Pathien Lekhabu Inthieng Chongtung Thar 1 Korinth 7

Inneina chungroia chongrekelngei

1 Atûn, nin chong miziek chungroi ngei hah mindonin.

Pasal rangin innei loi asa.* 2 Aniatachu, inditna tamtak aom ngâi sikin pasalin an theia dôngma dôn chit senla ngeia, nupang khomin an theia ruothar dôn chit rese ngei. 3 Pasalin a pasal nina sintum a dôngma kôm zoi senla, ma angdênin nupang khomin a pasal kôm a sintum zoi sa senla, an nângna nâma inmathâi inlôm rese ngei. 4 Nupangin ama takpum chunga han racham nei maka, a pasalin kêng a nei; ma angdênin pasal khomin ama takpum chunga racham nei maka, a dôngman kêng a nei ani. 5 Chubaitho ranga nin inpêk theina rang le nin inmunnôk theina rangin chomoltea rangin asa nin ti ruruoi nônchu nin rachamneina inchu no roi; aninônchu nin indînzoiloina sikin Soitan'n nangni huong i-nih.

6 Hi chong hih chongpêk angin misîr mu-unga, phalna chong angin vai ki misîr ani. 7 Adiktakin chu nin rêngin keima angin om ungla chu ku nuom ani; aniatachu, mitinin an chang rang chit manboipêk Pathien kôm renga an chang chita, inkhatin lam dang tieng, adangin lam dang tieng.

8 Atûn, inneiloi ngei le meithâingei rangin chu hi anghin ki ti, Keima angin intîmvielin om rang bôk tit ungla nin ta rangin sa uol atih. 9 Aniatachu, nin nângna han indîntheina nin dôn nônchu innei roi, hur nêkin chu innei asa uol.

10 Inneisai mingei ta rangin chong ke pêk, ma hih keima renga niloiin, Pumapa chongpêk ani: nupangin a pasal insenpui no rese; 11 aniatachu ân senpui lekhom pasal dang nei khâi no rese, nônchu a pasal le ngêt inluo nôk rese; male pasal khomin a dôngma mâk tet no rese.

12 Mi dangngei kôm chu ki ti (keiman, Pumapa niloiin): Khristien pasalin sonong dôngma a neiin chu a dôngma han a kôm om tit rangin a mulung achuk tatakin chu mâk tet no rese. 13 Male Khristien nupang khomin sonong ruothar a neiin chu a pasal han om kelen rangin a mulung achuk tatakin chu mâk no rese. 14 Iemloi pasal hah a dôngma jârin Pathien mitmua pomthei ani zoia, iemloi nupang khomin a Khristien pasal jârin Pathien mitmua pomthei ani sa zoi. Ma anghan nino senla chu, an nâingei hah inthieng noni ngei; aniatachu, Pathien mitmua pomthei ani zoi. 15 Nikhomrese, iemloi inkhat han insen a nuomin chu insen chien rese ngei, ma anga roi hah atokin chu iempu pasal mo, nupang mo, khit nimak ngei. Pathien chu inngêia om rangin nangni a koi ani. 16 Khristien dôngma na pasal na sanminring† thei rang le thei loi rang kho angin mo ni riet? Aninônchu khristien pasal, no dôngma na sanminring‡ thei rang le thei loi rang kho angin mo ni riet?

Pathien nangni koi anghan om roi

17 Tutu khom Pumapa'n manboipêk a pêk lam angtakin le Pathien'n a koi lam angtakin om rese. Hi balam hih koiindang tina ki ril ani. 18 Sertansai mi hah Pathien koina a pomin chu, a sertana sîn hah pai rang a bôk rang nikhâi mak; sertanloi mi khomin Pathien koina a pomin chu, ser a tan rang nikhâi mak. 19 Sertan le tanloi ite ni uol mak; Pathien chongpêkngei jôm hi kêng ani uol tak. 20 Tutu khom Pathien koina a pom lâia an om anghan omtit rese ngei. 21 Pathien'n nang a koi han suoka om mo ni ni? Asa, mindon no roh; hannirese, jôkna zora na manin chu mang roh.§ 22 Suok, Pumapa'n a koi chu Pumapa mojôk suok ania; ma angdên han suok niloi Khrista'n a koi khom hah Khrista suok ani. 23 Pathien'n mana nangni a rochôksai kêng; masikin mingei suokngei chang no roi. 24 Ka malngei, tukhom Pathien'n a koi lâia a omlam anghan Pathien leh inlopin omtit rese.

Inneiloingei le meithâingei chungroia chongrekelngei

25 Atûn, inneiloi mingei chungroia nin chong miziek hah mindonin: Pumapa renga chongpêk chu ite dôn mu-unga, aniatachu, Pumapa moroina sika mi iemom ki ni sikin ki mindon lam misîr ki tih.

26 Atûnlâi intakna mindonin mi a om lam angtaka a omtit rang hih sa uol le ki minhoi. 27 Dôngma mo no dôn zoi? Amanu renga jôkna rok no roh. Inneiloi mo na la ni? Dôngma rang rok no roh. 28 Hannirese lômnu no dôn khomin nunsie tho mak chea; inneiloi nupang khomin ruothar a dôn khomin nunsie tho mak. Aniatachu in nin neiin chu rammuola dûktong nin tih, maha nangni mojôk rang ku nuom ani.

29 Ka malngei, ki ti nuom tak chu mahi ani: Zora hih abong zoia, atûn renga chu dôngma dôn ngei hah a dônloi angin om senla ngeia; 30 achap ngei hah inngûiloi angin om senla ngeia; ânnui ngei hah râisân loi angin om senla ngeia; a rochôk ngei han dônloi angin om senla ngeia; 31 hi rammuola neinun sampâr ranga sinchuon tho ngei hah anrêngin luo loi angin om rese ngei. Hi rammuol hih, atûna anghin, aom sôt khâi loi rang ani sikin.

32 Mulungdûk dôn loi rangin nangni ku nuom ani. Ruotharte'n chu Pumapa râiminsân rang a bôk sikin Pumapa sin hah a mindon ngâi. 33 Aninâkchu pasal inneisai chu a dôngma râiminsân rang a bôk sikin rammuol neinun a mindon ngâia; 34 masikin kângnikin kaiphirînin a om ngâi ani. Nupang inneiloi, aninônchu dôngmate inthieng chu a taksa le a ratha inpêkphar rang a nuom sikin Pumapa sin hah a mindon ngâia; hanchu inneisai nupangin chu a ruothar râiminsân rang a nuom sikin rammuol neinun a mindon ngâi.

35 Nangni san rang ku nuom sika mahi nangni ki tipe ani. Nin chunga balam inngar nangni khang pe rang bôk mu-ung. Manêkin, neinun adik le asa nin sin theina rang le Pumapa sinthona han ite manar tet loiin nin inpêk let theina rangin nangni ku nuom ani. 36 Dôngmate le ruotharte innei roi chu sûtminthel ani zoi, innei nôk khâi loi rang ti ngei chungroia chu: ruotharte hah dôngmate tienga han mirita omin ândînthei tet noa, innei anâng angin a rietin chu innei rese, a nuom angin,* mahan nunsie om mak. 37 Aniatachu, pasal hah dânderit ani noa, ha dôngmate hah innei† loi ranga mulungbôk det taka sinsiema, male a nuomlam a dier theipu han chu om rang chang a mulungrîla a mindon suo zoi, dôngmate‡ hah in a neipui loi sikin a tho min sa. 38 Masikin ruotharte inneipu§ han a tho min sa, aniatachu, inneiloipu* han a tho min sa uol.

39 Nupang inneisai hah a pasal ringsûngin chu a pasal han khit ania; hannirese, a pasal a thîn chu, pasal dang a nuom tak in a nei pui thei, Khristien ani ngânin chu. 40 Aniatachu, a om ngâiin om senla, a râisân uol atih. Maha ki mindon lam ani, male kei khom Pathien Ratha chu ko dôn angin kên bê ani.

*7:1 7:1: Pasalin in a nei nônchu a tho min sa; aninônchu pasalin inneiloi rangin asa nin ti ngâi.

7:10 7:10-11: Mat 5:32; 19:9; Mk 10:11,12; Luk 16:18

†7:16 7:16: Na sanminring loi rang inmo ni riet minthâr thei; aninônchu Na sanminring rang ha inmo ni riet

‡7:16 7:16: Na sanminring loi hah inmo ni riet minthâr ranga; aninônchu Na sanminring rang hah inmo ni riet.

§7:21 7:21: aniatachu nangman jôkna rang zorânchum no dônin chu, mang roh; aninônchu hannirese jôkna rang zorânchum na manin chu, mang inla; manêk han suoka no om ha ne theidôr song rangin thang roh.

*7:36 7:36: ân bieksai abop a nuom anghan; aninônchu mi inkhat le a nâinupang inneiloi: A pa han amanu pasal rang ha amanu chunga han mirita omin ân dînthei loi angin a rietin chu, male amanu ha innei zora achukin chu, hanchu amapa han a nuomlam anghan tho senla male amanu ha in min neipui rese.

†7:37 7:37: innei loi rang; aninônchu a nâinupang in min neiloi rang.

‡7:37 7:37: dôngmate hah inneipui senla; aninônchu in min nei nirse.

§7:38 7:38: innei; aninônchu a nâinupang ha in min nei rese.

*7:38 7:38: innei ngâi mak; aninônchu amanu ha in min nei ngâi mak.