Kaselege ko na, Yɛnŋɛlɛ li yɛn jɛnnɛ Izirayɛli woolo pe ni,

li yɛn jɛnnɛ mbele pe nawa pi yɛn ma filige pe na pe ni.

2 Ma si yala, mi wo na, kìla koro jɛnri na tɔɔrɔ ti mbaa wɔnri,

kìla koro jɛnri anmɛ mila wɔ ma to;

3 katugu mbele pe maa pe yɛɛ gbogo, yenjaga la pye na ni pe ni,

naa mìla pye na poro kapere pyefɛnnɛ pe yaan pe kagala kaa yɔngɔ na kee yɛgɛ we.

4 Ki leele kaŋgbanra kpɛ woro na gbɔɔn pe na fɔ sa gbɔn kunwɔ pi na,

pe yɛn ma yɔn wire na, ma tugbɔlɔ.

5 Jɔlɔgɔ ŋga ki maa sɛnweele pe taa ko ka na gbɔn pe na;

kapege na pe ta paa leele sanmbala pe yɛn.

6 Ki kala na, yɛɛ gbɔgɔwɔ pi yɛn pe yeri paa fereyaraga yɛn wa pe yɔlɔgɔ,

lewɛlɛwɛ kapyere ti yɛn pe yeri paa yaripɔrɔ yɛn ma pe tɔn.

7 Pè tɔrɔ tɔrɔ fɔ a pe yɛngɛlɛ kaa yɛngɛlɛ pe na,

jatere pere nda ti yɛn wa pe kotogo na, ti yɛn kɔnlɔ fu.

8 Pe maa kala lakoo leele na, na sɛnŋgbanra yuun mbe kapege pye,

pe maa para na yɛgɛ tungu leele na, mbaa pe jɔlɔ.

9 Pe ma para ma ye Yɛnŋɛlɛ na wa naayeri li ni,

pe yɔn sɛnrɛ ti maa jɔgɔwɔ piin tara ti lagapyew.

10 Ki kala na, Yɛnŋɛlɛ li woolo pe ma taga pe puŋgo na,

ma pe sɛnrɛ ti lɛ na tanri ti na, paa yɛgɛ ŋga na pe maa tɔnmɔ woo we.

11 Ki leele pe maa yuun fɔ: «Yɛnŋɛlɛ li mbe ya mbege jɛn mɛlɛ?

Yɛnŋɛlɛ na yaara ti ni fuun ti go na, li mbe ya mbege jɛn mɛlɛ?»

12 Pa lepeele pe kala li yɛn ma,

pe yɛn yɛyinŋge na, a pe koro na ka tari pe yarijɛndɛ ti na na kee yɛgɛ.

13 Kaselege ko na, ki cɛn ndɛɛ mìlan nawa pi yaga pì filige na na jaga win,

mìlan kɛyɛn yi jogo mbege naga fɔ mi yɛn jɛrɛgisaga fu jaga win.

14 Katugu tege ki yɛn na na pilige pyew,

pinliwɛ nuŋgba nuŋgba pyew jɔlɔgɔ ki ma gbɔn na na.

15 Ndɛɛ mìla yo mi yaa la para paa pe yɛn,

kona mi jɛn nɔɔ woolo pe fanla.

16 Kì pye ma, a mì si jatere pye ki kala li na, mbe ta mbeli kɔrɔ jɛn,

a mì sigi yan fɔ li yɛn ma ŋgban.

17 Fɔ naa mìla ka saa ye wa ma shɛrigo gbɔgɔ ki ni pilige ŋga ni,

lepeele pe yaa kɔ yɛgɛ ŋga na, a mì si jɛn maga kɔrɔ jɛn.

18 Kaselege ko na, Yɛnŋɛlɛ, ma pe le konɔ la ni, na li maa wɔnri,

jaŋgo mbe pe jan mbe pe tɔngɔ!

19 E, wele, pè tɔngɔ ma wɔ wa yɔnlɔ nuŋgba!

Pè kɔ ma wɔ wa, fyɛrɛ gbɔrɔ tì pe tɔngɔ pew.

20  We Fɔ, na maga yiri pe kɔrɔgɔ, pe yaa kɔ saw,

paa yɛgɛ ŋga na lere ka wɔɔnrɔ wɔnlɔ mbe yaara yan, wi ka yɛn mbe yiri, ti ma kɔ wi yɛgɛ na we.

21 Sanga ŋa ni na nawa pìla tanga na na,

a kayaŋga kìlan jatere wi piri na na fɔ ma saa toro,

22 mìla pye lembige, mi sila kala jɛn,

mìla pye tijinliwɛ fu fɔ paa yaayogo yɛn ma yɛgɛ sɔgɔwɔ.

23 Konaa ki ni fuun, mi yɛn ma ni sanga pyew,

màla yigi na kalige kɛɛ ki na.

24 Ma maa na yɛrɛgi nala yɛgɛ sinni wa konɔ li ni,

ko puŋgo na, ma yaa kanla leŋge wa ma gbɔgɔwɔ yanwa pi ni.

25 Ambɔ wi yɛn na yeri wa yɛnŋɛlɛ na mbanla saga, na mboro ma?

Mi woro na yaraga ko ka jaa laga tara ti ni, na mboro ma.

26 Na wire ti fanŋga ki mbe ya kɔ, na jatere wi kɔ na na,

ɛɛn fɔ Yɛnŋɛlɛ lo li yɛn na kɛɛndagaserege, naa na tasaga fɔ sanga pyew!

27 Wele, mbele pe ma pe yɛɛ laga ma na, pe ma puŋgo,

mbele pe woro sinmbele ma ni, ma ma pe tɔngɔ ma pe wɔ wa.

28 Mi wo na, mbe koro mbe mara ma na Yɛnŋɛlɛ, ko ki yɛn na fɛrɛwɛ we,

pa mìlan jigi wi taga mboro na we Fɔ, Yawe Yɛnŋɛlɛ,

jaŋgo mbe ya mbaa ma kapyegele ke ni fuun ke yɛgɛ yuun.