2 E, Yɛnŋɛlɛ, kagala ŋgele mà pye we tɛlɛye pe sanga wi na,

maga lɛ wa fafafa,

wè ke logo we nuŋgbogolo ke ni;

we tɛlɛye pè ke yɛgɛ yo we kan.

3 Màa ma fanŋga ki tɛgɛ ma cɛngɛlɛ kele purɔ, ma cɛnsaga kan we tɛlɛye pe yeri laga tara ti ni;

màa cɛngɛlɛ kele tɔngɔ,

jaŋgo we tɛlɛye pe tara gbende ta pe cɛn.

4 We tɛlɛye pe sila malaga gbɔn mbe tara ti shɔ pe tokobiye poro ni,

pe yɛɛra fanŋga ko ma kila cew kan pe yeri,

ɛɛn fɔ, ma fanŋga, naa ma yawa konaa ma kagbaraga pyege ko fanŋga na kìla pye,

katugu pe kala làa ma ndanla.

5 E, Yɛnŋɛlɛ, mboro ma yɛn na wunlunaŋa we,

mboro màga kɔn maga tɛgɛ mbe woro Zhakɔbu setirige piile we shɔ we juguye pe kɛɛ.

6 Mboro fanŋga na, we ma we juguye pe purɔ,

ma mɛgɛ ki fanŋga na, we ma we winfɛnnɛ pe tɔngɔ.

7 Katugu na jigi wi woro na sandiga ko na,

na tokobi wo ma wi yaa na shɔ.

8 Ɛɛn fɔ, mboro ma ma we shɔ we juguye pe kɛɛ,

we yɛn ma mbele mbɛn, ma ma fɛrɛ wa pe na.

9 Yɛnŋɛlɛ, we maa ma gbogo pilige pyew,

we maa ma mɛgɛ ki sɔnni sanga pyew.

10 Konaa ki ni fuun ni, mà we wa, mà fɛrɛ wa we na,

ma woro na pinlɛlɛ na kee we maliŋgbɔɔnlɔ pe ni naa wa malaga gbɔnsaga.

11 Mà ti, a waa fee we juguye pe yɛgɛ,

we yɛn ma mbele mbɛn, pe yɛn na we yaara ti koli paa yɛgɛ ŋga na ki yɛn ma pe ndanla.

12 Ma wè le pe kɛɛ paa simbaala yɛn, mbele pe yɛn na kee pe ni wa pe gbosaga;

mà we jaraga wa cɛngɛlɛ sanŋgala ke sɔgɔwɔ.

13 Mɔ̀ɔ cɛnlɛ woolo pe pɛrɛ sɔnndanga na,

ali yɛrɛ mɛɛ ya mbe pe sɔnŋgɔ ki ŋgban jɛnri.

14 Mà ti we cɛnyɛɛnlɛ pe yɛn na we tifaga,

mbele pe yɛn ma we maga, pe yɛn na tɛgɛ naga lakoo we na.

15 Mà ti a cɛngɛlɛ sanŋgala ke yɛn na yomiyɛgɛlɛ waa we mɛgɛ ni;

tara woolo pe yɛn na go yangara na tɛgɛ we na.

16 Fɛrɛ ti yɛn na na sanga pyew,

fɛrɛ tìlan go ki sogo na na;

17 katugu mi yɛn nala tɛgɛlɛ sɛnrɛ naa na mɛjɔɔgɔ sɛnrɛ ti nuru,

na yɛgɛ yɛn na jugu wi na, wi yɛn na jaa mboo kayaŋga ki wɔ na ni.

18 Ki kagala ŋgele ke ni fuun ke yɛn na gbɔɔn we na, konaa ki ni fuun ni, wee si fɛgɛ ma na;

wee sɔɔn yɔn finliwɛ pi jɔgɔ.

19 Wee we jatere wi laga ma na,

wee sɔɔn konɔ li wa.

20 Ma si yala, mà we tɔngɔ ma we cɛnsaga ki pye dabaala cɛnsaga† 44.20: Ko kɔrɔ wo yɛn fɔ pe cɛnsaga kì jɔgɔ ma pye kataga.;

mà we tɔn kunwɔ pi diwi wi ni.

21 Ndɛɛ kì pye we fɛgɛ ma na, we Yɛnŋɛlɛ,

ndɛɛ ki pye we we kɛyɛn yi yirige ma yarisunndo ta yɛgɛ yɛnri,

22 Yɛnŋɛlɛ, ma se jɛn naga jɛn wi le?

Katugu mà sɛnwee wi ŋgundo kagala ke ni fuun ke jɛn.

23 Ɛɛn fɔ ma kala na, pe yɛn na we kuun pilige pyew,

pe yɛn na we jate paa simbaala mbele pe yɛn pe gbosaga.

24  We Fɔ, yiri! Yiŋgi na, a ma nɛɛ wɔnlɔ?

Yɛn ma yiri! Maga ka we wa fɔ sanga pyew.

25 Yiŋgi na, a ma sɔɔn yɛɛ lara we na?

Yiŋgi na, a ma si fɛgɛ we tege naa we jɔlɔgɔ ki na?

26 Ma si yala, wè to wa taambugɔ ki ni ndɛɛ kunwɔ kayaŋga to we na;

wè to ma mara tara ti na kpanŋgbanŋgban.

27 Yiri ma pan ma we saga;

we shɔ ma kagbaraga ki kala na!