1 Ma yaakara ti wa wa lɔgɔ tɔnmɔ pi go na,

ki mɔnɔ o mɔnɔ, ma yaa kari ta pilige ka† 11.1: Ki vɛrise ŋa wi kɔrɔ wo yɛn fɔ: Ma yɛɛ le kapyege ka ni, ko puŋgo na, ŋga ki ma ta wa, ma yaa kaga ta..

2 Ma kɛɛ yaara ta kan leele kɔlɔshyɛn, nakoma leele kɔlɔtaanri yeri yɛrɛ,

katugu jɔlɔgɔ ŋga ki yaa to tara ti na, lere si ko jɛn.

3 Na kambaara ti ka yin tɔnmɔ pi ni,

ti ma ti tisaga ki ma pan.

Na tige ki ka to mbe wa yɔnlɔparawa kalige kɛɛ yeri, nakoma mbe wa yɔnlɔparawa kamɛŋgɛ kɛɛ yeri,

kì to laga ŋga na, pa ki yaa koro le ki laga ki na.

4 Lere ŋa kaa tifɛlɛgɛ ki gbɔnlɔmɔ po kɔrɔsi, ko fɔ wo na yariluguro lugu;

lere ŋa ka koro mbaa tisaga kambaara to wele, ko fɔ wo na yarilire kɔn.

5 Yɛgɛ ŋga na mɛɛ tifɛlɛgɛ ki torokonɔ li jɛn,

yɛgɛ ŋga na pyɔ wi wire ti ma gbegele wa wi nɔ lara, ma sigi jɛn,

ki pyelɔmɔ nuŋgba pi na fun, Yɛnŋɛlɛ na li yɛn kagala ke ni fuun ke pyefɔ, ma se ya mbeli kapyegele ke kɔrɔ jɛn.

6 Tɔɔn yariluguro ti nuru pinliwɛ yɔn na,

maga ka wogosaga kan ma yɛɛ yeri yɔnlɔkɔgɔ yɔn na;

katugu nda ti yaa ka yɔn nakoma nda ti yaa ka jɔgɔ, ma sigi jɛn,

na kaa pye ti ni fuun ti yaa ka yɔn, ma sigi jɛn.

7 Yanwa pi yɛn ma yɔn,

sɛnwee wila yɔnlɔ yanwa pi yaan yɛngɛlɛ ni, ko yɛn yaritanga.

8 Na lere ŋa ka yinwetɔnlɔgɔ ta, wi daga mbaa yɔgɔri ki yɛgɛlɛ nuŋgba nuŋgba ke ni fuun ke ni;

ɛɛn fɔ wi daga mbaa nawa tuun ki na fɔ piliye tipeye lɛgɛrɛ yaa ka pan.

Ŋga fuun ki yaa ka pan mbe pye, ko yɛn wagafe.

9 Mboro lefɔnŋɔ, ta yɔgɔri ma lefɔnrɔ sanga wi ni,

maa nayinmɛ nii wa ma kotogo na ma lefɔnrɔ piliye yi ni;

kala o kala kɔɔn ndanla, maa li piin,

ma yɛgɛ ki ka yiri kala o kala na, maa li piin.

Ɛɛn fɔ maga jɛn ma yo fɔ kiti kɔnpilige, Yɛnŋɛlɛ li yaa ka sɔɔn yewe ki kagala ke ni fuun ke ni.

10 Ki kala na, yɛsanga kagala ke wɔ wa ma kotogo na,

kala na li yaa jɔlɔgɔ wa ma wire ti na, mali laga lali ma yɛɛ ni;

katugu lefɔnrɔ sanga wo naa wi fanŋga ki ni fuun ni, wi ma toro fyaw paa lalaaga yɔn yɛn.