Yawe Yɛnŋɛlɛ li yɛn na yanwa konaa nala shoo,

mi yaa la fyɛ ambɔ fɔ yɛgɛ?

Yawe Yɛnŋɛlɛ li yɛn na go sigefɔ,

na sunndo wi yaa la kɔɔn ambɔ fɔ yɛgɛ?

2 Na lepeele pe kaa fulo na tanla mbe yo pe yaa na kɔɔnlɔ yuroyuroyuro paa cɛnrɛ yɛn,

poro mbele na winfɛnnɛ naa na juguye, poro pe yaa kurugo mbe toori.

3 Na maliŋgbɔɔnlɔ ŋgbelege ka pan mbe maliŋgbɔɔnlɔ cɛnsaga kan mbanla yɔn tɔn,

na sunndo wi se kɔn na na.

Ali na paga yiri malaga ni na kɔrɔgɔ,

konaa ki ni fuun, na jigi wi yaa pye mbe cɛn.

4 Yaraga nuŋgba mi yɛn na yɛnri Yawe Yɛnŋɛlɛ li yeri,

ko mi yɛn na jaa fɔ jɛŋgɛ.

Ko yɛn fɔ mila jaa mbe cɛn wa Yawe Yɛnŋɛlɛ li go ki ni na yinwege piliye yi ni fuun yi ni,

jaŋgo mbaa li tiyɔnwɔ pi wele

konaa mbaa li nandanwa kala li jaa wa li shɛrigo gbɔgɔ ki ni.

5 Katugu li yaa lanla go singi wa li paraga go ki ni jɔlɔgɔ pilige ki na,

mbanla lara wa li cɛnsaga paraga go ki logologo wi ni.

Li yaa kanla yerege walaga ka go na, ŋga tipege se ya gbɔn na na.

6 Koni mbe ya mbanla yɔlɔgɔ ki yirige caw na juguye mbele pànla maga pe go na;

mi yaa kaa yɔgɔrimɔ saara woo Yawe Yɛnŋɛlɛ li yeri wa li go ki ni;

mi yaa kaa yuuro koo mbaa sɔnmɔ yuuro koo Yawe Yɛnŋɛlɛ li kan.

7 Yawe Yɛnŋɛlɛ, mi yɛn nɔɔ yɛnri, logo na yeri!

Ki yaga mala yinriwɛ ta, mala yɔn sogo!

8 Sɛnrɛ nda mà yo, mi yɛn na jatere piin ti na, fɔ: «Yaa na lagajaa!»

E, Yawe Yɛnŋɛlɛ, mi yɛn nɔɔ lagajaa!

9 Maga ka puŋgo wa na yeri,

maga ka je mi ŋa ma tunmbyee na na naŋgbanwa ni!

Mboro ma yɛn na sagafɔ,

maga kanla wa, maga ka je na na, na shɔfɔ Yɛnŋɛlɛ!

10 Ali na to wo naa na nɔ wi ni paga je na na,

Yawe Yɛnŋɛlɛ, mboro yaa na yigi.

11 Yawe Yɛnŋɛlɛ, ma konɔ li naga na na,

na yɛgɛ sin wa kozinnɛ li ni mbele paa na pɛɛlɛ pe kala na!

12 Na winfɛnnɛ paa ŋga jaa, maga kanla le ki kɛɛ,

katugu yagbogolo sɛrɛya yofɛnnɛ naa lewɛlimbɛlɛ yiri na kɔrɔgɔ.

13 Ndɛɛ na jigi wi sila pye ki na mbe Yawe Yɛnŋɛlɛ li kajɛŋgɛ pyege ki yan,

mbe we ta yinwege na laga ki dunruya ŋa wi ni, mbe ja pye mɛlɛ?

14 Ma jigi wi taga Yawe Yɛnŋɛlɛ li na!

Fanŋga le ma yɛɛ ni, ma kotogo ta!

Ma jigi wi taga Yawe Yɛnŋɛlɛ li na!