bega ta nsabndoꞌ ndee: 29 Lá gaw bega beꞌal ten man nsaꞌa bexa xnab ndoꞌ dios gizhliyo, no lá gaw bega ten no beꞌal ten be man lá utsiꞌi ten, no lá ugal bega stubga xa naꞌanpa xa ten bega. Tal leꞌa bega uxobgek ndoꞌ be ta ndee, leꞌa bega wen nak ndoꞌ Dios. Nzheal beuna stub wizh.”
30 Weꞌe leꞌa idap bexa na li mtuꞌub bexa wa nchaꞌbe Antioquía. Leꞌa gor ulayaꞌ bexa sa wa, cha mchealte bexa itea be xmen Jesús. Cha msaꞌa bexa git wa ndoꞌ bexa Antioquía wa. 31 Leꞌa be xmen Jesús wa cha mbiꞌil ta nkeaniꞌi ndoꞌ git wa, cha uzheꞌeb mten ladna bexa. 32 Leꞌa Judas no Silas nak xa ndadiꞌizh sakndoꞌ Dios, ta weꞌe kwen mbidiꞌizh bexa, mluꞌuzh bexa no mtenxeꞌa bexa be men Antioquía. 33 Leꞌa bexa wa dub ndeꞌep utencho sa wa. Weꞌe leꞌa gor na mkaꞌan bexa sa wa, leꞌa bexa gezh wa ndab leꞌa Dios gakno bexa nes nseaꞌ bexa. Cha nseaꞌbe bexa leꞌaka Jerusalén ndoꞌ bexa mtuꞌub bexa wa. 34 Ná leꞌa Silas ndi myaꞌan Antioquía. 35 Leꞌa Pabl no Bernabé no myaꞌan Antioquía no stapla bexa wa, nluu bexa diꞌizh ten Jesús no ndadiꞌizh bexa diꞌizh wen ten Jesús ndoꞌ be men.
Pabl mteltsaꞌa no Bernabé
36 Tsoꞌoma wa leꞌa Pabl ndab ndoꞌ Bernabé:
—Leꞌa beuna yaꞌinaꞌ be xmen Jesús ndencho itea be gezh sa na li ngwaꞌyadiꞌizh beuna diꞌizh ten Dios wa, ná xteꞌe nde bexa.
37 Leꞌa Bernabé nlad goꞌo bexa no Juan, xa noga nsaleaꞌ Marc. 38 Ná leꞌa Pabl nsak lá utsin nak goꞌo bexa xa, leꞌa xa wa mkaꞌan wats bexa Panfilia, cha naꞌantapa no xa ngakno bexa. 39 Leꞌa Pabl no Bernabé uteyotoꞌo, cha mteltsaꞌa bexa. Leꞌa Bernabé cha mbiꞌi Marc, cha uyoꞌo bexa len dub barco siꞌil nchaꞌa isla Chipre. 40 Leꞌa Pabl mtiga ndi Silas, cha nchaꞌbe bexa. Leꞌa bexa ndencho sa wa mlaꞌa bexa wa ndoꞌ yaꞌa Dios ulaꞌach bexa. 41 Weꞌe utid Pabl no Silas sa nsaleaꞌ Siria no Cilicia, mtenxeꞌa bexa be xmen Jesús kadga sa nzhealbe bexa sa wa.