1 Ee, kaselege yi, ki kagala mì ke ni fuun ke yan yɛnlɛ ni,

mì ke logo ma wali ke na wa na nuŋgbogolo ke ni.

2 Ŋga yè jɛn, mi fun mìgi jɛn;

ye woro ma mbɔnrɔ na na.

3 Ɛɛn fɔ mila jaa mbe para yawa pi ni fuun fɔ wo ni,

mila jaa mbe para mbanla yɛɛ shɔ Yɛnŋɛlɛ lo yɛgɛ na.

4 Yoro wo na, ye yɛn na finlɛlɛ na tɔnni kaselege ki na;

ye yɛn wɛrɛ pyefɛnnɛ mbele pe se ya yaraga ka yɔn.

5 Ndɛɛ ki pye ye ja pyeri yee para,

ko jɛn na pye ye yeri kajɛnmɛ.

6 Ye logo na yeri, mi yaa para mbanla yɛɛ shɔ,

sɛnrɛ nda mi yaa yo wa na yɔn, ye nuŋgbolo jan yeri logo!

7 Naga yɛn ma, ye mbe yɛnlɛ mbe sɛnrɛ mbasinnde yo Yɛnŋɛlɛ li mɛgɛ ni wi le?

Naga yɛn ma, ye mbe ya mbaa yagbogolo finlɛlɛ mbe si yo Yɛnŋɛlɛ lo yaa sari wi le?

8 Yaa ki jate mbe gbogolo Yɛnŋɛlɛ li ni wi le?

Yaa ki jaa mbe para mbeli shɔ wi le?

9 Na Yɛnŋɛlɛ li ka ye sɛgɛsɛgɛ mbe wele, ki mbe yɔn ye na?

Ye se ya mbe Yɛnŋɛlɛ li fanla paa yɛgɛ ŋga na pe ma lere fanla.

10 Ki woro na lere kɔɔn shyɛn, pa li yaa ye jɛrɛgi,

na kaa pye ye yɛn na leele pele mbɔnrɔgi leele pele na larawa we.

11 Naga yɛn ma, li gbɔgɔwɔ pi se ka fyɛrɛ wa ye na wi le?

Naga yɛn ma, ye se kaa fyɛ li yɛgɛ wi le?

12 Ye lelɛɛlɛ sɛnyoro nda yè yo, ti yɛn kayɔngɔ fu paa cɔnrɔ yɛn;

yànla yɔn sogo sɛnrɛ nda ni ti yɛn fanŋga fu paa joro yɛn.

13 Ye pyeri wa, yanla yaga mi yaa para!

Ŋga ki yaa pye na na, ko mbe pye.

14 Mì cɛn kala li ni fuun li cɛnwɛ,

ali mbanla go ki pɛrɛ.

15 Ki ka Yɛnŋɛlɛ li ndanla lilan gbo, jigi tagasaga ka yɛgɛ woro na yeri naa.

Ɛɛn fɔ mi yaa para mbanla yɛɛ shɔ li yɛgɛ na, fɔ na tangalɔmɔ pi yɛn jɛrɛgisaga fu.

16 Na mi ka ko pye ma, ko mbe ya mbanla shɔ;

katugu lere ŋa wila la fyɛ Yɛnŋɛlɛ li yɛgɛ, wi se yɛnlɛ mbe yere li yɛgɛ sɔgɔwɔ.

17 Ye logo na yeri, yanla sɛnrɛ ti logo jɛŋgɛ!

Ye nuŋgbolo jan ye nda mi yaa yo ti logo!

18 Ye wele, mì gbɛgɛlɛ mbege yɛgɛ naga fɔ mi yɛn kaselege ko na;

mìgi jɛn ma yo tanga yɛn na yeri.

19 Ambɔ wila jaa mbe baga na na?

Na ko ka pye, pa mi yaa pyeri mbe ku.

20 Ɛɛn fɔ, Yɛnŋɛlɛ, mila ma yɛnri, maga kagala shyɛn ŋgele ke pye na kan,

kona mi se lara ma na naa.

21 Ma kɛɛ ŋga kila na tege, ki laga na na,

maga ka ti ma fyɛrɛ kagala kaa na sunndo wi kɔɔn naa.

22 Ko puŋgo na, ma para, pa mi yaa ma yɔn sogo,

nakosima mi ka para, mboro mbanla yɔn sogo.

23 Kambasinnde naa puŋguwɔ jori mi pye?

Na puŋgosara naa na kapere ti naga na na!

24 Yiŋgi na, a ma nɛɛ ma yɛɛ lara na na,

nala jate paa ma jugu yɛn?

25 Naga yɛn ma, wɛwaga ŋga tifɛlɛgɛ kìgi lɛ na kee ki ni, ko ma mbe yɛnlɛ mbaa wiin ki ni wi le?

Ma mbe yɛnlɛ mbe taga yan waga na mbaa ki puro le?

26 Ma yɛn na jɔlɔgɔ kaŋgbangala yɔnlɔgi na mɛgɛ ni;

kajɔgɔrɔ nda mì pye na lefɔnrɔ sanga wi ni, màri go kala li wa na.

27 Màla tɔɔrɔ ti le tugurɔn ŋgbɛɛrɛ na,

ma yɛn nala kapyegele ke ni fuun ke kɔrɔsi;

mà kɔngɔlɔ gbɔn na torosara ti na.

28 Ma si yala na yinwege ki yɛn na jogo

paa yɛgɛ ŋga na kambuguwo ma kaa ye tige ni maga fɔngɔ we,

paa yɛgɛ ŋga na yaawere ma kaa ye paara ni mari jɔgɔ we.