ROMA-DULEMARSE GARDA-NARMAKLESAD
ROMANOS
GEBE-SOGLENAID
Garda-nug
Pablo we-garda gwenadgan-Romaʼgi-bukmaladga narmaksad. Epenne, Roma-neggwebur bela yarmar-ganigusad. Emi-ibagi, we-neggwebur, amba sii-inigwele, unnila Italia-e-nonoga gusiid. Judío-dulemar-Romaʼgi-mamaid, Pentecostés-Ibagi, Jerusalén-neggweburgi gebe Bab-Jesúsʼba nagusmalad. Wemala, Romaʼse gannar-nadmargu, mergudmalad.
Pablo, Judío-dule gued. Cilicia-yargi, Tarso-neggweburgi gwalulesad. Pablo Jerusalén-neggweburgi Gamalielʼse Moisés-Igar durdaksad. Pablo Jesúsʼba-nanaimalad-esgaryagi-metega, oburgwega, amar-baregindii gusad. Pablo deyob imakdii gusad, adi, Judíoʼmar mer e-dadgan-igar metemalagar. Pablo, iduardi Sauloʼye nuganad. Bab-Jesúsʼba-naigusad-sorbali, nug-gwagnonikid, Pabloʼye nuggunonikid. (Gusmalad 13:9) Pablo Judíoʼsurmaladse, Jesús-e-sapingan-bur-dummaganga gusad. Binsamardo, we-garda birga 56ʼgi narmakles-insaye.
Roma-Dulemarse-Garda-Narmaklesadgi weyob sunmaklenaid
Pablo amba Romaʼse geg-nae-gudiunni, Bab-Dummad-Burba-Isligwaledbali, Corintoʼgi-mai Roma-dulemarse garda narmaksad. Roma-dulemarga sogsad, dule Moisés-Igar-Mesisadba-nanaedgine gwen Bab-Dummad-asabin swilidik gusisurye. Judíoʼdibe, Judíoʼsurdibe, unnila Bab-Jesúsʼgi-bensulidba bela abonolesimarye. Jesús dulemarga-nakrusgi-burgwisad-ular, dulemar, isgussuliyob Bab-Dummad-asabin gunonidaed. Degisoggu, anmar ibmar-imakedgine abonolesisurdo.
We-gardagine, weyob ilemakar sunmaklenaid:
1. Gebe-sikwas-soglenaid (1:1-15).
2. Abonoleged-Igargi-odurdakleged: Bab-Jesúsʼgi-bensuliguedba dule-abonoleged (1:16–11:36).
2a. Dulemar bela isgusmaladbiid (1:16–3:20).
2b. Jesucristoʼba isgued osuloleged (3:21–5:21).
2c. Isguedgi ollorgued (6:1–8:39).
2d. Bab-Dummad, Israel-dulemargi ibmar-imaked (9:1–11:36).
3. Bab-Jesúsʼba-nanaimalad-e-damalad (12:1–15:13).
4. Napi-soglenaid (15:14–16:27).
Be itogua.
1. GEBE-SIKWAS-SOGLENAID
1
(1:1-15)
1 Ani an Pablo, Jesucristo-e-mai. Bab-Dummad anse gochad, Jesús-e-sapin-bur-dummadga-gumogaga, degine, Bab-Dummad na e-Gayaburba-Nuedgi-sunmakega, an-susbalid.
2 Ar Bab-Dummadi, we-Gayaburba-Nued, E-Garda-swilidikidgi e-gayaburba-barsogmaladba bato iduar sogsagusad. 3 We-Gayaburba-Nued na E-Machi ukoedgi sunmaked. We-dule, anmar-Dummad-Jesucristoʼd. Dulesiki, David-wagwad. 4 Bab-Dummad-Burba-Isligwaledsikdi, we-Jesucristo, Bab-Dummad-Machid. Ar Bab na e-ganguedgi Jesucristo-burgwar-mai gannar-odurgusadba mag daklenonikid, Jesucristoʼde, Bab-Machid.
5 Jesucristo, na e-nug-dummarba-nikadba anmargi-nued binsasad, degi, e-nuggi-barmilealidga anmar-imaksabalid. Adi, bela yar-baid-baidgi-dulemar-bukmalad Jesucristoʼgi bensuli gumalagar, degi, eba ibsamalagarba.
6 We-dulemar-abargi, Jesucristo bemarse gochamarmogad, adi, bemar egadga gumarmogagar. 7 Bemar, Roma-neggweburgi-bukmalad Bab-Dummadse-nue-sabguledimalad, degi, na egadga-guega bese-gochamalad, an bemarse garda narmaksiid:
Bab-Dummad-anmar-baba, degi, Dummad-Jesucristo, bemargi nued binsamarsun, degi, ulubgi-bogidikid-itogega bemar imakbarsun.
Pablo Roma-neggweburse ataknabied
8 Gebegine, an Jesucristo-nuggi, bemar-ulale, an-Bab-Dummadga an dog-nuedye sogdo. Ar bela we-napneg-naidgi be-Jesucristoʼgi-bensulidgi bemargi sunmakedbimalad. 9 Ar Bab-Dummadga an E-Gayaburba-Nued-E-Machigi-soglesadgi-sunmakdiidgi, an bela-bela gwage-ulubgi ega mailediid. A-Bab-Dummad nue an-wisid, an ese-goledgi an bemar-iedisulid. 10 An-Babse-goledgi an egisdiguad, ar Bab-sogedbalile, bitigi emisbinne an bemarse ataknaega anga igarmar nolloo imaksana gadinye.
11 An nue bemar-daknabied, adi, bemarga ibmar-burbar-nuedid ukegar. Adi abali, bemar gatik Jesús-igargi nasgumai guegar. 12 We-bur-an-sogedi, adi, anmar Jesúsʼgi-bensulid-emar-nikadba, na muchub-muchub ogannomalaga.
13 Gwenadgan, bemar wisgubi an abedo, ichesurgus an bemarse ataknaye sokardaenad, adi, an bemar-abargi Jesúsʼba-dulemar-nagued imakega, ar igi an dulemar-baigan-abargi imaksayob. Degi-inigwele, an bemarse ataknaegala, emi-ibadse an idu igar biir megisdaed. 14 Griego-dorganga, degi, Griego-dorgansulidga, dulemar-binsaed-ibeganga, degi, dulemar-binsaedsulidmarga, an bela Bab-Jesús-igargi sunmakergebed. 15 Degisoggu, a-ulale, andi bemar-Romaʼgi-bukmaladga bela-bela Bab-Dummad-Gayaburba-Nuedgi sunmakbied.
2. ABONOLEGED-IGARGI-ODURDAKLEGED: BAB-JESÚSʼGI-BENSULIGUEDBA DULE-ABONOLEGED
(1:16–11:36)
2a. Dulemar bela isgusmaladbiid
(1:16–3:20)
Bab-Gayaburba-Nued dule-abonogega gangued nikad
16 Ar Bab-Dummad-Gayaburba-Nuedgi gwen an bingesulid, ar Bab-Dummad-e-gangued gued. Adi, bela dulemar-Jesucristoʼgi-bensuli-gunonimalad abonogegar. Gebe Judíoʼmargala abonoleged-igar uklesad. Geb Judíoʼsurmaladga abonoleged-igar uklenonimogad. 17 Ar Bab-Dummad-Gayaburba-Nuedgi, Jesucristoʼgi-bengusulidba, Bab-Dummad-dulemar-innikisaed oyolesiid. We-Jesucristoʼgi-bengusulidi nasgumai-nasgumai gudoed. Ar igi Bab-Dummad-Gardagi narmakar-nai:
“Ar dule-gwage-swilidikiddi, Bab-Dummadgi-bensulidgi gudii guoed.”
Habacuc 2:4
Dule-isgudimalad Bab-Dummadse sabsur-odurdaklegoed
18 Bab-Dummad-e-urwedi nibneg-akale, dulemar-igar-inniki-imaksurmaladgi, degi, isguedgi-nanadimaladgi, oyolemaid. We-dulemar e-ibmar-isgana-imakedba, Bab-Dummad-igar-napiragwad odukudimalad. 19 Ar we-dulemar Bab-Dummad-maid-e-ibmar-sunna-wisguleged bela wismalad. Ar Bab-Dummad-sunnad ega bela magarosad. 20 Ar Bab-Dummad-e-ibmar-nikad-akudakleged, e-gangued-degisadeguad, degi, na e Bab-Dummadga-gued, napneg-nagusad-akar, na e-ibmar-obinnisadgine mag-dakle gunonikid. Degisoggu, geg dule-wargwensaale sogdo, an Bab-Dummad akudakye.
21 Ar dulemar-we-napneggi-bukmalad Bab-Dummad-wisgusmar-inigwele, degite, Bab-Dummad-nug gwen odummossurmalad. Degine, dog-nuedye ega gwen sogsasurmarbalid. Aka bur yogasaar ibmar-isgana-galagwensuli-imakedgi binsamalad. Degine, e-binsaed-isgusadbali, igar-nued-akudake gunonimarbarsunnad. 22 Dulemar-binsaed-nikamaladye na sogmar-inigwele, dulemar-binsaedsulidga gudmalad. 23 Degine, Bab-Dummad-gangued-yeerdakleged-nika-maid-geg-bergued-anar, e-bab-dummadga-imakega, nuchumar galagwensuli sobsamalad. Weyob-dakle nuchumar sobsamalad: Dulemar-baisursunna-berguedyob, nuumaryob, ibdula-unimaladyob, degine, ibmar-musgimakdimaladyob. We-nuchumar-nug odummosmalad.
24 A-ulale, Bab-Dummadi, dulemar na e-gwagegi-ibmar-isgana-imakbi-gudiid-imakega, imaksasunnad. Bab-Dummadi, dulemar-na-e-galagwensuli-binsadiid-imakega, imaksad. Abali, bingedsuli, na e-abagangi muchub-muchub dododmarsunnad.
25 Ar Bab-Dummad-e-igar-napiragwad-anar, bur gakan, igar-napiragwadga imakdemalad.
Ar Bab-Dummad-ibmar-obinnisad-e-nug-anar, aka bur ibmar-obinnilesad-nug odummodmalad, we-ibmarga mailedmalad. Ar Bab-Dummad-e-nugdi degisadegu odummoleged. Ar deyobdo.
26 Degisoggu, Bab-Dummadi, dulemar bingesuli galagwensuli-guega imaksasunnad. A-ulale, abar e-omegan bar macherganbo megbisulid, aka bur ome-baidbo megbied. Na omegan-omegan igar-maisulidba galagwensuli gudmalad.
27 Amba deyobmogad, machergan ome-ebogwa-na-abirgunagwar-nanaed metemarmogad. Aka bur machergan-baidbo galagwensuli gudmalad. Na bingedsuli machergan-machergan galagwensuli gudmalad. Emigindi, na e-galagwensuli-daedba sabsur-odurdakleged-amismalad, na e-sangi itonanaisunnad.
28 Deginbali, we-dulemar Bab-Dummad-amideeye bar binsasurmarsoggu, Bab-Dummad, we-dulemar na e-galagwensuli-binsaed-imakega imaksad, adi, ibmar-isgana-imakedsulid imakmalagar.
29 We-dulemar, we-ibmarmarbi imakdimalad:
Igar-innikigwadba igar-imaksulid,
abirgunagwarsuli negsichigi nanaed,
bela ibmar-isgana-galagwensuli,
manibina surbinsa-itoged,
bela-galagwensuli-isgued.
Degine, nobedginbi binsaed,
dule-gindakmalad,
na abin-abin-imaked,
dule-yardaked,
bela ibmar-isganabi ibmakbied.
30 Deginbali, dulemar-dikarba-sunmaked,
emargi-gakansaar-sunmaked,
isdar Bab-Dummad-daked,
gadi aimargi-burgued,
na san-dummarba-imaked,
dule-gwen-eyobsurye-soged,
ibmar-isgana-imakega igar-amied,
babganba ibsasulid.
31 Deginbali, igar-napiragwad-itobisulid,
igar-maidgi-yoleged,
dule-baiganbo-igar-nabobisulid,
sabsur-dule-imaked,
dule-wiledaksulid.
32 Ar we-dulemar, Bab-Dummad na e-igar-innikigwad-mesisadgi-weyob-sogmaid, nue wismalad, ar dule-we-ibmar-isgana-imakmaladgala burgwed-igar maiye. Degi-inigwele, we-dulemar unnila ibmar-isganabi imakdisurmalad, yeer-dakdamarbalid, dulemar we-ibmar-isgana imakmalar.