118
Mi yaa lanla yinwege ki piin
mbaa Yɛnŋɛlɛ li kapyegele
ke sɛnrɛ yuun
mbaa Yɛnŋɛlɛ li kapyegele
ke sɛnrɛ yuun
1 Yaa Yawe Yɛnŋɛlɛ li shari yaa li sɔnni, katugu li yɛn jɛnnɛ,
katugu li kagbaraga ki yɛn kɔsaga fu† 118.1: 1 Kuro 16.34; 2 Kuro 5.13; 7.3; Ɛsidi 3.11; Yuuro 100.5; 106.1; 107.1; 136.1; Zhere 33.11!
2 Izirayɛli woolo pe daga mbaa ki yuun fɔ:
«Li kagbaraga ki yɛn kɔsaga fu.»
3 Arɔn setirige piile pe daga mbaa ki yuun fɔ:
«Li kagbaraga ki yɛn kɔsaga fu.»
4 Mbele pe maa fyɛ Yawe Yɛnŋɛlɛ li yɛgɛ pe daga mbaa ki yuun fɔ:
«Li kagbaraga ki yɛn kɔsaga fu.»
5 Mala ta wa na jɔlɔgɔ ki ni, mìla Yawe Yɛnŋɛlɛ li yeri lilan saga,
a Yawe Yɛnŋɛlɛ lìlan yɔn sogo, ma wogosaga kan na yeri.
6 Yawe Yɛnŋɛlɛ li yɛn na ni, mi woro na fyɛ yaraga ko ka yɛgɛ.
Yiŋgi sɛnwee mbe ya pye na na† 118.6: Ebu 13.6?
7 Yawe Yɛnŋɛlɛ li yɛn na ni, lo li yɛn na sagafɔ we;
mi yaa kanla juguye pe tolo li yan.
8 Mɔɔ yɛɛ karafa Yawe Yɛnŋɛlɛ li na,
kò mbɔnrɔ mɔɔ jigi wi taga sɛnwee na ko na.
9 Mɔɔ yɛɛ karafa Yawe Yɛnŋɛlɛ li na,
kò mbɔnrɔ mɔɔ jigi wi taga legbɔɔlɔ na ko na.
10 Cɛngɛlɛ sanŋgala ke ni fuun kàa wa mala maga,
ɛɛn fɔ Yawe Yɛnŋɛlɛ li mɛgɛ ki fanŋga na, mìla pe tɔngɔ.
11 Pàa wa mala maga, mala wa njolo,
ɛɛn fɔ, Yawe Yɛnŋɛlɛ li mɛgɛ ki fanŋga na, mìla pe tɔngɔ.
12 Pàa wa mala maga paa sɛnrɛgɛ yɛn,
ɛɛn fɔ pàa ku ma wɔ wa paa wuuro kasɔn ma kaa figi we;
Yawe Yɛnŋɛlɛ li mɛgɛ ki fanŋga na, mìla pe tɔngɔ.
13 Pàa na wɔnrɔgɔ ŋgbanga mbe ta mbe to,
ɛɛn fo, a Yawe Yɛnŋɛlɛ lìlan saga.
14 Yawe Yɛnŋɛlɛ lo li yɛn na fanŋga ye, mi maa yuuro koo nali gbogo.
Lo li yɛn na shɔfɔ we† 118.14: Ɛki 15.2; Eza 12.2.
15 Lesinmbele pe yɛn na jɔrɔgi nayinmɛ ni,
na cew tawa kɔŋgɔlɔ waa wa pe paara yinrɛ ti ni.
Yawe Yɛnŋɛlɛ li fanŋga kɛɛ ki yɛn na kagbɔgɔlɔ piin.
16 Yawe Yɛnŋɛlɛ lìli fanŋga kɛɛ ki yirige mbe cew kan,
Yawe Yɛnŋɛlɛ li fanŋga kɛɛ ki yɛn na kagbɔgɔlɔ piin.
17 Mi se ku, ɛɛn fɔ mi yaa koro go na,
jaŋgo mbaa Yawe Yɛnŋɛlɛ li kagala ke yɛgɛ yuun.
18 Yawe Yɛnŋɛlɛ lì jɔlɔgɔ wa na na fɔ jɛŋgɛ,
ɛɛn fɔ li silan yaga kunwɔ pi kan.
19 Ye kasinŋge go kɔɔrɔ† 118.19: Kasinŋge go kɔɔrɔ to ti yɛn Zheruzalɛmu ca shɛrigo gbɔgɔ ki yeyɔnrɔ re. ti yɛngɛlɛ na kan,
jaŋgo mbe ye mbe Yawe Yɛnŋɛlɛ li shari mbeli sɔn.
20 Yawe Yɛnŋɛlɛ li go yeyɔngɔ koyi ŋga yɛɛn,
pa lesinmbele pe maa yiin wa ki ni.
21 We Fɔ, mi yaa ma shari mbɔɔn sɔn, katugu màla yɔn sogo,
mboro ma yɛn na shɔfɔ we.
22 Go wafɛnnɛ pè je sinndɛlɛgɛ ŋga na, ko kì pye go yɛnlɛ li sinndɛlɛgɛ koŋgbanŋga ye† 118.22: Luki 20.17; Kapye 4.11; 1 Pyɛ 2.7.
23 Pa ko wogo ŋga kò yiri wa Yawe Yɛnŋɛlɛ li yeri,
a kì pye kagbɔgɔ we yɛgɛ na† 118.22-23: Mati 21.42; Maki 12.10-11.
24 Ko pilige ŋga yɛɛn, ko Yawe Yɛnŋɛlɛ lì kɔn ma tɛgɛ,
ye pan waa yɔgɔri waa nayinmɛ nii ki ni!
25 E, Yawe Yɛnŋɛlɛ, ki yaga ma we shɔ!
Yawe Yɛnŋɛlɛ, ki yaga we cew ta!
26 Ŋa wila paan Yawe Yɛnŋɛlɛ li mɛgɛ ki na, Yɛnŋɛlɛ sa duwaw wi na!
Mbe we ta wa Yawe Yɛnŋɛlɛ li shɛrigo gbɔgɔ ki ni, we yaa duwaw pye ye kan† 118.25-26: Mati 21.39; Maki 11.9; Luki 13.5; 19.38; Zhan 12.13!
27 Yawe Yɛnŋɛlɛ lo li yɛn Yɛnŋɛlɛ le,
li maa yanwa yinrigi we kan!
Ye pan wa gbogolomɔ pi ni fɛti wi na, tige njere ni wa ye kɛyɛn yi ni,
fɔ sa gbɔn wa saraga wɔsaga ki yɛnŋgɛlɛ ke tanla!
28 Mboro ma yɛn na Yɛnŋɛlɛ le, mi yaa lɔɔn shari mbaa ma sɔnni,
na Yɛnŋɛlɛ, mi yaa lɔɔn sɔnni.
29 Yaa Yawe Yɛnŋɛlɛ li shari yaa li sɔnni, katugu li yɛn jɛnnɛ,
li kagbaraga ki yɛn kɔsaga fu.
†118:1 118.1: 1 Kuro 16.34; 2 Kuro 5.13; 7.3; Ɛsidi 3.11; Yuuro 100.5; 106.1; 107.1; 136.1; Zhere 33.11
†118:6 118.6: Ebu 13.6
†118:14 118.14: Ɛki 15.2; Eza 12.2
†118:19 118.19: Kasinŋge go kɔɔrɔ to ti yɛn Zheruzalɛmu ca shɛrigo gbɔgɔ ki yeyɔnrɔ re.
†118:22 118.22: Luki 20.17; Kapye 4.11; 1 Pyɛ 2.7
†118:23 118.22-23: Mati 21.42; Maki 12.10-11
†118:26 118.25-26: Mati 21.39; Maki 11.9; Luki 13.5; 19.38; Zhan 12.13