9
Izirayɛli woolo pe yaa ka jaraga
cɛngɛlɛ sanŋgala ke sɔgɔwɔ
cɛngɛlɛ sanŋgala ke sɔgɔwɔ
1 Izirayɛli woolo yaga kaa yɔgɔri dɛ!
Yaga kaa nayinmɛ nii paa tara sannda ti woolo pe yɛn;
katugu ye yɛn na nanjara piin ma je ye Yɛnŋɛlɛ li na.
Ye nanjara sara ŋa ye yɛn na taa wa yarilire sunsara ti ni, wo wi yɛn ma ye ndanla.
2 Ɛɛn fɔ bile ŋa pe ma sun wa yarilire sunsaga ki na,
konaa sinmɛ liwoo mba pe ma wɔ wa sinmɛ wɔsaga ki ni,
ti se ka pye pe woro.
Duvɛn fɔnŋɔ ŋa pe yɛn na singi, wi se pe bɔ.
3 Pe se ka cɛn wa Yawe Yɛnŋɛlɛ li tara ti ni naa.
Efirayimu cɛnlɛ woolo pe yaa ka sɔngɔrɔ wa Ezhipiti tara.
Pe yaa ka saa yaakara nda ti yɛn fyɔngɔ ni ti kaa wa Asiri tara.
4 Duvɛn saraga ŋga pe ma wo pe se ka ka wɔ mi ŋa Yawe Yɛnŋɛlɛ na yeri naa.
Pe saara ti se ka Yɛnŋɛlɛ li ndanla naa.
Pe saara yaakara ti yaa ka pye pe yeri paa kunwɔ suro yɛn.
Mbele fuun ka ta ka, pe yaa cɛn fyɔngɔ ni.
Pe saara yaakara ti yaa pye poro nuŋgba woro.
Pe se ka ye ti ni wa mi ŋa Yawe Yɛnŋɛlɛ na shɛrigo gbɔgɔ ki ni.
5 Yiŋgi ye yaa ka pye shɛrɛgɛ fɛti piligbɔgɔ ki na?
Yiŋgi ye yaa ka pye Yawe Yɛnŋɛlɛ li shɛrɛgɛ fɛti pilige ki na?
6 Ye wele, pe mbele pe yɛn na kee,
katugu pe tara tì jɔgɔ.
Ezhipiti tara to ti yaa pe yaara wɔ.
Ɛɛn fɔ Mɛfisi† 9.6: Ko sanga wo ni, Mɛfisi ca ko kìla pye Ezhipiti tara ti cagbɔgɔ ye. ca ko ki yaa ka pye pe fanra re.
Yanpege ki yaa ka yiri mbe pe warifuwe tiyɔɔn wi tɔn.
Wuuro ti yaa ka fi wa pe paara yinrɛ ti ni mberi tɔn.
7 Yawe Yɛnŋɛlɛ li yaa jɔlɔgɔ wa ye na wagati ŋa ni, wila paan.
Kapere ti sarapilige ki yɛn na paan.
Izirayɛli woolo pe daga mbe ko jɛn.
Ye maa yuun fɔ Yɛnŋɛlɛ yɔn sɛnrɛ yofɔ wi yɛn yarafɔ.
Yɛnŋɛlɛ li yinnɛ li yɛn lere ŋa ni wi yɛn tijinliwɛ fu fɔ.
Ye kambasinnde ti lɛgɛwɛ po pì pan ko ni.
Ye kapere ti lɛgɛwɛ ndorogo ko kì pan ko ni† 9.7: Luki 21.22.
8 Ŋa wi maa Efirayimu cɛnlɛ woolo pe kɔrɔsi,
Yɛnŋɛlɛ yɔn sɛnrɛ yofɔ wowi, wi yɛn Yɛnŋɛlɛ li ni.
Ma si yala, pe yɛn na mɛrɛ jaan wi na wa wi torosaga pyew ki ni mboo yigi.
Pe yɛn na kapege cɛnlɛ pyew ki piin wi na, ali wa wi Yɛnŋɛlɛ li go ki ni.
9 Pè pe yɛɛ kan kapere pyege ki yeri jɛŋgɛ,
paa yɛgɛ ŋga na kìla pye na piin faa wa Gibeya ca we.
Yawe Yɛnŋɛlɛ li jatere wi yaa pye pe kajɔgɔrɔ ti na.
Li yaa jɔlɔgɔ wa pe na pe kapere ti kala na† 9.9: Kiti 19.1-30.
Jɔlɔgɔ yaa to yarisunndo
gbɔgɔfɛnnɛ pe na
gbɔgɔfɛnnɛ pe na
10 Yawe Yɛnŋɛlɛ lì yo fɔ:
«Izirayɛli woolo pe kala làa na ndanla,
paa yɛgɛ ŋga na lere ma ka saa ɛrɛzɛn pire nda tì pe ta yan wa gbinri wi ni.
Mìla ye tɛlɛye pe jate
paa yɛgɛ ŋga na lere ma ka saa figiye pire koŋgbannda nda tì pe ta yan.
Ɛɛn fɔ, naa pàa kaa kari ma saa gbɔn wa Baali Pewɔri laga ki na,
a pè si saa pe yɛɛ kan ki yarisunŋgo tijaanga ki yeri.
Kona, a pè si kanŋga ma pye yaritijangara
paa yarisunŋgo ŋga kì pe ndanla ki yɛn† 9.10: Nɔmbu 25.1-5.
11 Gbɔgɔwɔ mba pi yɛn Efirayimu cɛnlɛ woolo pe yeri, pi yaa kɔ mbe wɔ wa,
paa yɛgɛ ŋga na sannjɛgɛlɛ ma yiri sire na ma kari we.
Pe se ka pyɔ se naa,
jɛlɛ se ka pye kugbɔ ni naa,
jɛlɛ se ka kugbɔ lɛ naa.
12 Ali na pe ka piile ta mbe pe baro,
sanni pe sa lɛ, mi yaa pe gbo pe yeri.
Kaselege ko na, na mi ka ka je pe na,
jɔlɔgɔ yaa pye pe wogo.
13 «Naa mìla Efirayimu cɛnlɛ woolo pe yan sanga ŋa ni, pàa pye ndɛɛ Tiri ca koyi,
ko ŋga ki yɛn ma kan laga tiyɔngɔ na.
Ɛɛn fɔ Efirayimu cɛnlɛ woolo pe yaa ka pe piile pe lɛ mbe kari pe ni wa pe gbofɔ wi yeri.
14 «Ee, Yawe Yɛnŋɛlɛ, yaraga ka kan pe yeri.
Yiŋgi ma yaa si kan pe yeri?
Jɛɛlɛ pe kan jambasere ni,
ma ti pe yinriwɛ pi waga pe na.»
15 Yawe Yɛnŋɛlɛ lì yo naa fɔ:
«Efirayimu cɛnlɛ woolo pe tipewe pi ni fuun pì yiri funwa na wa Giligali ca.
Pa pe kala lìlan mbɛn wa ki laga ki na.
Mi yaa pe purɔ mbe pe yirige wa na go ki ni pe katijangara ti kala na.
Pe se koro mbanla ndanla naa.
Pe teele pe yɛn leele mbele pè yiri ma je.
16 «Efirayimu cɛnlɛ woolo pe wogo kì jɔgɔ.
Pe ndire tì fɔngɔ.
Pe se ka piile ta naa.
Ali paga si piile ta,
mi yaa ki piile mbele pe yɛn ma pe ndanla pe gbo.
17 Na Yɛnŋɛlɛ li yaa ka pe wa,
katugu pee logo li yeri.
Pe yaa kaa yanri la toro faa wa cɛngɛlɛ sanŋgala ke sɔgɔwɔ.»