15
Jɔlɔgɔ yaa to
Yɛnŋɛlɛ li woolo pe na
Yɛnŋɛlɛ li woolo pe na
1 Kona, a Yawe Yɛnŋɛlɛ lì silan pye fɔ: «Ali Moyisi naa Samiyɛli pe ka pan mbe yere na yɛgɛ sɔgɔwɔ, mbanla yɛnri ki leele mbele pe kan, mi se yɛnlɛ pe na naa. Pe purɔ ma pe wɔ na yɛgɛ sɔgɔwɔ, pe yaga paa kee! 2 Na pe kɔɔn yewe mbe yo fɔ: ‹We yaa kari se yeri?› Ma pe yɔn sogo ma yo fɔ, pa Yawe Yɛnŋɛlɛ lì yo yɛɛn fɔ:
‹Mbele pe daga mbe ku, poro mbe ku;
mbele pe daga tokobi mbe gbo, tokobi mbe poro gbo;
mbele pe daga fuŋgo mbe to pe na, fuŋgo mbe to poro na;
mbele pe daga mbe yigi mbe kari pe ni kulowo ni, pe poro yigi pe kari pe ni kulowo ni.› »
3 Yawe Yɛnŋɛlɛ lo lì yo ma fɔ: «Jɔlɔgɔ cɛnlɛ tijɛrɛ mi yaa wa pe na. Pe yaa ka pe gbo tokobi ni, pyɔɔnlɔ pe yaa kaa pe wire kara ti tilele mbaa ti kɔɔnlɔ, sannjɛrɛ ti yaa ka pe wire kara ti yɔli, cɛnrɛ ti yaa ka pe ka mbe pe jɔgɔ. 4 Mi yaa ti pe kala laa fyɛrɛ gbɔrɔ waa dunruya wunluwɔ pyew pi na; mi yaa ko pye ma Ezekiyasi pinambyɔ Manase ŋa wìla pye Zhuda tara wunlunaŋa wi kapere to kala na, to nda fuun wìla pye wa Zheruzalɛmu we† 15.4: Manase kagala ke yɛn ma yɔnlɔgɔ lara nda na, tori nda yɛɛn: 2 Wunlu 21.1-16; 2 Kuro 33.1-20..»
Zheruzalɛmu ca woolo,
Yɛnŋɛlɛ li se ye yinriwɛ ta
Yɛnŋɛlɛ li se ye yinriwɛ ta
5 «E, Zheruzalɛmu, ambɔ wi yaa ma yinriwɛ ta san?
Ambɔ wi yaa ma kotogo ki sogo ma na?
Ambɔ wi yaa laa yɛɛ tege mbe pan mbaa ma kala yewe?
6 Yawe Yɛnŋɛlɛ lo lì yo ma fɔ:
‹Mboro mà je mi na,
mà puŋgo le na ni;
ki kala na, mìlan kɛɛ ki yirige ma na mbɔɔn tɔngɔ,
mì te ma yinriwɛ tawa pi ni.
7 Mi yaa na woolo pe fɛ mbe pe yirige wa tara ti ni yarilire fɛkanŋgaga ni, mbe pe jaraga;
mi yaa ti pe pe piile pe la.
Mi yaa pe tɔngɔ,
katugu pee pe tangalɔmɔ pi kanŋga.
8 Muwi mì ti, a pe naŋgunjaala pè si lɛgɛ ma wɛ kɔgɔje yɔn taambugɔ ki na.
Mi yaa jɔgɔwɔ pyefɔ wi torogo yɔnlɔ fuŋgbanga na maliŋgbɔɔn lefɔnŋɔ wi nɔ wi kɔrɔgɔ,
mi yaa fo mbe fyɛrɛ naa sunndo kɔngɔ wa ye na.
9 Jɛlɛ ŋa wì pinambiile kɔlɔshyɛn se, wi fanŋga kì kɔ wi ni,
wi yinwege wɔnwɔn pì shɔ wi yeri.
Yembinɛ lì wɔ wi na ma yɔnlɔ ki yaga go na;
fɛrɛ tùu yigi fɔ maa go sogo.
Mbele ka koro yinwege na, mi yaa pe le juguye pe kɛɛ,
pe pe gbo tokobi ni.
Yawe Yɛnŋɛlɛ lo lì yo ma.› »
Yɛnŋɛlɛ li yaa fanŋga le
Zheremi wi tunŋgo ki ni
Zheremi wi tunŋgo ki ni
10 «E, na nɔ, jɔlɔgɔ yɛn na wogo, katugu màla se!
Muwi mì pye kendige wɔfɔ naa maara kɔnfɔ tara woolo pe ni fuun pe yeri.
Mi si fɔgɔ kɔn lere yeri, mi si fɔgɔ taga lere na,
ma si yala lere pyew wi yɛn nala daŋgi.»
11 Kona, a Yawe Yɛnŋɛlɛ lì silan yɔn sogo ma yo fɔ:
«Kaselege ko na, mi yaa ma shɔ ma jɔlɔgɔ sanga naa ma jorowo sanga wi ni;
ma juguye poro pe yaa ka pan mbaa ma yɛnri.
12 Naga yɛn ma, lere mbe ya mbe tugurɔn kaw le,
tugurɔn nda tì yiri wa yɔnlɔparawa kamɛŋgɛ kɛɛ tara ti ni, nakoma tuguyɛnrɛ le?»
We Fɔ wi sɛnyoro
13 «Mi yaa ti leele pe pan pe ye kɛɛ yaara naa ye yarijɛndɛ ti ni fuun ti koli, pe se yaraga ka sara ye yeri;
ko yaa pye ma, ye kapere nda fuun yè pye to kala na, to nda yè pye laga tara ti lagapyew ki ni.
14 Mi yaa ti ye sa pye ye juguye pe kulolo, tara ta yɛgɛ ni, nda yee jɛn;
katugu na naŋgbanwa pì yiri na ni paa kasɔn yɛn,
ŋga ki yɛn na sori ye mɛgɛ ni.»
Zheremi wi sɛnyoro
15 «E, Yawe Yɛnŋɛlɛ, mà kala pyew li jɛn,
ma jatere wi tɛgɛ na na, ma yere na kala li ni,
mala kayaŋga ki wɔ na jɔlɔfɛnnɛ pe ni;
maga kaa pe kala li kunni ma yɛɛ ni mbe ti panla gbo.
Ki jɛn ma yo fɔ mboro kala na, pe yɛn nala tifaga, a mìgi kun na yɛɛ ni.
16 Ma sɛnrɛ ti ka gbɔn na na sanga ŋa ni, mi mari yigi mari tɛgɛ wa na nawa;
ma sɛnrɛ tìlan nawa pi yinŋgi, ma yɔgɔrimɔ kan na yeri,
katugu ma mɛgɛ ko ki yɛn na yinri na na.
Yawe Yɛnŋɛlɛ, Yɛnŋɛlɛ na yawa pi ni fuun fɔ.
17 Mi fa sa cɛn mbele pe maa kala lakoo leele na pe ni, mbaa tɛgɛ pe ni ja;
ma fanŋga kɛɛ kìlan jori, a mì koro na yɛ,
katugu mala nawa pi ŋgban na na jɛŋgɛ leele pe ni.
18 Yiŋgi na, a na jɔlɔgɔ ki nɛɛ seregi na kee yɛgɛ?
Yiŋgi na, na yama pì si panra na na, pi si woro na koo?
Naga yɛn ma, ma yɛn na jaa mbe pye na yeri kaselege ko na paa pulugo yɛn, ŋga ki maa lere fanla wi le,
pulugo ŋga lere se ya mboo jigi wi taga ki tɔnmɔ pi na wi le?»
19 Ki kala na, pa Yawe Yɛnŋɛlɛ lì yo yɛɛn fɔ:
«Na ma ka sɔngɔrɔ mbe pan na kɔrɔgɔ,
mi yaa ma lɛ naa mbɔɔn pye na tunmbyee.
Na ma ka yarijɛndɛ ti wɔ ti yɛ nda ti yɛn kayɔngɔ fu ti ni,
pa kona ma yaa pye na yɔn sɛnrɛ yofɔ.
Ɛɛn fɔ leele poro pe daga mbe sɔngɔrɔ mbe pan ma kɔrɔgɔ,
mboro ma ma daga mbe sɔngɔrɔ mbe kari poro kɔrɔgɔ.
20 Mi yaa ma tɛgɛ ki leele mbele pe yɛgɛ sɔgɔwɔ paa tuguyɛnrɛ malaga sigembogo yɛn;
pe yaa malaga gbɔn ma ni,
ɛɛn fɔ pe se ya ma ni,
katugu mi yaa pye ma ni, jaŋgo mbɔɔn shɔ mbɔɔn go yirige.»
Yawe Yɛnŋɛlɛ lo lì yo ma.
21 «Mi yaa ma shɔ lepeele pe yeri,
mbɔɔn go shɔ lewɛlimbɛlɛ pe kɛɛ.»
†15:4 15.4: Manase kagala ke yɛn ma yɔnlɔgɔ lara nda na, tori nda yɛɛn: 2 Wunlu 21.1-16; 2 Kuro 33.1-20.