36
Lere ŋa lepeele paa puro
wi Yɛnŋɛlɛ yɛnrɛwɛ,
jaŋgo laa wi go singi
wi Yɛnŋɛlɛ yɛnrɛwɛ,
jaŋgo laa wi go singi
1 Yurukɔɔlɔ to wi sɛwɛ yurugo. Yawe Yɛnŋɛlɛ li tunmbyee Davidi wi Yɛnŋɛlɛ gbɔgɔyurugo.
2 Lepee wo ŋa wì yiri ma je Yɛnŋɛlɛ li na, wi maa sɛnrɛ nda yuun ti yɛn wa na nawa;
wi ma yo fɔ go woro ki na lere mbaa fyɛ Yɛnŋɛlɛ li yɛgɛ.
3 Katugu wi maa wi yɛɛ yaan ndɛɛ wi si woro,
ki kala na, wila yere wi kapege ki ni, mboo kapege ki panra.
4 Wi yɔn sɛnrɛ ti yɛn mbasinnde ma pye nambara ni;
mbaa kajɛŋgɛ piin ki yɛn go fu kala wi yɛgɛ na.
5 Mboo ta wa wi sinlɛyaraga ki na yembinɛ, kapege ko wi maa sɔnri mbe pye;
konɔ na li woro ma yɔn lo wi ma lɛ, wila yɛnlɛ mbe je kapege pyege ki na.
6 E, Yawe Yɛnŋɛlɛ, ma kagbaraga kì gbɔgɔ maga lɛ laga tara na fɔ wa yɛnŋɛlɛ na;
ma yɛn sɛnrɛ nuŋgba yofɔ fɔ sa gbɔn wa kambaara ti na.
7 Ma yɛn sinŋɛ yɛgɛ ŋga na, kì wɛ yanwira nda tì yagara ti ni fuun ti na;
kagala ŋgele mà kɔn mbe pye, ke yɛn ma jugo paa tɔnŋgbɔɔ tijuguwo pi yɛn.
Yawe Yɛnŋɛlɛ, mboro ma maa sɛnwee piile pe shoo, naa yanyaara konaa yaayoro ti ni.
8 Ee, Yawe Yɛnŋɛlɛ ma kagbaraga ki yɛn ma gbɔgɔ fɔ jɛŋgɛ!
Sɛnwee piile pe maa pe yɛɛ lara wa ma kanwira ti nɔgɔ.
9 Ma mɔɔ go yarijɛndɛ ti kan pe yeri fɔ ti ma pe yɛnlɛ tin;
ma maa ma kajɛŋgɛ ki piin pe kan paa lafogo tɔnmɔ ma kaa na fuun we.
10 Katugu yinwege pulugo ko yi mboro we,
ma yanwa po pi ma ti we maa yanwa pi yaan.
11 Mbele pɔ̀ɔn jɛn, ma koro maa ma kagbaraga ki piin pe kan,
mbele pe nawa pi yɛn ma sin pe na, ma koro sinŋɛ pe ni!
12 Mbele pe maa pe yɛɛ gbogo, maga ka ti pe gbɔn laga na na;
maga ka ti lepeele pe ya panla purɔ!
13 Lepeele poro wɛlɛ pe yɛn na tuun yɛɛn,
pè to, pe se ya yiri naa.