46
Yɛnŋɛlɛ li yɛn we ni
1 Yurukɔɔlɔ to wi sɛwɛ yurugo, Kore pinambiile pe Yɛnŋɛlɛ gbɔgɔyurugo, ŋga pe maa koo magambile ni.
2 Yɛnŋɛlɛ li yɛn we larasaga konaa we kɛɛndagaserege;
li yɛn ma gbɛgɛlɛ mbe we saga wa we jɔlɔgɔ ki ni.
3 Ki kala na, we woro na fyɛ, ali na tara ti kaa yɛgɛ,
ali na yanwira ti ka kɔlɔgi mbe sa toori wa kɔgɔje wi latijugo ki ni,
4 ali na kɔgɔje wi tɔnmɔ mba pi maa yinrigi na tuun pi kaa tinni ŋgbanga mbaa ŋgbɔrɔgɔ kɔɔn,
konaa mbaa yinrigi wa naayeri fɔ mbaa yanwira ti yɛgɛyɛgɛ.
Wɔnmatigiwɛn laga.
5 Gbaan wa yɛn wa, ŋa wi njere ti maa fuun na nayinmɛ kaan Yɛnŋɛlɛ li ca woolo pe yeri,
ki ca ŋga ki yɛn Yɛnŋɛlɛ na yaara ti ni fuun ti go na li cɛnsaga kpoyi ye.
6 Yɛnŋɛlɛ li yɛn wa ki ca ki ni, yaraga ko ka kpɛ sege jan;
pa laga kila lari, Yɛnŋɛlɛ li mɛɛ pan mbe pe saga.
7 Cɛngɛlɛ sanŋgala ke yɛn na tinni, wunluwɔ pi yɛn na yɛgɛ;
Yɛnŋɛlɛ li ka li magala li yirige, tara ti ma yan ma kɔ saw.
8 Yawe Yɛnŋɛlɛ na yawa pi ni fuun fɔ li yɛn we ni,
Zhakɔbu Yɛnŋɛlɛ le, li yɛn we larasaga.
Wɔnmatigiwɛn laga.
9 Ye pan ye Yawe Yɛnŋɛlɛ li kapyegele ke wele,
lì jɔgɔwɔ gbɔɔ mba pye laga tara ti na, ye pan yoo wele!
10 Lo li ma maara ti kɔ fɔ mbe sa gbɔn wa tara ti go ŋga na,
li ma sandira ti kaari, mbe njaanra ti kaari,
li ma kasɔn le malaga gbɔnwotoroye pe ni mbe pe sogo.
11 We Fɔ wì yo fɔ: «Yege yerege ma, yege jɛn ye yo fɔ muwi mi yɛn Yɛnŋɛlɛ le;
muwi mi yɛn cɛngɛlɛ ke go na,
muwi mi yɛn tara ti go na.»
12 Yawe Yɛnŋɛlɛ na yawa pi ni fuun fɔ li yɛn we ni,
Zhakɔbu Yɛnŋɛlɛ le, li yɛn we larasaga.
Wɔnmatigiwɛn laga.