18
Babilonia pueblo tukurishkamunda
1 Chi k'ipami kutin shuj ángel jawa pachamunda uriyamujta rikugani. Chi angelga pachun poderda chariga, shinaidi pai p'alanigushkan kai pachaga p'unllalladi tukuga. 2 Paimi jinchida kaparisha,
“¡Jatun Babilonia ñami tukurishka, ñami tukurishka!
Shina tukurikimi chi llaktaga
yanaguna kausana tuki laya milli ayaguna tiyana pushtu,
naidi mikuribuj mapa angagunaj
shinaidi millanaidi animalgunaj* 18.2 Maijin griego escribishkagunabiga <millanaidi animalgunaj> nishka illun. mitikuna ut'kumi tukushka.
3 Tuki llaktagunami vinoda ubiasha machuj shina
chi warmin wainayasha shingayashkaguna,
kai pachada jatun mandujkunashmi chi warmin wainayashkaguna,
shinaidi chi warmi pai yallimanaidi munushkada randishkamundami,
randisha k'atujkunash manchanaidi charij tukugaguna,”
niga.
4 Kutinmi jawa pachamunda shuj shimi:
“Ñukajkunalla,
pai juchagunada rurushkallabidi ama chagruringaj shinaidi
paida japina llakiguna kangunada ama japichun
chi jatun pueblomunda llujshichi.
5 Paigunaj juchagunaga ashtan ashtan mirarisha
tandanukusha jawa pachagama chayuki
na kungarishalla Diosbish na alli rurushkagunada yuyarishka.
6 Chi warmi shujkunamu kushka layaidi paimush kuichi;
ima rurushkamundash ishki kutin yallin kunguichi.
Pai shujkunamu ubiachingu chagrushka vazullabidi
paimungarin ishki kutin yallida ubiachichi.
7 Jatun tukushka gasha pai yallimanaidi munushkada rurusha
kushiyasha kausushka layaidimi
paidash manchanaidi llakichichi, wakachichi.
Paibuj shungubish, ‘Kaibimi jatun manduj shina tiyaguni.
Viuda warmi na ganichu.
Ima urash llakida na apushachu,’ nigunmi.
8 Shinushaga llakigunaga: wañish, wakish,
yarijish shuj p'unllallabimi paidaga japinga;
ninanbish rupachishkami ganga.
Paida juchachij Manduj Diosga tukida ruri pudij gashami
shina ruranga,” nijtami uyugani.
9 Chi warmida rupachishka kushnida rikushaga paiyun wainayasha munushkaida rurusha kausuj kai pachada jatun mandujkunaga manchanai llakirishami wakangaguna. 10 Shina llakichishkamunda mancharishami karullabi sakirisha,
“¡Ay, ay, jatun Babilonia pueblolla, yalli jinchi pueblolla!
Kanda llakichinaga kungushkadami chayamushka,”
ningagunami.
11 Shinaidi kai pachamunda randisha k'atusha purijkunash, paiguna k'atunagunada pish ña na randinashkamunda chi pueblomunda llakirishami wakungaguna. 12 Chi k'atunagunaga: kuri, kuchki, k'uilla rumiguna, perlaguna, k'uilla lino linsuguna, sedash, moradosh, shinaidi pukashmi gaga. Shinaidi tuki laya k'uilla ashnariguj kaspigunama; marfilgun rurushkagunama, k'uidi kaspigunanbish, broncenbish, jirrunbish, shinaidi marmolgunbish rurushkagunada; 13 canelada, shinaidi ashnariguj yuragunada, inciensoda, mirrada, k'uilla ashnariguj yakugunada, vinoda, aceiteda, ñutu kutada, trigodash, shinaidi aparij animalgunada, ovejagunada, caballogunada, carretagunada, shinaidi k'atungau randishka gentegunadashmi k'atusha purigaguna.
14 Chi pueblodaga, “¡Kambuj shungumunda manchanaidi munushka mishki mikunagunadaga ña na charinguichu. Kambuj k'uidij rikunai charishkagunada chingachishkamundaga kutinga ima urash na japinguichu!” ningagunami. 15 Tuki kaigunada chi pueblobi randisha k'atusha pachun charij tukujkuna paigunash llakichishka ganada manchusha llakin wakusha karubi shayarisha 16 kashna ningaguna:
“¡Ay, ay jatun pueblolla!
K'uilla linon, morado shinaidi puka linsun rurushka churanada churarishka,
shinaidi kurin, k'uilla rumigunan,
perlagunan alli parijarishkami gagangui.
17 ¡Shuj ratullabimi chi manchanaidi charishkaga tukurishka!”
Shinaidi jatun barcogunabi tukida mandujkunash, shuj pushtugunamu barcobi purijkunash, barcoda purichijkunash, jatun yaku kuchabi mashnalla trabajajkunashmi karubi shayarisha 18 chi pueblo rupashkamunda kushnida rikusha, “¿Maijin pueblodi kai jatun pueblo layaga gangari?” nisha kaparigaguna. 19 Shinaidi manchanai llakin wakusha paigunaj umabi yugzi achpan tallirishaga,
“¡Ay, ay jatun pueblolla!
Kan pachun charishkanmi yaku kuchabi barcoyujkunash charij tukugaguna.
¡Shina gashash shuj ratuwallabimi tukuchishtashka!
20 Chi puebloda tukuchishkamunda jawa pachabi kausujkunash
Diosbujlla gajkunash, Dios agllushkagunash,
Dios nishkada parlujkunash kushiyichi.
Kangunada llakichishkamundami Diosga paidash llakichishka.”
21 Shina nishka k'ipa imadash rurujlla ángel jatun kutana rumimada laya jatun yaku kuchabi markushtashami kashna niga:
“Jatun pueblo Babilonia kai rumida pigushtashka layaidimi shitushka ganga.
Shina rurukimi kutinga ña na rikungaguna.
22 Shinaidi kambuj ñangunabi arpama, lautama, buzinamada tukashkagunash shinaidi cantashkagunash kutinga ña na uyaringachu.
Tuki imallada rurusha trabajajkunash ña na tiyangachu.
Kambiga kutana rumi kutaguki wakushkash ña na uyaringachu.
23 Kambiga micha luzllash kutinga ña na p'alaningachu;
novio novia kushikusha cantashkash ña na uyaringachu.
Randisha k'atusha kambi kausujkunaga kai pachamundaga
manchanaidi charijkunami gaga.
Kanga brujushami tuki llaktabi kausujkunada pandachishkangui;
chimundami shina tukunga.”
24 Dios nishkada parlujkunaj, Diosbujlla gajkunaj shinaidi mashnalla kai pachabi wañuchishkagunaj yaurga chi pueblobimi gaga.