13
Izirayɛli woolo pe yɛn
paa kurusijara yɛn ŋa wì fɔngɔ
paa kurusijara yɛn ŋa wì fɔngɔ
1 Yawe Yɛnŋɛlɛ làa para na ni ma yo fɔ: «Kari ma sa kurusijara lɔ, ŋa pè gbegele lɛn jese ni, maa pɔ wa ma sɛnnɛ. Ɛɛn fɔ maga kaa le tɔnmɔ mboo jogo.» 2 Kona, a mì si saa kurusijara wa lɔ ma yala Yawe Yɛnŋɛlɛ li sɛnyoro ti ni na kan, maa pɔ wa na sɛnnɛ.
3 A Yawe Yɛnŋɛlɛ lì si para na ni naa ki shyɛn wogo na, ma yo fɔ: 4 «Kurusijara ŋa mà lɔ maa pɔ wa ma sɛnnɛ, wi lɛ ma kari wi ni wa Efirati gbaan wi kɛɛ yeri, ma saa lara wa waliwege ka ni.» 5 A mì si kari ma saa wi lara wa Efirati gbaan wi tanla, paa yɛgɛ ŋga na Yawe Yɛnŋɛlɛ làa ki yo na kan we.
6 Naa wagati titɔnlɔwɔ wà la kaa toro, a Yawe Yɛnŋɛlɛ lì si para na ni ma yo fɔ: «Yiri ma kari wa Efirati gbaan wi yeri, kurusijara ŋa mìla yo ma sa lara, ma saa lɛ.» 7 A mì si yiri ma kari wa Efirati gbaan wii tanla, mìla kurusijara wi lara laga ŋga na, a mì saa ki jɛrɛgi maa wɔ. Ɛɛn fɔ, a mì sigi yan fɔ kurusijara wì fɔngɔ, wi saa ya yaraga ka yɔn naa.
8 A Yawe Yɛnŋɛlɛ lì si para na ni naa, ma yo fɔ: 9 «Mi ŋa Yawe Yɛnŋɛlɛ, pa mì yo yɛɛn fɔ: ‹Ki pyelɔmɔ nuŋgba pi na, pa mi yaa Zhuda tara woolo pe yɛɛ gbɔgɔwɔ pi kɔ yɛɛn, konaa Zheruzalɛmu ca woolo pe yɛɛ gbɔgɔwɔ ndorogo ki ni. 10 Ki cɛnlɛ woolo tipeele pè je mbanla sɛnrɛ ti logo, poro mbele pe yɛn na tanri pe yɛɛra nawa jatere wi na nuŋgboŋgbanla ni, ma taga yarisunndo ta yɛgɛ na na tunŋgo piin ti kan, konaa na fɔli ti yɛgɛ sɔgɔwɔ nari gbogo. Ki leele pe yaa pye paa ki kurusijara ŋa wi se ya yaraga ka yɔn wi yɛn. 11 Katugu yɛgɛ ŋga na lere maa yɛɛ pɔ kurusijara ni wa wi sɛnnɛ, pa mìla Izirayɛli tara woolo naa Zhuda tara woolo pe ni fuun pe pɔ na yɛɛ na ma. Yawe Yɛnŋɛlɛ lo lì yo ma; jaŋgo pe pye na woolo, mbe ti na mɛgɛ ki yiri, mbe pye na sɔnmɔ pi go konaa na gbɔgɔwɔ yanwa. Ɛɛn fɔ pee logo na yeri.› »
Yɛnŋɛlɛ li naŋgbanwa Izirayɛli
woolo pe ni
woolo pe ni
12 Maga sɛnrɛ nda ti yo pe kan, fɔ Yawe Yɛnŋɛlɛ, Izirayɛli woolo Yɛnŋɛlɛ le, pa lì yo yɛɛn fɔ: «Duvɛn cɔgɔlɔ ke ni fuun ke daga mbe yin duvɛn ni.» Kona pe yaa ma yɔn sogo mbe yo fɔ: «Naga yɛn ma, we sigi jɛn mbe yo fɔ duvɛn cɔgɔlɔ ke daga mbe yin duvɛn ni wi le? 13 Kona ma pe pye ma yo fɔ, pa Yawe Yɛnŋɛlɛ lì yo yɛɛn fɔ: ‹Mi yaa ki tara nda ti woolo pe ni fuun pe kan pe wɔ pe tin; wunlunaŋa ŋa wi yɛn ma cɛn wunluwɔ pi na Davidi wi yɔnlɔ, naa saraga wɔfɛnnɛ pe ni, naa Yɛnŋɛlɛ yɔn sɛnrɛ yofɛnnɛ pe ni, konaa Zheruzalɛmu ca woolo pe ni fuun pe ni, mi yaa pe ni fuun pe kan pe wɔ pe tin fɔ pe yɛgɛ kila kanŋgi. 14 Mi yaa pe gbɔn pe yɛɛ na mbe pe purugu, teele poro naa piile pe ni. Yawe Yɛnŋɛlɛ lo lì yo ma. Mi se ka wa kpɛ yaga, mi se ka pe yinriwɛ ta, wa yuŋgbɔgɔrɔ se kanla ta. Yaraga ka se kanla yɛgɛ kɔn mbe pe tɔngɔ.› »
Yɛrɛwɛ sɛnrɛ sanni ki kala
li sa gbɔn
li sa gbɔn
15 Yaa nuru, ye nuŋgbogolo jan ye logo jɛŋgɛ,
yaga kaa ye yɛɛ nari, katugu Yawe Yɛnŋɛlɛ lo li yɛn na para.
16 Yaa Yawe Yɛnŋɛlɛ, ye Yɛnŋɛlɛ li shari,
sanni li sa diwi wi tirige ye na,
sanni ye ka sa kurugo yanwira ti na yɔnlɔ tosanga diwi wi ni.
Ye yaa kaa yanwa pi yinri pi pan,
ɛɛn fɔ li yaa kaa kanŋga kunwɔ diwi,
li yaa kaa pye diwi wɔlɔ conjonjo.
17 Na yee ki sɛnrɛ nda ti logo,
pa mi yaa sa lara mbe gbele ye yɛɛ gbɔgɔwɔ pi kala na;
mi yaa yanli mbe yɛntunwɔ lɛgɛrɛ wɔ,
katugu pe yaa ka Yawe Yɛnŋɛlɛ li simbaala ŋgbelege† 13.17 Simbaala ŋgbelege, ko kɔrɔ wo yɛn Zheruzalɛmu ca fɛnnɛ wele, pe juguye pe yaa ka pan mbe pe koli mbe kari pe ni kulowo ni. ki yigi mbe kari ki ni.
Sɛnrɛ nda Yɛnŋɛlɛ làa yo
wunlunaŋa wi go woolo pe kan
wunlunaŋa wi go woolo pe kan
18 Maga yo wunlunaŋa wo naa wunlunaŋa nɔ wi kan fɔ:
«Ye tigi ye cɛn tara,
katugu wunluwɔ njala gbɔgɔwɔ wolo na làa pye wa ye go na,
lì kɔw ma to.
19 Negɛvu tara cara ti yeyɔnrɔ tì tɔn,
lere woro wa mbe ya mberi yɛngɛ.
Pè Zhuda tara woolo pe ni fuun pe koli ma kari pe ni kulowo ni,
pè pe ni fuun pe koli ma kari pe ni kulolo.»
Fɛrɛ yaa Zheruzalɛmu
ca woolo pe ta
ca woolo pe ta
20 «Zheruzalɛmu ca, ma yɛgɛ ki yirige ma wele,
ma juguye mbele pè yiri wa yɔnlɔparawa kamɛŋgɛ kɛɛ yeri na paan pe wele!
Simbaŋgbelege ŋga kìla kan ma yeri, ki yɛn se yeri?
Ki simbaŋgbelege ŋga kìla pye na gbɔgɔwɔ kaan ma yeri we.
21 Leele mbele mboro yɛrɛ jate mà pe kara ma pe pye teele,
na paga ka yiri mbe cɛn ma go na, ma yaa yo mɛlɛ san?
Naga yɛn ma, kayaŋga ma ki yaa ka to ma na,
paa yɛgɛ ŋga na jɛlɛ selara ma kaa yiri wi ni wi le?
22 Na maga kɔɔn yɛɛ yewe mbe yo fɔ:
‹Yiŋgi na ki kagala ŋgele ke nɛɛ gbɔɔn na na?›
Ma kapere lɛgɛrɛ to kala na,
pɔ̀ɔn paraga ki yirige ma na ma kari naayeri,
a pè to ma na fanŋga na.
23 «Naga yɛn ma, Etiyopi tara fɛnnɛ woo mbe ya mboo witige cɛnlɔmɔ pi kanŋga wi le?
Nakoma kamɔlɔ wi mbe ya mboo witige yɔɔnrɔ ti kanŋga wi le?
Ayoo. Ki pyelɔmɔ nuŋgba pi na, yoro mbele yè tara kapege pyege ki na,
ye mbe ya mbaa kajɛŋgɛ ko piin mɛlɛ?
24 Mi yaa ka ye jaraga
paa yɛgɛ ŋga na gbinri tifɛlɛgɛ ki ma yan waga ki lɛ maga jaraga we.
25 «Ko ki yɛn ma tasaga ye,
ŋga mì kɔn ma tɛgɛ ma kan we.
Yawe Yɛnŋɛlɛ lo lì yo ma;
katugu mà fɛgɛ na na,
mà saa ma jigi wi taga yarisunndo yagbogolo woro na.
26 Mi yaa ma paraga ki yirige ma na, mbe sa gbɔn fɔ wa ma yɛgɛ sɔgɔwɔ,
jaŋgo pɔɔn fɛrɛ ti yan.
27 Mɔ̀ɔ nandara kapyere ti yan, naa ma naŋgala gbelege ki ni,
naa ma nanjara fɛrɛ woro nda maa piin wa tinndiye pe na konaa wa wasege ki ni ti ni.
Mɔ̀ɔ yarisunndo tijangara ti yan.
E, Zheruzalɛmu, jɔlɔgɔ yɛn ma wogo!
Mboro ŋa mɛɛ ma yɛɛ pye kpoyi, ma yaa koro ma fɔ sa gbɔn wagati wi wiin?»
†13:17 13.17 Simbaala ŋgbelege, ko kɔrɔ wo yɛn Zheruzalɛmu ca fɛnnɛ wele, pe juguye pe yaa ka pan mbe pe koli mbe kari pe ni kulowo ni.