14
Lola urum gadi naman Yesus taxalax xasi sam taxasoubx.
1 Nal wanxabe, lola urum ido kanin ido mul lilxo laham dadxo. Mul ne ido donyam, Pasova. Mul be ido donyam ne, Bred Yis Xujalxo Ne Ido Ge.* Mul lilxo ne Ju indo amsax Isip se soubxo ne udasi mul ne yisoubxo. Andug Isip se ker mbourbe xoub pidaxabarxo ne Xotei ido sombun indo xelag mulumx kiyangnjaxaman. Sisne Xotei andug ser xensi minjax munrulxo nenxa hamegya Bred Yis Xujalxo ido Ge ne dide yisoubxo. Sam ne Kisim Bek 12 xabe six. Sisne lola urum gadi naman xo manam ido xele sumax andug yobu Yesus tindengsi taxalax nenxasi sam taxas soubxo. 2 Andug mendoubxo, “Ju indo mul xiliyai be maglib nenx yaxjal, sina sumaxangglixjax xuber ting daxabarxo.”
3 Yesus Betanis sisne suma Saimon nomi hogar gemba dili xo sisoubxo. Ne urum maglib baxalub nenx njanasi silxo. Silane xanggli be dumagen nggiling koraxo, ne goreng nad ana koraxo ne hwapin bugbex ido ne pes lelxo. Sisne adu nggiling xobrox disne Yesus gadib xuruxlox.
4 Suma dagi jagar soubx ne ironjulane indo indo sis mendubxo, “Pinaxasi goreng ne alul yix, a? 5 Ne adu so ayox osine 300 silba moni yebra suma hunjax ne pex osine.”† Dumage silba ne kujex kujex donyam denariai, ne andug 300 denariai ne yar kujex kujex andug hoapin sux pesxa. Sisne andug ironjul adu ngeser youbxo.
6 Yesus mendelxo, “Adu uduba. Pinaxasi nyingga adu kulig huyix, a? Adu sa mangau milalai yibix. 7 Yebra suma nal kere nyingga jagar saxabarxo, ne nal xa xo udud tingane toromyax. Nedine sa nal keredin nyingga jagar saxman. 8 Adu mangau xa yax kere ne yix. Adu sa dodamug be goreng xurux yix ne, bunge hajo sub kulax ne gerei yix. 9 Sa nyingga xabu munggrixam, miyanghanggu kumog wa so xabex be, sam beli wa mendaxabarxo ne, pin xa xanggli wa yixo ne dide mendenane adu udyaxbarxo.”
10 Silane Judas Iskariot mos lola urum gadi naman sob desne Yesus xasi sosoloasi andug bargeb pidax munjurulxo. Judas Iskariot Yesus ido sox suma 12 maglib nenxabe silxo. 11 Andug sam ne xes pari beliyainjulane sam bail dis adu moni huyax mundubxo. Siybane Judas Yesus andug bargeb pidax xasi gaman dagi xedelasilxo.
Yesus ido sox suma jagar bitong pin heubxo.
12 Bred Yis Xujalxo Ne Ido Ge he nal kuluilox, ne indo mangau ne soxna sipsip ulum pen nal Pasova ne udna atra xayaxbarxo. Yesus sox suma nedana adu inar youbxo, “Nyi so xabe dodombis ne gan mon Pasova ne ido heax pinhalel ne gereiyaxamun?”
13 Adu ido sox suma lilxo ne sonjis munjurulxo, “Siti maglib minjax silane suma be yag wob kubai na len nyisax tordinggedxo. Ne nyisxa adu soxyax. 14 Adu urum xa maglib mo xandenane, urum ne ido alabi nyisxan mundax, ‘Inggreng Suman inarayox, “Sa hajo talu magli ne xabex be six, ne sa hajo sox suma jagar Pasova ido pin ne heaxamun?” ’ 15 Adun talu magli urum biling lilxo bugbe ne usernggedxo, ne pin heax so xo njan sox gerei xuraxo. Nenxa hago pinhalel nenx gereiyax.”
16 Sisne ido sox suma lilxo ne siti maglib mosne pin xa Yesus idoi munjurulx ne xox yolxo. Silane asuxa Pasova ido pinhalel ne nenxa gerei youlxo.
17 Bula alane, Yesus ido sox suma 12 ne jagar nenx deubxo. 18 Andug baxalub nenxabe njanjanasi pin he sabane, adu mendelxo, “Sa nyingga xabu munggrixam, nyingga maglib nenxa suma ben sa xasi sosolo pidedxo, ne adu sa jagar pin hesx.”
19 Siylane andug pari ganjulxo. Sisne kujex kujex andug adu mundubxo, “Xabu, sa jal, e?”
20 Adu munjurulxo, “Ne be 12 sox suma maglib nenx, ne ye sa jagar bred tuberbe kundung dixo ned. 21 Suma ido Ngidibi udinggedxo, ne ido sam sis adu xasi inggrengxo. Nedine suma ye adu Suma ido Ngidibi xasi sosolo pidedxo ne xurang xiliyai padxo! Adu anyibin perjal osine, ne ido beli.”
22 Andug pin he sabane Yesus bred be pes Xotei kai huyisne gobudulxo sis ido sox suma ne hunjisne munjurulxo, “Wa pab, wa hajo dodamug ido siga.”
23 Sisne adu wain gamba pes Xotei kai huyis andug hunjulane andug kumogx heubxo.
24 Adu sis munjurulxo, “Wa hajo ker ne asa sam ido siga, ne suma lambei xasi xurux yixam. 25 Sa nyingga xabu munggrixam. Sa bili wain heaxaman ne bunge nal nenx Xotei ido kingdom wain kexei hedxm.”
26 Sisne andug mundi xuradisne habrexbe des Olib Gabrab xoubxo.
Yesus Pita mundulxo, “Mondong nyi sa donyam xaxalangadxm.”
27 Yesus munjurulxo, “Nyingga kumogx udibin jarui yaxabarxo. Ne ido inggreng sux:
‘San sipsip xumar suma taxan medudane
sipsip jaruina didedidei yaxabarxo.’‡ Sekaraia 13:7 xabe sis inggrengalox.
28 Nedine sa aib tinganane bunge sa nomi ana Galilix minjedxm.”
29 Pita babdulxo, “Sina suma kumogx ganjang kulaxabarxo, nedine sa xujalxo.”
30 Yesus mendelxo, “Sa nyi xabu mumbrixam. Hameg, kolu wanxa, muru sam lilx dijal simane nyi inoi sa donyam xaxalang xalubi dudxm.”
31 Nedine Pita danggaasi mundulxo, “Sina sa nyi jagar miyadxm, nedine sa nyi donyam xaxalang ayaxman.” Silane sox suma kumogx sam kujexya nei mendubxo.
Yesus Getsemani ido gein so
32 Andug so donyam Getsemani mendesxa ne minjubxo, sisne Yesus ana ido sox suma ne munjurulxo, “Wanx njanasi sibane sa mos geinada.” 33 Adu Pita, Jems ne Jon gagrenjisne adu jagar minjubxo, sisne adu nomi pari xurang alulsine pari tunggul lox. 34 Adu sis andug munjurulxo, “Hajo xunun pari xurang ana kabudixo ne adu me bil xabe six. Wanx sis xox asax.”
35 Adu kambuix mosne, adu miyanghanggub kol tomblongsine geinalox, ne kereadox ne, nal ne adu yeluidox. 36 Adu mendelxo, “Aba,§ Aba ne sam kulu ne ala. Aramaik indo sam “Abba”. Ala, pinhalel kumogx ne nyin yax kere. Nyi kulig wa xendeiyu. Nedine nyi sa udud wa soxyaxjal, nyi ino udud ne soxyax.”
37 Sisne adu aib mox ido sox suma ne tordunjulx ne andug wiwil asoubxo. Adu Pita mundulxo, “Saimon, nyi wilamonx six e? Nyi xawa kujex xox asax kerejal e? 38 Nyi xoxasi geinasi sax, siymane nyi toum xabe ganjang kulaxaman. Ino xunun adu dodoisix nedine ino dodamug adu xuling ayox six.”
39 Bili adu mosne gein kulu kujex nei yulx. 40 Andug nyam kumbom alulnjulxo. Sisne adu aib puluasi lesne adu bili xoxnjulx ne andug wiwil ana soubxo. Andug adu pinxax mundax ne lolol ayubxo.
41 Adu bili le xalubi disne, adu andug munjurulxo, “Nyingga xarpidiberxo wiwilaborx six e? Ne kere! Xawa ne le xuradixo. Xoxba, Suma ido Ngidibi suma ben sosolo xasi une suma bargeb pidixu. 42 Tinggring aba! Ga minjax! Suma sax xasi sosolo ayox ne le xuradixo!”
Judas Yesus kumal suma bargeb pidelxo.
43 Adu sam asilane Judas lelxo. Judas ne ido sox suma 12 maglib silxo. Suma xunggur singger xili ilong xo loblobx pesne adu xasi leubxo, ne lola urum gadi naman xo manam sam ido xele suma xo Ju indo gadin kinggalnjubxo.
44 Sisne sosolo suma adu Yesus xasi andug jagar siga be gereisi youbxo, “Sa mui yixam ne suma nedi, tindengsi pes xumarsi minjax.”* Nal nenx, Ju indo mangau ne yis kunyan kulu muyilox. 45 Judas Yesus sib ndengndengx mosne mundulxo, “Inggreng Suma!” Sisne muilox. 46 Suma Yesus barsine tindeng youbxo. 47 Siybane dagi kulubx tinggringasubx ne be singger pesne lola urum gadi naman xiliyai ido kinggal suma be damoib xanjangalox.† Jon 18:10 ne wasayax, suma singger palxo ne Pita.
48 Yesus mendelxo, “Nyingga singger xili ilong xo loblobx pes sa barbax lexa, ne nyingga uber suma ko yuwem suma be tindengya, e? 49 Nal kumogx sa nyingga jagar lola urum xoub sam beli munggrisoumxo, nedine nal nenx nyingga sa tindengbijal. Nedine mangau ne damane Xotei ido sam pidixu ne xabu ayaxasi.” 50 Sisne sox suma kumogx adu udisne jarui youbxo.
51-52 Xelagu adu pin be hogjal, nedine adu bugax xapox ilong tagsine Yesus soxsilxo. Nal nenx andug adu barbane adu ido bugax udisne bisonggumx baxeingalox.
Yesus Ju indo gadi naman nyambe tingdoubxo.
53 Andug Yesus pes lola urum gadi naman xiliyai ido urumbe minjubxo, siybane lola urum gadi naman xo Ju indo gadi xo manam sam ido xele suma kumogx des tumbang ayoubxo. 54 Pita adu weyexya pala soxsi mosne Ju indo bojou gadi xiliyai ido urum xoub ndengndeng minjelxo. Nenx adu xajax suma jagar njanasine adu balax xol silxo.
55 Lola urum gadi naman ne Sanhedrin kumogx‡ Sanhedrin ne adu Ju gadi indo kaunsel. andug Yesus agub aju be xoxsine andug adu taxas medax xasi, nedine andug aju be tordijal. 56 Suma lambeiyai jager sam adu xasi mendubxo, nedine indo sam mendubx ne kulu didedidei.
57 Sis dagi tinggring sine jager sam adu sis mundubxo, 58 “Ga xeunx ne adu sis mendelxo, ‘Sana suman koraxo lola urum wa alulnane nal xalubi maglib lola urum be koraxadxm ne suman korayaxabar.’ ” 59 Siyoubx nedine indo sam ne kulu didedidei.
60 Siylane Ju indo bojou gadi xiliyai andug parib tingasine Yesus inarlox, “Nyi sam be mendaxaman e? Sam wa xa suma sixa wad ana nyi kinyombis mendesxa e?” 61 Nedine Yesus tenenem ana silxo ne ongnjis sam be munjrijal.
Bili Ju indo bojou gadi xiliyai ana adu inarlox, “Nyi Kristus,§ Donyam Kristus ne sux, Xotei ana suma be maraxo ne une suma kumog gagrenjis paxasi. Kristus ne Hibru mendesxa Mesaia. Suma Xiliyai ga ud sixamun nenx ido Ngidibi e?”
62 Yesus mendelxo, “Ne Sa. Ne nyingga xoxyaxbarxo Suma ido Ngidibi Xiliyai Bail Dili bargeb belix sab njan ana Hevenbe xarom maglib sam yoglodxo.”
63 Ju indo bojou gadi xiliyai ido xo hog silxo xo ne bubrax dulxo. Adu mendelxo, “Adu sam ne idoi mendex iwad. Ga suma be adu xabe aju xedelayax bili paxman. 64 Nyingga xeberx nedi adu Xotei asreisine awauyixo. Nyingga ud ai sixa?”
Kumogx mendubx adu ugel yixo, nenxa adu miyamin. 65 Sisne dagi nomi kuluisi adu meselsine nyamge nding huyubx, sis bar gonggulu dis taxas ne mundubx, “Nyi Xotei ido mob suma ido sam be mende!” Sisne xajax suman adu pes ne taxalubx.
Pita Yesus donyam xaxalangalox.
66 Pita urum xoub miyangx be nenx silxo. Silane lola urum gadi naman xiliyai ido kinggal xanggli be lelxo. 67 Adu Pita balax xol silxo sisne adu andosomx kulubx mos xox gereilox.
Xanggli ne sis mendelxo, “Nyi dide Yesus Nasaret suma ne jagar soumx.”
68 Nedine adu xaxalangasi sis mendelxo, “Sa lol sixam. Nyi sam xa mendexam ne sa xelejal.” Sisne habrexbe mbour kulub minjelxo.
69 Kinggal xanggli ne bili xox lox ne adu nenx silxo. Silane adu bili dagi tinggring asoubx ne munjurulxo, “Suma wa dide indo be.” 70 Adu bili xaxalang alox.
Kambuix sisi palai sine, dagi kulubx tinggring asubx ned Pita mundubx, “Nyi Galili suma, sisne xabu toto nyi indo suma be.”
71 Adu kuluisi saya sam ne xoengasi sam mendelxo, sisne adu sam bail disne andug munjurulxo, “Suma wanx xasi sam asixane sa lol sixam.”
72 Gasanx muru xoeng lilx dulxo. Silane Pita Yesus ana sam xa mundulx ne udalox, “Muru xoeng lilx dijal simane nyi sa donyam xaxalang xalubi dudxm.” Siylane adu pari tunggulane songalox.
*14:1 Mul lilxo ne Ju indo amsax Isip se soubxo ne udasi mul ne yisoubxo. Andug Isip se ker mbourbe xoub pidaxabarxo ne Xotei ido sombun indo xelag mulumx kiyangnjaxaman. Sisne Xotei andug ser xensi minjax munrulxo nenxa hamegya Bred Yis Xujalxo ido Ge ne dide yisoubxo. Sam ne Kisim Bek 12 xabe six.
†14:5 Dumage silba ne kujex kujex donyam denariai, ne andug 300 denariai ne yar kujex kujex andug hoapin sux pesxa.
‡14:27 Sekaraia 13:7 xabe sis inggrengalox.
§14:36 Aba ne sam kulu ne ala. Aramaik indo sam “Abba”.
*14:44 Nal nenx, Ju indo mangau ne yis kunyan kulu muyilox.
†14:47 Jon 18:10 ne wasayax, suma singger palxo ne Pita.
‡14:55 Sanhedrin ne adu Ju gadi indo kaunsel.
§14:61 Donyam Kristus ne sux, Xotei ana suma be maraxo ne une suma kumog gagrenjis paxasi. Kristus ne Hibru mendesxa Mesaia.