3
Job e-iba-gwalulesadgi-isdar-sunmaknaid
1 Job na boniganba geg-itogusadgine, e-iba-gwalulesadgi isdar sunmakded. 2 Job weyob sogded:
3 “Ibiga an-iba-gwalulesad geg bergudibe.
Ibiga a-mutikidba soglenaigusdibe, ‘susugwa gwalulesye,’
a-mutikid nagussulina gadinad.
4 A-iba, negasichidga nagusana nuedinad.
Bab-Dummad, a-ibagi binsassulina gadinad,
a-ibagi negsichidbi nagusana nuedinad.
5 A-iba neg-gubyagwaledga nagusana gadinad,
a-iba mogir-sichidga nagusana nuedinad.
A-iba dad-ibeler-galegedyobi nagusana nuedinad.
6 A-neg-mutikidgi nega-gudureged nagusana gadinad.
A-iba, nii-gardamar-abargi-naidgi elilesunna,
a-iba, birgamar-ibagangi-naid elilesunna.
7 We-neg-mutikidgi geg dule gwalulegena gadinad.
We-neg-mutikidgi mer dule wergusunna.
8 Ibiga dule-ina-isgana-imakmaladi, we-iba-ukabsassurdibe.
Ibiga we-dulemar-ibdula-demarginedgi-gangued-nikamaladi, a-iba-ukabsassurdibe.
A-iba ukabsalesana, nuedinad.
9 Ibiga a-ibagi niisgwamar-bolego-noardaed nodibe,
ibiga a-ibagi dad-ibeler gasdibe,
dad-ibeler gassulina bur nuedin.
10 Ibiga a-mutikidbali an gwalulesdibe,
emide, bonigan-gunaid mag-dakega an-imaknaid.
11 ”Ibiga an sapidukugi-maigu, burgwissurdibe,
ibiga an gwalulenaigu, burgwissurdibe,
burgwisana bur nabirinad.
12 Ibiga an gwalulenaigu, an-abingasmardibe,
ibiga an gwalulesgua, an-onusmardibe.
13 An burgwisana, nue-imas an meremainad,
gwen itomaisulinad.
14 Reymar-gannar-neg-dummagan-sobmalad-burgwismalad-abargi an obunnomainad.
Dule-dummagan-gannar-negdummagan-sobmalad-burgwismalad-abargi, an gabmainad.
15 Ar dule-nuga-nikamalad or-ibed-gudigusmalad-abargi, na e-neg-dummagangi ena mani-urbisgusmalad-abargi,
an nue-imas meremainad.
16 Igi sikwi amba yoo aideged-iba-omoe burgwar-aidenonidae,
gwen-neg-daksasuli digleddae,
ayobi, ibiga an gussurdibe.
17 Ar dule-isganamar burgwenonikile, ase e-ibmar-isgana-imaked bergusiid.
Ar dule-gegus-gudimalad burwa-dulega gunonikile, ase obunnosiid.
18 Ar dule-galesgudimalad burgwenonikile, ase na obunnosiid.
Degine, we-dulemar dummad-e-wiodiid-ese-iseedi-goledi, asega bar itogosurmalad.
19 Ar dule-bulegana, degi, dule-belagwamaladi burwa-dulega gunonikile, bela na emarbi daklesiid, dule egi obined sulid.
Degine, dule-maiga-gudiidi burgwenonikile, geb na e-dummadgi ollorgusiid.
20 ”Bab-Dummad, ¿ar ibiga be dule-naibi-itodiid gwalulegega be imaksa?
¿Ar ibiga be dule-isdar-itodiid dula-gudiguega be imake?
21 Ar wemar burgwebigudidaenad, ar geg burgwesunnad.
Aisaar gwae burgwebigudidaenad, ibmar-nued-amidiiyobi, burgwed amididaenad.
22 Ar wemar yeer itosmalaled,
geb neg-urba-aidedele, weligwar itogoed.
23 Ar Bab-Dummad dulega igar-obured,
negsichigi aka-aka-gudidaeyobi, emar-imaked.
24 An-akiginnedi dii-aryomaiyobi gued,
bane-bane-masgullegedyobi, an naibid itodiid.
25 Aka bur bule an ibmar-dobgudiid anga nagunonikid,
ar an ibmargi-gwayediid anga daklenonikid.
26 Neg-bogidikid bar anga naisulid, nue bar an obunnodisulid.
Unnila surbinsa-itogedbi an dakedisunnad.”