24
1 Balaamu wìla ki jɛn ma yo kìla Yawe Yɛnŋɛlɛ li ndanla mbe duwaw Izirayɛli woolo pe na. Kì kaa pye ma wi sila kari sa jɛɛrɛ kapyere lagaja paa yɛgɛ ŋga na wìla ki pye yɔngɔlɔ shyɛn koŋgbanŋgala ke na we. A wì si kanŋga ma yɛgɛ wa wa gbinri wi yeri 2 ma wele, mɛɛ Izirayɛli woolo pe yan pè pe paara yinrɛ ti kan ma cɛn, ma yala pe cɛngɛlɛ ke ni. Kona, a Yɛnŋɛlɛ li yinnɛ lì si tigi ma ye wi ni. 3 A wì sigi lelɛɛlɛ sɛnyoro nda ti yo ma yo fɔ:
Mi Balaamu, mi ŋa mi yɛn Bewɔri pinambyɔ, pa mila yuun yɛɛn;
mi ŋa mi yɛn lere ŋa wi maa yariyanra yaan,
na sɛnyoro ti nda.
4 Mi ŋa mi maa Yɛnŋɛlɛ li sɛnrɛ ti nuru,
mi ŋa mi maa kagala ŋgele yawa pi ni fuun fɔ wi maa nari ke yaan,
mi ŋa mi ma to mala yɛgɛ ki jiile wa tara mbaa yaara yaan, na sɛnyoro ti nda.
5 E, Zhakɔbu setirige piile, ye paara yinrɛ tì yɔn!
Yoro mbele ye yɛn Izirayɛli woolo ye cɛnsara tì yɔn dɛ!
6 Paara yinrɛ tì jaraga paa gbunlundɛrɛ yɛn, paa laforo yɛn.
Ti yɛn paa sɛgɛ kɛɛrɛ yɛn, nda ti yɛn ma tanli gbaan yɔn na.
Ti yɛn paa alowɛsi tipire yɛn, nda Yawe Yɛnŋɛlɛ lì sanri,
nakoma paa sɛdiri tire yɛn, nda ti yɛn na yinrigi lɔgɔ yɔn na.
7 Pe tɔnmɔ leyaara ti yaa yin tɔnmɔ ni,
mbaa wuun la fuun la pe yarilire kɛɛrɛ ti yinŋgi fɔ jɛŋgɛ.
Pe wunlunaŋa wi mɛgɛ ki yaa yiri mbe wɛ wunlunaŋa Agagi wi wogo ki na,
pe wunluwɔ pi fanŋga ki yaa ka gbɔgɔ mbe wɛ.
8 Yɛnŋɛlɛ làa pe yirige wa Ezhipiti tara ti ni fanŋga ni,
ŋga lere se ya yere mbege sige, paa yannɔ fanŋga yɛn.
Pe yaa tara woolo mbele pe yɛn na yinrigi pe kɔrɔgɔ pe tɔngɔ.
Pe yaa ka pe kajeere ti kaari mbe pe wɔn pe wangala ke ni.
9 Izirayɛli woolo pe mbele pè kanŋguuro kan ma sinlɛ paa jara yɛn; paa jara nɔ yɛn.
Ambɔ wi mbe ya mbe pe pye pe yiri?
Lere ŋa ka duwaw pye pe kan, ko fɔ wo yaa duwaw ta;
lere ŋa ka pe daŋga, daŋga yaa ko fɔ wo yigi† 24.9: Zhenɛ 12.3; 49.9.
10 Kì kaa pye ma, a Balaki wì si nawa ŋgban Balaamu wi ni fɔ jɛŋgɛ. A wì suu kɛyɛn yi gbɔn yi yɛɛ na mɛɛ Balaamu wi pye fɔ: «Mɔ̀ɔ yeri ma pan mala juguye pe daŋga na kan, kooŋga mà duwaw lɛgɛrɛ pye pe kan fɔ ma saa ta pyesaga taanri. 11 Koni, yiri ma sɔngɔrɔ wa ma ca. Mìla pye na jaa mbɔɔn gbɔgɔ jɛŋgɛ, ɛɛn fɔ, Yawe Yɛnŋɛlɛ lii yɛnlɛ maga gbɔgɔwɔ pi ta.»
Balaamu wìla Izirayɛli woolo
pe goto kala li wogo ki yo
pe goto kala li wogo ki yo
12 Kona, a Balaamu wì si Balaki wi yɔn sogo ma yo fɔ: «Mìla sigi yo maga ŋgban leele mbele màa tun na yeri pe kan fɔ: 13 ‹Ali na Balaki wi ka wi wunluwɔ go ki yin warifuwe naa tɛ ni mberi kan na yeri, mi se Yawe Yɛnŋɛlɛ li sɛnyoro ti kɛ kala la kpɛ ni, kaawɔ nda li yaa yo na kan to cɛ mi yaa yo. 14 Koni, mi yaa sɔngɔrɔ mbe kari na woolo pe kɔrɔgɔ. Ɛɛn fɔ, sanni mbe sa kari, ŋga ki leele mbele pe yaa ka pye ma woolo pe na wagati ŋa wila paan wi ni, pan mi yaa ki yo ma kan.› »
15 A Balaamu wì sigi lelɛɛlɛ sɛnyoro nda ti yo ma yo fɔ:
Mi Balaamu, mi ŋa mi yɛn Bewɔri pinambyɔ, pa mila yuun yɛɛn;
mi ŋa mi yɛn lere ŋa wi maa yariyanra yaan, na sɛnyoro ti nda.
16 Mi ŋa mi maa Yɛnŋɛlɛ li sɛnrɛ ti nuru,
mi ŋa mì Yɛnŋɛlɛ na yaara ti ni fuun ti go na li jɛnmɛ pi jɛn,
mi ŋa mi maa kagala ŋgele Yɛnŋɛlɛ na yawa pi ni fuun fɔ li maa nari ke yaan,
mi ŋa mi ma to mala yɛgɛ ki jiile wa tara mbaa yaara yaan,
na sɛnyoro ti nda.
17 Ŋga ki yaa ka pye mi yɛn naga yaan, ɛɛn fɔ, fɔɔnfɔɔn kala ma;
na yɛgɛ yɛn ki na, ɛɛn fɔ, ki yaa pye sanga ŋa ni, wì lali wa.
Mì wɔnnɔ† 24.17: Wɔnnɔ na pè para li sɛnrɛ na, lo yɛn na wunluwɔ wogo nari. yan li yɛn na yinrigi wa Zhakɔbu setirige woolo pe sɔgɔwɔ;
mì fanŋga fɔ yan wi yɛn na yinrigi wa poro mbele pe yɛn Izirayɛli woolo pe sɔgɔwɔ.
Wi yaa ka Mowabu cɛnlɛ woolo pe gbɔn pe mbateere ti na,
mbe Sɛti setirige piile pe ni fuun pe tɔngɔ† 24.17: Laga ŋga kì yo fɔ mbe Sɛti setirige piile pe ni fuun pe tɔngɔ, wa Moyisi lasiri sɛwɛ ŋa wi yɛn Samari tara fɛnnɛ pe yeri wi ni, kì yɔnlɔgɔ wa ma yo fɔ: Mbe Sɛti setirige piile pe gbɔn wa pe yinrɛ ti na..
18 Wi yaa ka Edɔmu tara ti shɔ mberi ta,
to nda pe yinri fun Seyiri tara, wi juguye pe tara re.
Ti yaa ka le wi kɛɛ mbe pye wi woro.
Izirayɛli woolo pe yaa ka fanŋga gbɔgɔ ta.
19 Ŋa wi yaa ka yiri wa Zhakɔbu setirige ki ni, wi yaa ka cɛn wi juguye pe go na.
Wi yaa ka sanmbala mbele pè koro go na wa cara ti ni pe gbo.
Balaamu wìla Izirayɛli woolo
pe juguye pe tɔngɔkala li yo
pe juguye pe tɔngɔkala li yo
20 Ko puŋgo na, a Balaamu wì si Amalɛki setirige piile pe yan mɛɛ wi lelɛɛlɛ sɛnyoro ti yo ma yo fɔ:
«Amalɛki setirige piile pe yɛn fanŋga ni ma wɛ cɛngɛlɛ ke ni fuun ke na;
ɛɛn fɔ, pe yaa ka kɔ mbe wɔ wa.»
21 A Balaamu wì si Keni cɛnlɛ woolo pe yan mɛɛ wi sɛnyoro ti yo ma yo fɔ:
Yoro Keni cɛnlɛ woolo, ye cɛnsaga ki yɛn ma kan ma yere jɛŋgɛ
paa sere yɛn nda ti yɛn ma tɛgɛ walaga na.
22 Konaa ki ni fuun, pe yaa ka yoro Keni cɛnlɛ woolo ye tɔngɔ mbe ye wɔ wa;
Asiri tara woolo pe yaa ka ye yigi mbe sa ye le kulowo.
23 A Balaamu wì sigi lelɛɛlɛ sɛnyoro nda ti taga wa naa ma yo fɔ:
How! Na Yɛnŋɛlɛ li ka ka ki kala na li pye, ambɔ wi yaa ka koro go na?
24 Pe yaa ka yiri tɔnmɔkɔɔrɔ tugbɔɔrɔ ni wa Kitimu ca mbe pan.
Ti fɛnnɛ pe yaa ka ya Asiri tara fɛnnɛ pe ni, mbe ya fun Hebɛri setirige piile pe ni.
Ɛɛn fɔ, poro fun pe yaa ka pe tɔngɔ.
25 Ko puŋgo na, a Balaamu wì si yiri ma konɔ li lɛ na sɔngɔrɔ wa wi tara. A Balaki fun wi nɛɛ kee wi tara.
†24:9 24.9: Zhenɛ 12.3; 49.9
†24:17 24.17: Wɔnnɔ na pè para li sɛnrɛ na, lo yɛn na wunluwɔ wogo nari.
†24:17 24.17: Laga ŋga kì yo fɔ mbe Sɛti setirige piile pe ni fuun pe tɔngɔ, wa Moyisi lasiri sɛwɛ ŋa wi yɛn Samari tara fɛnnɛ pe yeri wi ni, kì yɔnlɔgɔ wa ma yo fɔ: Mbe Sɛti setirige piile pe gbɔn wa pe yinrɛ ti na.