51
Ta Pitu Nono La se Babiloni
1 Hiera gua si zama nia e Zihova:
“Dotu, kote va gevuria Rau sa maqomaqona keke tie huhuara
pude huara ia si pa Babiloni meke sari tiena.
2 Na tie karovodi si kote garunu lani Rau pa Babiloni
pude givusu pania si asa guana duduli popana;
kote mae raza ia rini pa doduru vari kalina
koasa nana rane tinasuna.
3 Sa tie gona tupi si mani lopu ṉavea sa nana bokala,
babe va malumia pude va sagei sari nana poko varipera.
Lopu va toa hola ia si keke nana tie varipera;
va eoṉo ia sa nana qeto minate.
4 Kote ta seke gore si arini pa Babiloni,
bakora tata mate koari nana siraṉa.
5 Ura sari Izireli meke Ziuda si lopu ta kiludi
koasa dia Baṉara, e Zihova Tadi na Qeto Minate,
be vea siṉi gua sari sinea pa dia popoa
pa kenuna sa Hopena pa Izireli.
6 Mi govete vura pa Babiloni!
Haqala taloa pude mi toa!
Mi lopu somana tava kilasa koari nana sinea.
Na totoso tubehe te Zihova si hie;
kote poni la nia Sa gua sapu garona sa.
7 Se Babiloni si na kapa qolo pa Limana e Zihova;
sa kapa sapu va napo va viviri ni Sa sari doduruna sa popoa pepeso.
Sari butubutu si napoa sa vaeni Tanisa;
gua ke duviduvili beto si arini.* Rev 17:2-4, 18:3
8 Babiloni si kote hoqa va hodaka nia meke ta huara.
Mi kabo ia gamu sia!
Vagi nia meresena sa sigiti tanisa;
hokara kote boka ta salaṉa nana.
9 Sari tie karovodi si zama, ‘Na podekia gami pude salaṉia se Babiloni,
ba lopu boka ta salaṉa si asa;
ke mada veko pania, mada hopeke la pa nada popoa,
sa vina kilasa tanisa si ululu kamo pa galegalearane,
sage holani sa sari na lei.’* Rev 18:5
10 Sari pa Izireli si zama, ‘E Zihova ele harupu gita meke va kilasi Sa sari nada kana;
mae, mada la tozia pa Zaione
sapu tavetia e Zihova sa nada Tamasa,’ ” gua se Zihova.
11 “Va ṉarui sari mia tupi,
saputu vagi sari mia lave!
Ele va gevuri e Zihova sari na baṉara pa Media,
sina sa Nana hiniva si pude huaria si pa Babiloni.
Kote tubehe hobena se Zihova,
koarini pu mae huaria sa Nana Zelepade.
12 Va sage ia sa pitipiti pa kapagoba pa Babiloni!
Va ṉiṉira i sari tie kopu,
meke va turu i sari tie varipera,
mamu va nama pude rapata!”
E Zihova kote va gorevura ia sa Nana hiniva,
sa Nana vina turu pude va kilasi sari tie Babiloni.
13 Agoi pu soku nigo na ovuku,
meke gavoro va soku tinagotago,
sa vina betona sa mua totoso si ele kamo,
sa mua totoso pude ta kumata palae.* Rev 17:1
14 E Zihova Tadi na Qeto Minate si ele tokotokoro pa Pozana telena:
“Kote va siṉi nigo tie Arau, guana rovana kupokupo,
meke kote iraṉa nigo rini totoso tava kilasa si goi.”
15 Sa popoa pepeso si tavetia Sa pa Nana ṉiniraṉira;
va podakia Sa sa kasia popoa pa Nana ginilagilana lohina
meke repahia Sa sa galegalearane pa Nana binokaboka.
16 Pana zama Sa pa paka maṉauru, sari kolo pa galegalearane si kurumu;
va ale sagei Sa pa hukihukiri popoa pepeso sari na lei.
Garuni Sa sari na kapi turaṉae na ruku
meke garunia Sa sa givusu guana maena pa Nana lose va naqinaqiti givusu.
17 Doduru tie si pupuhu meke loketoṉa tumae nia;
doduru tie tavetavete pa qolo si kurekure ni sari dia beku.
Sari nana kineha si na kokohadi;
na lopu boka siṉo si arini.
18 Na loke laedi si arini, na tiṉitoṉa variva hegeredi;
pana kamo sa dia totoso vinaripitui, doduru arini si kote ta huara palae.
19 Ba sa Tamasa tadigita pa tutina e Zekopi si lopu gugua arini,
ura Asa taveti sari doduru tiṉitoṉa,
turaṉae tugo se Izireli, sa butubutu sapu tago ia Sa,
e Zihova Tadi na Qeto Minate sa Pozana Sa.
20 “Agoi Babiloni sa Qua karamaho meke vedara,
sari Qua tiṉitoṉa varipera,
tavetavete nigo Rau pude huari sari na butubutu,
tavetavete nigo Rau pude huari sari na binaṉara,
21 tavetavete nigo Rau pude ilasi sari hose meke sa tie koina,
tavetavete nigo Rau pude ilasi sari totopili varipera meke tie kalaha,
22 tavetavete nigo Rau pude ilasi sari tie meke barikaleqe,
tavetavete nigo Rau pude ilasi sari barogoso meke tie vaqura,
tavetavete nigo Rau pude ilasi sari koreo vaqura meke vineki vaqura,
23 tavetavete nigo Rau pude ilasi sari sepati meke sipi,
tavetavete nigo Rau pude ilasi sari tie uma meke tie kopu bulumakao,
tavetavete nigo Rau pude ilasi sari qavuna meke sari koimata.”
Sa Vina Kilasa te Babiloni
24 “Pa kenumia gamu na tie Izireli si kote tubehia Rau se Babiloni meke sari doduru pu koa pa Babiloni koari doduru sinea sapu taveti rini pa Zaione,” zama vura gua se Zihova.
25 “Arau kana igo si agoi, na toqere huhuaramu,
agoi pu huaria sa doduruna sa kasia popoa,”
zama vura gua se Zihova.
“Kote va sage atu nia Arau sa Limaqu koa goi,
pude topili gore nigo pa tabahoara,
meke va evaṉae nigo na toqere ta suluna.
26 Loke patu si kote ta vagi koa goi pude tavete vetu,
loke patu pude sokirae nia sa vetu,
ura agoi si kote koa ta huaramu ninae rane ka rane,”
zama vura gua se Zihova.
27 “Va sagea sa pitipiti koasa popoa!
Ivu ia sa buki koari na butubutu!
Va namai sari na butubutu pude la rapatia si asa;
tioko mae ni sari binaṉara hire:
pa Ararati, Mini, meke pa Asikenazi.
Vizatia si keke koimata pude turaṉi,
va kamo maei sari hose sapu soku guana kupokupo.
28 Va namai sari na butubutu pude la raza ia si asa,
sari baṉara pa Media,
sari nana qavuna meke doduru nana koimata,
meke sari doduru dia popoa pu baṉara ni rini.
29 Sa pepeso si niu meke ziziziri lamae,
ura sa Nana hiniva e Zihova koe Babiloni si kote va gorevura ia Sa,
pude huara inete ia Sa sa popoa Babiloni
pude loke tie si kaqu koa vasina.
30 Sari na varane te Babiloni si ele noso varipera;
koa eko dia mo pa korapa popoa ta gobadi.
Ele loke dia ṉiniraṉira si koa;
ele guana barikaleqe mo si arini kamahire.
Sari nana vetuvetu si ta sulu;
meke sari roto pa sasada si ta huara.
31 Paleke vari karovo nia mo rini sa inavoso,
keke tie paleke inavoso karovo la pa keke pule, gua
pude tozi kamo la nia koasa baṉara pa Babiloni
sapu sa nana vasileana lavata si ele ta vagi.
32 Sari karokarovoana koari na ovuku si ta tuqe vagi,
sari zemizemi si ta sulu
meke sari tie varipera si holoqoru.”
33 Hiera gua si zama nia e Zihova Tadi na Qeto Minate, sa Tamasa pa Izireli:
“Sa vasileana Babiloni si guana vasina pude neti vari paqaha kiko huiti koari na qaqalotodi;
sa totoso pude ta pakete vagi si asa si tata kamo.”
34 Ele sekea sa baṉara pa Babiloni sa popoa Zerusalema meke zalo ia sa si asa,
va nunala pania sa,
va paho ia sa sa vasileana lavata guana zagi.
Kekeṉoṉo gua na noki lavata sapu onolo toaia sa si asa,
meke vagi sa gua sapu hivani sa
meke gona pani sa sari doduru pule.
35 Madi zama guahe sari na tinoni pa Zaione, “Mani ta evaṉa koa ri pa Babiloni sari doduru kinaleadi gua pu tavete maeni rini koa gita!”
Madi zama guahe sari na tinoni pa Zerusalema, “Mani ta tubehe nia Babiloni sari kinaleadi saripu tavete mae ni rini koa gita,” gua.
Kaqu Toka nia Zihova se Izireli
36 Meke hiera gua si zama nia e Zihova koa ri na tinoni pa Zerusalema,
“Dotu, Arau kaqu tuqe vagia sa mia tinasuna
meke kaqu tavete la nia koa rina mia kana gua sapu tavete atu nia rini koa gamu.
Kaqu va popa ia Rau sa bukaha kolo tadi pa Babiloni
meke va popai sari na nana ovuku.
37 Sa popoa sana si kaqu ta evaṉae keke vinarigarae remoremo mo,
vasina kaqu koa sari na kurukuru ṉame pinomodi.
Kaqu ta evaṉae keke vasina variva hodahodakana si asa,
meke loke tie si kaqu koa vasina,
meke arini pu dogoria si asa si kaqu gagaemana nia.
38 Sari doduru tie Babiloni si kurumu guana laione
meke kabo guana tuna laione.
39 Vegua, puhi si arini? Kaqu va namanama poni ni Rau si keke inevaṉa
meke va naponapoi meke va qetuqetui si arini.
Kaqu puta si arini meke lopu kaqu vaṉunu pule hokara.
40 Kaqu turaṉa vagi Rau si arini pude tava mate, guana lami, qoti, meke na sipi kokoreo,” Arau, Zihova, ele zama nia si hie.
Sa Tinasuna te Babiloni
41 Zama nia e Zihova sa guguana Babiloni, “Sa vasileana lavata sapu vahesia sa doduruna sa kasia popoa si ele ta tuqe vagi! Ve toleṉe gua variva matamatagutuna gua sa dinoṉona Babiloni koa rina butubutu pa kasia popoa! 42 Puzaka tamunia na bogusu si pa Babiloni meke nobi tamunia na tovovo ovaṉana. 43 Variva matamatagutu dinoṉodi sari na vasileana nomadi meke kekeṉoṉo guana qega loke kolona, vasina pu loke tie koa ia babe ene la ia. 44 Kaqu va kilasia Rau se Belo, sa tamasa pa Babiloni, meke vata evaṉae nia koa sa pude lua vura ni sari na tiṉitoṉa pu onoli sa, meke lopu kaqu vahesi pulea ri na butubutu si asa.
Ele hoqa sa gobana Babiloni. 45 Gamu na tinoni Izireli, mi govete taloa vasina! Mi tuturei govete taloa nia sa Qua tinaṉaziri. 46 Mi lopu malohoro babe matagutu sina koa gua koa sa inavoso sapu avosia gamu. Hopeke vuaheni si keke votiki inavoso si ta urahae na inavoso vinaripera koa sa popoa meke keke baṉara si raza ia si keke votiki baṉara. 47 Gua asa ke korapa mae sa totoso pana kaqu va kilasi Rau sari na beku pa Babiloni. Kaqu tava kurekure sa doduruna sa popoa, meke kaqu tava mate sari doduru nana tinoni. 48 Sari doduru tie pa pepeso meke pa maṉauru si kote kukili qetuqetu pana hoqa se Babiloni. Ura sari na tinoni pu mae guadi pa kali gede si mae pude razaia na huaria si asa.* Rev 18:20 49 Babiloni evaṉia sa minate tadi na tie pa doduruna sa kasia popoa, meke kamahire Babiloni si kaqu hoqa sina evaṉia sa sa minate tadi soku tie Izireli. Arau, Zihova, ele zama nia si hie.”* Rev 18:24
Sa Inavoso te Tamasa koari na Tie Izireli pa Babiloni
50 Zama la se Zihova koa rina Nana tinoni Izireli pa Babiloni, “Ele govete nia gamu sa minate! Ego mi taloa kamahire! Lopu aqa! Koa va seu pa mia popoa si gamu, ba mi balabala Au si Arau, sa mia Tamasa, mamu balabala ia tugo si pa Zerusalema. 51 Zama si gamu, ‘Ele tava gore hokara si gami, meke tava kurekure; va nonoga ia gami sapu lopu ta tokae hokara si gami sina sari na tie karovodi si ele nuquru lai sari vasina hopena koa sa Zelepade,’ gua. 52 Ke gua asa, zama si Arau sapu korapa mae sa totoso pana kaqu va kilasi Rau sari na beku Babiloni, meke sari na tie bakoradi si kaqu hilala pa doduruna sa popoa. 53 Be guana boka kamo sage la pa galegalearane se Babiloni meke tavetia si keke goba ṉiṉirana vasina, ba kaqu garuni tugo Rau sari na tinoni pude huaria si asa. Arau, Zihova, ele zama nia si hie.”
Kaiqa Tinahuara Pule pa Babiloni
54 Zama se Zihova,
“Mi va avosia sa mamalaiṉi kinabo pa Babiloni,
kuliusu nia sa sa tina huara nomana koasa popoa.
55 Arau huaria si pa Babiloni
meke va mokomokoa si asa.
Sari na qeto minate varipera si nuquru zukuru nono la
guana puzaka tovovo meke rapata pa vinevehe kinukili.
56 Mae si arini pude zaloa si pa Babiloni gua;
ta saputu vagi sari nana tie varipera,
meke ele ta moku sari nana bokala.
Arau si keke Tamasa sapu va kilasia sa kinaleana
meke kaqu va kilasia Rau si pa Babiloni gua sapu pada koari dia tinavete kaleadi.
57 Kaqu va naponapoi Rau sari na dia palabatu arileadi sari na dia tie tumatumaedi, sari na koimata, meke sari na tie varipera.
Kaqu puta si arini meke lopu kaqu vaṉunu pule hokara.
Arau sa Baṉara si ele zama, sapu Arau, se Zihova Tadi na Qeto Minate si ele zama.”
58 Hiera gua pule si zama nia e Zihova tadi na Qeto Minate,
“Sa goba ṉiṉirana pa Babiloni si kaqu ta gona gorei pa pepeso,
meke kaqu ta sulu sari na sasada ululudi tanisa.
Sa tinavete tadi na butubutu si namu loke laedi hokara,
ta sulu palae sari dia tinavete ṉiṉiradi,” gua si Asa.
Sa Inavoso te Zeremaea si Ta Garunu La pa Babiloni
59 Sa tie sapu luli meke kopu nia sa inene tanisa baṉara Zedekaea si e Seraea, sa tuna koreo e Neraea meke na tuna sa tuna koreo e Maseia. Koa sa vina made vuaheni sipu koa baṉara pa Ziuda se Zedekaea, si la pa Babiloni se Seraea luli koa sa baṉara, meke vala i rau koa sa si kaiqa vina balau. 60 Kuberia rau pa keke pepa ta viqusuna sa guguadi ri doduru tina huara saripu kaqu ta evaṉa pa Babiloni, gua tugo sari doduru tiṉitoṉa gua hire pa guguana Babiloni. 61 Tozi nia rau se Seraea, “Pana la kamo si goi pa Babiloni si mamu tiro va ululae lani koa rina tinoni sari doduru tiṉitoṉa pu ta kubere pa korapana. 62 Mamu varavara guahe, ‘Zihova, ele zama nia Goi sapu kaqu huaria Goi sa vasina hie, gua sapu loke tie babe na kurukuru ṉame, si kaqu koa vasina. Kote koa gua mo na qega ninae rane.’ 63 Seraea, pana ele beto tiroa goi sa pepa hie koa rina tinoni, si mamu pusi nia patu, mamu gona lania pa korapa Ovuku Iuparetisi.* Rev 18:21 64 Mamu zama, ‘Gua hie si kaqu ta evaṉa pa Babiloni. Kaqu lodu si asa meke lopu kaqu vura pule hokara, sina koa gua koa sa tinahuara sapu kaqu va mae ia e Zihova koa sa.’ ”
Sari na zinama te Zeremaea si hokoto tani.