1 Yaa Yawe Yɛnŋɛlɛ li sɔnni!

Mi yɛn na Yawe Yɛnŋɛlɛ li sɔnni.

2 Mi yaa la Yawe Yɛnŋɛlɛ li sɔnni na yinwege sanga wi ni fuun wi ni,

mi yaa la yuuro koo mbaa na Yɛnŋɛlɛ li gbogo, mbanla ta yinwege na sanga ŋa ni.

3 Yaga ka ye jigi wi taga legbɔɔlɔ na,

yaga ka ye jigi wi taga sɛnwee na, wo ŋa wi se ya mbe lere shɔ we.

4 Na wi yinwege wɔnwɔn piga yere pilige ŋga ni, wi ma sɔngɔrɔ wa taambugɔ ki ni;

ki pilige nuŋgba ki ni, ŋga fuun wìla pye na jate, ko ma kɔ saw.

5 Lere ŋa ka Zhakɔbu Yɛnŋɛlɛ li pye wi sagafɔ, fɛrɛwɛ yɛn wi woo;

lere ŋa ka wi jigi wi taga Yawe Yɛnŋɛlɛ, wi Yɛnŋɛlɛ li na, fɛrɛwɛ yɛn wi woo!

6 Lo lì naayeri wo naa tara ti da,

naa kɔgɔje wo naa wi nawa yaara ti ni fuun ti ni;

li yɛn sɛnrɛ nuŋgba yofɔ fɔ sanga pyew.

7 Pe yɛn na mbele jɔlɔ, li ma pe tanga ki kan pe yeri,

fuŋgo yɛn mbele na, li ma yaakara kan pe yeri.

Yawe Yɛnŋɛlɛ li ma kasopiile pe shɔ.

8 Yawe Yɛnŋɛlɛ li ma fyɔɔnlɔ pe yɛngɛlɛ ke yɛngɛ,

mbele pè kurukuru, Yawe Yɛnŋɛlɛ li ma pe yirige mbe pe sin,

lesinmbele pe yɛn ma Yawe Yɛnŋɛlɛ li ndanla.

9 Yawe Yɛnŋɛlɛ li maa nambanmbala pe go singi,

li maa pijiriwele poro naa naŋgunjaala pe sari;

ɛɛn fɔ lepeele pè kagala ŋgele kɔn mbe pye, li ma ke jɔgɔ.

10 Yawe Yɛnŋɛlɛ li yɛn wunluwɔ fɔ sanga pyew;

yoro Siyɔn ca woolo, lo li yɛn ye Yɛnŋɛlɛ sanga pyew fɔ tetete.

Yaa Yawe Yɛnŋɛlɛ li sɔnni!