103
Bab-Dummad-nug odummoleged
David we-namaked narmaksad.
1 Bab-Jehová-nug, an odummoged,
Bab-Jehová-nug-isligwaledi, bela an-ganguedbali an odummoged.
2 Bab-Jehová-nug, an odummoged.
Anga ibmar-nuegan-uksad an iegosulid.
3 Bab-Jehová, bela an-isgusad isgussuliyob daked.
Bela bonigangi an-nudaked,
4 burgwedgi an-ollorsaed.
Nue-an-sabed,
nue-wile an-daked,
5 Bab-Dummad bela ibmar-nueganbi anga uked,
sulubagi-gannar-ganguddaedyobi an-imaked.
6 Bab-Jehová, igar-innikigwad-imakedid,
dule-baidse-wiledimaladbina urwedid.
7 Moisésʼga e-igarmar oyosad,
Israel-dulemarga e-ibmar-imaksad oyosad.
8 Bab-Jehová dule-wiledakedid, dule-nuedid,
irgwensuli urwesulid, e-sabguedi dummarbad.
9 Degisadegu urwemai guosulid.
Dule-egi-nosale, degisadegu ebinsabalosulid.
10 Bab-Jehová anmar-isguedba anmar-sabsur-odurdaksulid,
anmar-ibmar-isgana-imakedba anmar-sabsur-odurdaksulid.
11 Ar igi mogir napneggi matusur-nai,
debayobi, e-sabgued dulemar-e-nug-odummodimaladgi dummarba nikad.
12 Ar igi dad-ibeler-nakwed, dad-ibeler-argwanedgi dikasur nai,
debayobi, anmar-isgued anmargi obachad.
13 Ar igi bab na e-mimmigan sabe,
debayobi, Bab-Jehová na dulemar-e-nug-odummodidimaladi sabgued.
14 Ar Bab-Jehová anmar-wisid, anmar ibu gue.
Nue wisid, anmardi unnila napa gued.
15 Dule-dula-gudiguedi gaganyob gued, yog-berguar naddaed.
E-ibagan, dutu-achutedaedyob gued.
16 Ar burwa gornaisale, dutu yoga babatiar naddaed,
e-nagusad bar dakledasulid.
17 Ar Bab-Jehová-e-sabgueddi, degisadeguad.
E-nug-odummodimaladgardi, e-sabgued-oyoged berguosulid.
Wemar-e-wagangardi, Bab-Dummad-e-igar-innikigwad degisadeguad.
18 Ebo-Igar-Mesisadba-nanadimaladga,
e-Igar-Islidikid-Mesisad-ebinsadimaladga,
eba-ibmar-imakdimaladga,
Bab-Dummad-e-Igar-innikigwad degisadeguad.
19 Bab-Jehová e-ologan nibneggi sisad.
Bab-Jehová bela neg-dirbir-naidgi dummadga negdakmaid.
20 Bemar, Bab-Dummad-e-baliwiturmar-dule-bulegan,
bemar, Bab-Dummad-sogedba-ibmar-imakmaladi,
bemar, e-igar-uksadba-nanadimaladi,
Bab-Jehová-nug odummomar.
21 Bemar, bela e-sordamar,
ega-arbamalad,
e-sogedba-ibmar-imakmalad,
Bab-Jehová-nug odummomala.
22 Bemar, bela ibmar-obinnilesmaladi, bela dummadga-negdakmaidgi,
Bab-Jehová-nug odummomala.
Bab-Jehová-nug an odummoged.