14
Tinioko koe Izireli Pude Kekere Pule La koe Zihova
1 Kei Izireli, mu kekere pule la koe Zihova sa mua Tamasa.
Sari mua sinea mo va hoqa igo si agoi!
2 Vagi sari mua zinama
mamu kekere pule la koe Zihova.
Mamu zama la guahe koa Sa:
“Mu taleoso ni sari doduru mami sinea
Mamu vagi puleni gami pa korapana sa Mua tataru,
pude boka vukivukihini gami sari vua pa beru mami.
3 Lopu boka harupu gami Asiria si gami;
lopu kote koi hose varipera si gami,
lopu kote zama pule guahe si gami, ‘Mami tamasa,’ gua,
koa sa pu ta tavete pa lima mami telemami,
ura koa Goi si ta tatarue sa koburu eapana.”
Va Tatara nia Tamasa sa Tinoa Vaqura te Izireli
4 Zama se Zihova, “Kote salaṉia Rau sa dia hahanana sineke tinarae
meke tataru mokani,
ura sa Qua binugoro si ele taliri va seu koa rini.
5 Kote guana puni si Arau koe Izireli;
kote toa va leana guana havoro lili si asa.
Guana huda sida pa Lebanoni
si kote va nabu gore i sa sari karosona;
6 sari liho vaqura tanisa si kote toqolo.
Sa tinolava tanisa si kote guana huda olive,
sa humaṉa lea tanisa si kote guana huda sida pa Lebanoni.
7 Sari tie si kote la koa pule pa kauruna sa nana aqoro.
Kote toa va leana guana kiko ta letena.
Kote vuvua guana huda vaeni,
meke kote ta avosae hola si asa guana napo vaeni pa Lebanoni.
8 Kei Iparemi, loketoṉa Qua ginugua si Arau koari na beku.
Kote olaṉigo Rau si agoi meke kopu nigo.
Arau si guana huda paeni sapu koa buma eko mo;
sari doduru mua vuvua si mae guadi koa Rau.”
Vina Betobeto
9 Esei si gilagilana? Kote tumae ni sa sari tiṉitoṉa hire.
Esei si dodogorae? Kote va bakali sa.
Sari siraṉa te Zihova si toṉotodi;
sari tie toṉoto si ene luli koa rini,
ba sari pu seke tinarae si ta tubarae meke hoqani vasina.