1 Mi yɛn lere ŋa jɔlɔgɔ gbɔn wi na,

Yawe Yɛnŋɛlɛ li naŋgbanwa pi kala na, lì jɔlɔgɔ wa na na.

2 Lìlan yɛgɛ sin ma kari na ni wa diwi wi ni;

lii kari na ni wa yanwa pi na.

3 Lìli kɛɛ ki yirige mi nuŋgba na,

nala gbɔɔn pilige pyew.

4 Lì ti mì cɔgɔ, fɔ a na witige sɛlɛgɛ kì tiletile;

lìlan kajeere ti kaari na ni.

5 Lì nandangawa naa jɔlɔgɔ ki tɛgɛ

mala maga paa mbogo yɛn.

6 Lìlan tɛgɛ wa diwi wi ni,

paa mbele pè ku maga lɛ wa fafafa pe yɛn.

7 Lì mbogo wa mala maga, jaŋgo mi ka ka ta mbe yiri;

lì tugurɔn yɔngɔwɔ le na na, mba pì nugu.

8 Mì gbele ŋgbanga, ma yeri na sagafɔ jaa,

ɛɛn fɔ lii na yɛnrɛwɛ pi logo.

9 Lìlan konɔ li tɔn sinndɛɛrɛ tugbɔɔrɔ nda pè tɛtɛ ta ni,

lìlan koŋgolo ke gbɔn ma ke piri.

10 Lì lara nala singi paa yɛgɛ ŋga na cɛngɛ urusi ki ma lara na singi we,

lì pye paa jara yɛn, ŋa wì lara na singi.

11 Lìlan wɔ wa na konɔ li ni, mala kɔɔnlɔ yuroyuroyuro paa cɛngɛ yɛn;

lìlan wa mala yaga na yɛ.

12 Lì li sandiga wanla li taga naga tile;

lìlan taanla mbanla wɔn.

13 Lìlan wɔn mala furugu

li sanŋgbɔ wangala ke ni fuun ke ni.

14 Mì pye titɛgɛrɛ yaraga na woolo pe ni fuun pe yeri;

pe yɛn nala mɛgɛ ki koo wa pe yuuro ti ni pilige pyew.

15 Lìlan nawa pi tanga na na yaanga taanga ni,

lìlan jatere wi piri na na fɔ nala yɛgɛ ki kanŋgi.

16 Lìlan yɔn ki kan wa yaanŋgumbire ti na mala ŋgangala ke kaari;

lìlan jan wa cɔnrɔ ti ni mala go ki sogo na na.

17 Màla wa lege mala laga lali yɛyinŋge ki ni,

yaraga ŋga pe maa yinri fɛrɛwɛ, mi si ko ka jɛn naa.

18 Ki kala na, mì yo fɔ: «Na goto wì jɔgɔ pew;

na jigi wi woro yaraga ko ka kpɛ na mbe yiri wa Yawe Yɛnŋɛlɛ li yeri.»

19 Na mi kaa sɔnri na jɔlɔgɔ naa na tege ki na,

ki ma pye na yeri paa yaritisorogo naa shɔnrɔ yɛn.

20 Mi yɛn na nawa tuun ki na suyi,

a kìlan wire ti gbo na na.

21 Ɛɛn fɔ kala na mi yɛn na sɔnri li na, loli na yɛɛn,

na jigi wi yɛn ŋga na, koyi ŋga yɛɛn fɔ:

22 Yawe Yɛnŋɛlɛ li kagbaraga pyege kii kɔ,

li yinriwɛ tawa pi fa gbɔn wa pi kɔsaga ki na.

23 Ti maa kanŋgi fɔnndɔ pinliwɛ nuŋgba nuŋgba pyew.

Li yɛn sɛnrɛ nuŋgba yofɔ yɛgɛ ŋga na, ki yɛn ma gbɔgɔ.

24 Mi yɛn naga yuun wa na nawa fɔ: «Yawe Yɛnŋɛlɛ lo li yɛn na tasaga ye;

ko kì ti na jigi wi yɛn li na.»

25 Lere ŋa kaa jigi wi taga Yawe Yɛnŋɛlɛ li na,

lere ŋa kaa li lagajaa,

li ma kajɛŋgɛ pye ko fɔ wo kan.

26 Mbe pyeri mbaa Yawe Yɛnŋɛlɛ li singi lɔɔn shɔ,

ki yɛn ma yɔn sɛnwee wi kan.

27 Mbe jɔlɔgɔ ki kun ma yɛɛ ni ma lefɔnrɔ sanga wi ni,

ki yɛn ma yɔn sɛnwee wi kan.

28 Na Yɛnŋɛlɛ li ka wamawelewe wa wi na,

ki daga wi cɛn wi yɛ wi pyeri.

29 Ki daga wi fɔli wuu yɔn ki kan wa taambugɔ ki ni,

kona wi mbe ya jigi tagasaga ta bere.

30 Ki daga wuu mbatelege ki jan wi felefɔ wi kan,

wigi yaga poo tifaga jɛŋgɛ.

31 Katugu Yawe Yɛnŋɛlɛ laa sɛnwee wi wa

fɔ sanga pyew.

32 Ɛɛn fɔ ali na li kɔɔn le jɔlɔgɔ, li maa yinriwɛ taa,

mbege ta li kagbaraga pyege ki yɛn ma gbɔgɔ we;

33 katugu ki woro li nandanwa kala mbe jɔlɔgɔ wa sɛnwee wi na,

ki woro li nandanwa kala mbe sɛnwee wi jɔlɔ.

34 Ɛɛn fɔ na ye kaa tara ti kasopiile pe ni fuun pe

tangala tɔɔrɔ ni la toro,

35 na yaga sɛnwee wi kaselege ki kanŋga mbe tɔn ki na,

Yɛnŋɛlɛ na yaara ti ni fuun ti go na li yɛgɛ sɔgɔwɔ,

36 na yaga lere wi kiti wi kɔn mboo kolo wa kiti kɔnsaga,

naga yɛn ma, Yawe Yɛnŋɛlɛ laa ki wogo ki yan wi le?

37 Ambɔ wi mbe ya para mbe ti kala la mbe pye,

na Yawe Yɛnŋɛlɛ lo ma lìgi kɔn maga tɛgɛ ma yo li pye?

38 Naga yɛn ma, Yɛnŋɛlɛ na yaara ti ni fuun ti go na, lo ma li maga yo

tipege nakoma kajɛŋgɛ ki mɛɛ pye wi le?

39 Yiŋgi na sɛnwee mboo ta yinwege na, wii je wila kɔngɔri?

Sɛnwee nuŋgba nuŋgba pyew wi daga mbe baga wi yɛɛ na wi kapere to kala na.

40 We we tangalɔmɔ pi sɛgɛsɛgɛ, we sɔnri pi na jɛŋgɛ,

we sɔngɔrɔ we pan Yawe Yɛnŋɛlɛ li kɔrɔgɔ.

41 Ye pan we we kɛyɛn yi yirige we wa wa Yɛnŋɛlɛ na wa naayeri li yeri,

weli yɛnri we kotogo ki ni fuun ki ni.

42 Woro wo na, wè kapere pye ma na, ma yiri ma je;

mboro fun, mɛɛ yɛnlɛ mbe we kala yaga.

43 Mɔ̀ɔ naŋgbanwa gbɔɔ pi lara, ma taga we na ma we purɔ;

mà we gbo mɛɛ we yinriwɛ ta.

44 Màa ma yɛɛ fo kambaaga ka ni,

jaŋgo we yɛnrɛwɛ piga ka gbɔn wa ma na.

45 Mà we pye paa kayangara nda pe ma pɛ ti yɛn,

paa yaraga laŋgɔgɔ wogo yɛn cɛngɛlɛ sanŋgala ke sɔgɔwɔ.

46 We juguye pe ni fuun pè pe yɔnrɔ ti yɛngɛ

na para we na.

47 Sunndo kɔngɔ konaa mbe to wetijugo ni to ti yɛn we woro,

tɔngɔwɔ naa jɔgɔwɔ pi ni, to ti yɛn we woro.

48 Na yɛntunwɔ pila fuun paa lafogo yɛn,

na woolo mbele pè tɔngɔ ki kala na.

49 Na yɛntunwɔ pi yɛn na tinri kɔnlɔ fu jatere piriwɛn pi kala na,

mi woro mbe gbelege ki yaga;

50 fɔ Yawe Yɛnŋɛlɛ mbeli ta wa naayeri,

li ka sa li yɛgɛ ki sogo li wele, ligi yan.

51 Ŋga kì gbɔn na ca sumborombiile pe na,

na mi kaga wele, ki maa na jɔlɔ wa na kotogo ki na.

52 Mbele pè pye na juguye go fu,

pe yɛn nala puro paa yɛgɛ ŋga na pe ma kaa na sannjɛlɛ puro we.

53 Pàa na wa wege ka ni naga jaa mbanla gbo,

pàa sinndɛlɛgɛ taga ki yɔn na maga tɔn na na.

54 Tɔnmɔ pìla toro na go na.

A mì sho fɔ: «E, na wogo kì kɔ.»

55 A mì si koro wa wege ki nɔgɔna,

ma mboro ŋa Yawe Yɛnŋɛlɛ ma mɛgɛ ki yeri mala saga.

56 Màla magala li logo, ma yo fɔ:

«Maga kɔɔn nuŋgbogolo ke tɔn jɛngɛ ŋga mila jɛɛn ki na,

konaa na sagawa jagbelege ki na.»

57 Mìla ma yeri mala saga pilige ŋga ni, màa fulo na tanla;

màa na pye fɔ: «Maga ka fyɛ.»

58 Yawe Yɛnŋɛlɛ, mà yere na kala li ni ma para,

màla go ki shɔ.

59 Yawe Yɛnŋɛlɛ, kapere nda pè pye na na, màri yan,

na kiti wi kɔn mala tanga ki yo.

60 Kayaŋga ŋga pè wɔ na ni, màga yan,

yɔn lemɛ mba fuun pè le na na, màa yan.

61 Yawe Yɛnŋɛlɛ, tɛgɛlɛ na fuun paa na tegele, màli logo,

yɔn lemɛ mba fuun paa nii na na, màa jɛn.

62 Pe yɛn na pe sɛnrɛ ti yuun na waa na na,

pe yɛn na sɔnrimbere piin na mɛgɛ ni pilige pyew.

63 Wele, pe yɛn ma cɛn o, pe yɛn ma yere o,

na mɛgɛ ko pe maa koo wa pe lesangara yuuro ti ni.

64 E, Yawe Yɛnŋɛlɛ, ŋga pè pye na na,

ma pe sara ma yala ki kapyege nuŋgba ki ni.

65 Pe kotogo ki ŋgban pe na,

mɔɔ daŋga ki wa pe na.

66 Yawe Yɛnŋɛlɛ, ma naŋgbanwa pi tɛgɛ ma pe purɔ,

ma pe tɔngɔ ma pe wɔ laga tara ti yɛgɛ ki na.