2 «Mboro ŋa ma yɛn na kendige woo mi ŋa Yɛnŋɛlɛ na yawa pi ni fuun fɔ na ni, naga yɛn ma, maa jaa mbe kiti kɔn na ni wi le?

Mboro ŋa maa mi ŋa Yɛnŋɛlɛ na jɛrɛgi, ma mbe ya mbe yɔn sogomɔ kan yewige ŋga mì yewe ki na le?»

3 Kona, a Zhɔbu wì si Yawe Yɛnŋɛlɛ li yɔn sogo ma yo fɔ:

4 «Wele, mi woro yaraga ka, mi yaa ma yɔn sogo mbe yo mɛlɛ?

Mi yaa na kɛɛ ki taga wa na yɔn ki na mbe pyeri.

5 Mì para parasaga koŋgbanŋga na makɔ, mi se yɔn sogomɔ kan naa,

ma nuru ma para parasaga shyɛn wogo na, mi se ta taga to na naa.»

7 Kurusijara lɛ maa pɔ wa ma sɛnnɛ paa lenaŋa kotogofɔ yɛn,

mi yaa ma yewe, ma nagawa kan na yeri.

8 Naga yɛn ma, maa jaa na kiti kɔngɔ kila lere kɔɔn shyɛn wi le?

Naga yɛn ma, ma yɛn na jaa mbanla jɛrɛgi mbe tanga kan ma yɛɛ yeri wi le?

9 Naga yɛn ma, ma fanŋga kɛɛ ki yɛn paa mi ŋa Yɛnŋɛlɛ na wogo ki yɛn wi le?

Naga yɛn ma, ma magala li maa yɛnŋɛlɛ gbaanra yinrigi paa mi ŋa Yɛnŋɛlɛ na woro ti yɛn wi le?

10 Na kaa pye pa ki yɛn ma, ma yɛɛ fere wunluwɔ naa gbemɛ ni;

ma gbɔgɔwɔ naa tiyɔnwɔ kan ma yɛɛ yeri!

11 Ma naŋgbanwa gbɔɔ kala li wa leele pe na paa tɔnŋgbɔɔ yɛn,

mbele fuun pe maa pe yɛɛ gbogo, pe wele ma pe tirige!

12 Mbele fuun pe maa pe yɛɛ gbogo, pe wele ma pe go sogo!

Lepeele pe purugu yɔnlɔ nuŋgba!

13 Ki yaga pe ni fuun pe pinlɛ pe tigi wa tara ti nɔgɔ yɔnlɔ nuŋgba,

ma pe yɔn tɔn wa kunwɔ pi kaso wi ni.

14 Pa kona mi jate mi yaa ma shari mbɔɔn sɔn,

katugu ma yɛɛra fanŋga ko kì cew kan ma yeri.

15 Ŋgundurɔ wi wele, mùu da paa yɛgɛ ŋga na mɔ̀ɔ da we;

wi maa yan ki kaa paa nɛgɛ yɛn.

16 Ɛɛn fɔ wi wele, fanŋga yɛn wa wi sɛnnɛ li ni,

fanŋga yɛn wa wi lara kafyoolo pe ni.

17 Wi maa naga ki yirige maga sheli paa sɛdiri tige yɛn,

kapannda nda ti yɛn ma ti yɛɛ faara wa wi jegbɔgɔlɔ ke ni, ti yɛn fanŋga ni.

18 Wi kajeere tì sheli paa tuguyɛnrɛ tugumbogoŋgolo yɛn,

wi kendiŋgaanra ti yɛn paa tugumbiile yɛn.

19 Wi yɛn kafɔnnɔ yaraga yaara nda mi ŋa Yɛnŋɛlɛ mì da ti ni,

mi ŋa wi dafɔ mi nuŋgba mbe ya fanŋga ta wi na.

20 Wi maa wi yaakara ti taa wa yanwira ti na,

wa laga ŋga woŋgaala pe ni fuun pe maa fee na jinrigi.

21 Wi ma saa sinlɛ wa lɔgɔ yɔn tire ti nɔgɔ,

wi ma lara wa gbagara wi sɔgɔwɔ, wa ŋgbɔrɔgɔ tɔnmɔ pi ni.

22 Lɔgɔ yɔn tire ti yinmɛ pi ma tɔn wi na,

yanwira laforo yɔn sɔli tire ti ma pye maa maga.

23 Ali na gbaan wi ka yin yɛgɛ o yɛgɛ, wila la fyɛ wi yɛgɛ,

ali na Zhuridɛn gbaan wi ka yin mbe gbɔn wa wi koŋgo ki na, wi ma cɛn yɛyinŋge na pɔw.

24 Mboo yɛngɛlɛ ke ta ke yɛn ma yɛngɛ, ambɔ wi mbe ya mboo yigi?

Ambɔ wi mbe ya mboo yigi pɛnɛ ni mboo numaga ki furu wanga ni?

25 Naga yɛn ma, ma mbe ya mbe yarifɛlɛgɛ Leviyatan ki yigi njegenɛ ni le?

Ma mbe ya mbege ŋgayinnɛ li pɔ mana ni le?

26 Naga yɛn ma, ma mbe ya mbe mana le ki numaga ki na le?

Ma mbe ya mbege tugbila wi furu wanga ni le?

27 Maa ki jate ki yaa ma yɛnri ŋgbanga mbe yo maga yaga wi le?

Nakoma maa ki jate ki yaa sɛntanra yo ma ni wi le?

28 Ma nawa po ni ki yaa tanwa le ma ni,

mbege yɛɛ pye ma kulo fɔ sanga pyew wi le?

29 Naga yɛn ma, ma yaa la jinrigi ki ni paa sannjɛlɛ yɛn wi le,

nakoma ma yaa ki pɔ mana ni ma sumborombiile paa jinrigi ki ni wi le?

30 Naga yɛn ma, ŋgbanra wɔfɛnnɛ gbogolomɔ pi mbe ya mbege yigi mbaa ki pɛrɛ wi le?

Pe mbe yɛnlɛ mbege kɔɔnlɔ mbege yɛɛlɛ jawo pyefɛnnɛ pe na wi le?

31 Ma mbe ya mbege wɔn wangala ni mbege sɛlɛgɛ ki furugu lagapyew wi le,

nakoma ma mbe ya mbege go ki furu laje ni wi le?

32 Ma kɛɛ ki taga ki na ma wele, na ma kaa ki jate malaga ni,

ŋga ki yaa yiri wa, ma se ka ki shyɛn wogo pye naa.