Pathien Lekhabu Inthieng Chongtung Thar MATTHEW 24

Jisua'n Biekin siet rang a misîrna

(Mk 13:1,2; Luk 21:5,6)

1 Hanchu, Jisua hah a jôka, Biekin renga a se lâiin Biekin min en rangin a ruoisingei a kôm an honga. 2 Ama han an kôm, “En roi, Adiktakin nangni ki ril, hitaka lung inkhat luo khom hih amuna om no nih; anrêngin paiin om riei an tih,” a tia.

Intakna le nuomlona

(Mk 13:3-13; Luk 21:7-19)

3 Hanchu, Jisua Oliv tângah ânsung lâiin, a ruoisingeiin a theiin an hong intongpuia. “Mi ril ta, hi ngei hih itika mo ai tung rang,” male “Nu juong nôkna rang le rammuol mongna rang minsinna hah imo ai ni rang,” tiin an rekela. 4 Jisua'n an kôm han, “Tutên nangni an huong loina rangin, indîn roi. 5 Mi tamtakin, ‘Messiah hah ki ni!’ tiin keima riming songin hong an ta, mi tamtak lei huong an tih. 6 Nin kôla indoina roi riet nin ta, ala takna indoina roi inthang la riet nin tih, nikhomrese, nin jâmminzal no roi. Ha neinunngei hah chu ahongtung ngêt rang ani, nikhomrese amongna chu lani no nih. 7 Nam le nam indoi an ta, ram le ram indoi an tih. Muntina mâitâm chul ata, ningnu innîk atih. 8 Ha ngei hah nâiha aphut chak ang hah ani. 9 Hanchu, dûk nangni min tuong rang le nangni that rangin nangni la sûr an tih. Keima sikin nam tinin nangni la mumâk an tih. 10 Ma tika chu mi tamtakin an taksônna la mâng an ta, lân sûr inlôm an ta, lân mumâk inlôm an tih. 11 Male, dêipu dikloi tamtak hong suok an ta, mi tamtak la huong an tih. 12 Hanchu, sietna ala pung rang sikin mi tamtak lungkhamna la dâi atih. 13 Nikhomrese, tutu among dêna diera tuong chu sanminringin om an tih. 14 Male, hi ‘Rêngram Thurchi Sa’ hih namtin rietna rangin rammuol pumpuia misîrin la om a ta; male, amongna hong tung atih.”

Intakna Ichiom tak

(Mk 13:14-23; Luk 21:20-24)

15 “Hanchu, ‘Intakna Ichiom Tak,’ dêipu Daniel ramanga lei misîr hah mûng nin ta, mun inthienga han inding a tih.” (Apore murdi'n aomtie riet rese ngei!) 16 “Male Judea rama om ngei hah tânga rot ngêt rese ngei. 17 Mi a inchunga om khom insûnga a neinun kaisuo rangin chum no rese. 18 Mi loia om khom a puon lâk rangin kîr no rese. 19 Ha ni han chu nâivongngei le nu nâite pomlâingei chung chu ântak bâk rang na! 20 Nin rot rang zora hah phalbia mo, sabbathni'n mo ani loina rangin Pathien kôm chubaitho roi. 21 Ha zora dûktongna ichiruoi inthang om rang ha chu rammuol insieng renga atûn tena la om ngâi maka, om nôk tet khâi no nih. 22 Nikhomsenla, Pathien'n ha sûn ngei hah a minbong zoi; ni no senla vang chu tute ringsuok thei noni ngei. A mi zenngei sikin Pathien'n ha sûn ngei hah minbong a tih.

23 “Male, tukhomin nin kôm, ‘En ta, Messiah chu hin a om!’ aninônchu ‘Soson a om!’ an ti khomin iem no roi. 24 Messiah rothol ngei le dêipu dikloi ngei an la suok rang ani; ha ngei han thei vang senla ngei chu Pathien zen mingei luo an huong theina rangin minsinna sininkhêl le sin kamâmruoi thông an tih. 25 Rangâi roi! Azora ahongtung mân nangni ki lei ril ani. 26 Aninônchu, nin kôm, ‘En ta, ramchâra aom!’ an ti khomin mahan se no roi; aninônchu hin ânthup an ti khomin iem no roi. 27 Miriem Nâipasal juong nôk rang chu kôlinleka dapdaptingei sak tieng renga thang tieng tenah ahonginlek anga han ani rang sikin.

28 “Kho munah khom saruok omna murdia sêlkuru khom intûp an tih.”

Miriem Nâipasal juong rang roi

(Mk 13:24-27; Luk 21:25-28)

29 “Ha intakna nikhuongei zoiin chu nisa jîng a ta, thâ vâr khâi nonih, invân renga ârsi ngei tâk a ta, invân sinthotheina ngei hah inphêthet'n om an tih. 30 Masuole chu Miriem Nâipasal minsinna hah invâna inlang ata; pilchunga mi murdi'n Miriem Nâipasal invâna sûm chunga sinthotheina le inlal taka juong an mu tikin chu chap an tih. 31 Bekul miring inring tak tum nîng ata, hanchu, a vântîrtonngei hah rammuol rikil minlia tîr a ta, kôlkung renga kangkhat tienga kôlkung dênin a mi zenngei mintûp atih.”

Theichang kunga minchuna

(Mk 13:28-31; Luk 21:25-28)

32 “Ha chongmintêk hah theichang kunga inchu roi. Amachang ahong ringa, ahong innoia, abuo ahong incherin chu kholum ahong nâi zoi tiin nin riet ngâi. 33 Ha angdênin, ma neinunngei murdi hah nin mu'n chu, a zora ahong nâi zoi, ânphut rang ani zoi ti riet roi. 34 Atûnlâia mingei hih an thi riei mân, hi ngei nâm hih tung let atih ti riettit roi. 35 Pilchung le invân boi a ta, ko chong chu boi no nih.”

Tutên anikhuo le a zora riet loi

(Mk 13:23-37; Luk 17:26-30,34-36)

36 “Hannirese, ha nikhuo le a zora ha chu Pa telloiin chu tutên riet mak ngei; Invâna vântîrtonngei khomin, Nâipasal khomin. 37 Miriem Nâipasal juong nôkna chu Noah damlâi angdên han nîng atih. 38 Tuilien mân, sûn ngeiah han chu Noah rukuonga a lût ni dênin an sâka an nêka, lômnu, lômpa an innei ngâia. 39 Tui ahongliena, an rêngin an inmang riei mâka chu imo ahongtung ite riet mak ngei. Miriem Nâipasal juong nôkna chu ha ang takah han nîng atih. 40 Ha tikin chu mi inik loia sin an ta inkhat tuongin om a ta, inkhat mâkin om a tih. 41 Nupang inik sasum kunga sângsukin om an ta, inkhat mâkin om a ta, Inkhat tuongin om a tih. 42 Masikin inning chien roi, itiknimo nin Pumapa a juong rang riet mak chei. 43 In pumapa'n inru hong rang zora hah riet senla chu, lei meng a ta, a neinunngei min muruk no nih, ti hih riet roi. 44 Masikin nangni khom intûng chienin om roi, nin tûng loi zora takin Miriem Nâipasal a juong rang sikin.”

Tîrlâm taksônom le taksônomloi

(Luk 12:41-48)

45 “Tîrlâm taksônom avâr tak, a pun a insûng cherêla, tîrlâm dangngei zora tina an sâk sem pe ranga ulien a minchang chu tumo nini? 46 A pu'n a honga, ha anga sin thoa tîrlâm a hong mu ha chu a râisân ani, 47 Adiktakin nangni ki ril, a pu han a neinun murdi chunga ajêkpu minchang a tih. 48 Hannirese, tîrlâm saloi anîn chu, a mulungin ‘Ku pu chu hong vak no nih’ tîng a ta, 49 a tîrlâm champuingei lei jêm a ta, ju inrûingei kâra lei nêkin lei sâk a tih. 50 Male, ha tîrlâm hah a tûng loi lâitak le a riet loi zora takin a pu hong suok pe atih. 51 A pu han ât nôinek a ta,* asarotholngei chang anga han minchang a tih, Mahan chap a ta, a hâ riel a tih.”

24:9 24:9: Mat 10:22

24:13 24:13: Mat 10:22

24:15 24:15: Dan 9:27; 11:31; 12:11

24:17 24:17-18: Luk 17:31

24:21 24:21: Dan 12:1; Chph 7:14

24:26 24:26-27: Luk 17:23-24

24:28 24:28: Luk 17:37

*24:51 24:51 ât nôinek a ta; aninônchu pêntieng vôrpai a tih.