15
Maote tebe-tebe fo tao tamba matetea hatahori laen nara nemeheheren
1 Dadi ita fo nemeheheren matea muste no dale loak fo tulu-fali hatahorir fo nemeheheren bei ta ratea rai sira lelemba beran dale. Ta malole mete ma ita tao tamahoko kada ita aon mesa kana. 2 Talo ia: ita esa-esak muste taote tebe-tebe fo tao hata fo neulauk soa-neu ita toranoo saranin nara, mita fo nemeheheren nara boe ratea. No dalak naa, ara dadi ramahoko ro ita. 3 Yesus Karistus mesa kana ta naue-osa fo tao namahoko kada Ndia dale heli-helin, tehuu Ana oo nau tao namahoko Manetualain dalen boe. Naa, sama leo neni surak memak nai Manetualain Susura Malalaon ena laꞌe-neu hata fo Yesus kokolak mbali Manetualain nae,
“Sira nekedadaen soa-neu O,
tuda laꞌe-ndaa Au boe.”✡ Sosoda Kokoa-kikiok kara 69:8
4 Basa hata fo hatahorir surak lele uluk nai Manetualain Susura Malalaon, neni surak fo ranori ita. Ana natudu eno-dalak fo tao ita dadi barakai lenak, takatataka lenak bali, ma Ndia Dedeꞌa-kokolan oo fee ita nembembena aok boe. No dalak naa, ita bisa tahani fo nau mete-tita Manetualain natudu Ndia dale susuen neu ita.
5 Manetualain ndia tao barakai hatahorir fo ara bisa rakatataka. Ma Ana ndia fee neteteak neu ita dalen. Au hule-haradoi fo oke Ana natudu eno-dalak fo ei leo-laꞌo no dalek esa, tungga Yesus Karistus hihii-nanaun. 6 Mete ma ei dalek esa talo naa, ei bisa sama-sama soꞌuk kokoa-kikiok soa-neu Manetualain. Ndia naa, ita Lamatuan Yesus Karistus Aman.
Manetualain Hara Lii Malolen soa-neu hatahori Yahudi ma hatahori ta Yahudi
7 Dadi ei basa ngga muste esa simbok esa sama leo Karistus simbok ei. Mete ma ei leo-laꞌo talo naa, neu ko hatahorir rakadedemak Manetualain naden. 8 Au afada talo ia: Karistus tao aon nok bali hatahori neondak soa-neu hatahori Yahudir fo ara tao ratetu basa hata fo Manetualain helu-bartaa nae taon soa-neu sira bei-baꞌin nara ena. No dalak naa, Ana tulu-fali hatahori Yahudir fo bubuluk rae, Manetualain kokolak tetebes. 9 Huu naa de basa hatahori nusa-nusak laen fo hatahori ta Yahudir soꞌuk kokoa-kikiok soa-neu Manetualain. Huu ara bubuluk rae, Ana nameda kasian soa-neu ita basa ngga. Naa, sama leo lele uluk Dauk surak nai Susura Malalaok dale nae,
“Huu naa de au nau akadedemak O nadem,
nai hatahori nusa-nusak laen nara matan.
Au nau soda sosoda kokoa-kikiok laꞌe-neu O
nai hatahori nusa laen nara matan.”✡ 2 Semuel 22:50; Sosoda Kokoa-kikiok kara 18:50
10 Numa mamanak laen nai Susura Malalaok neni surak nae,
“Woi! Ei hatahori deak numa mamanak laen nara mai.
Tao ei dalem mara mbena sau-sau,
sama-sama mia Lamatuak hatahori heli-helin nara.”✡ Tui Seluk laꞌe-neu Dala Masodak 32:43
11 Dauk surak numa mamanak laen nai Susura Malalaok nae,
“Ei manuma hatahori nusa-nusak laen nara mai,
makadedemak Lamatuak, huu Ndia ta neni babanggak,
de basa hatahorir tungga koa-kio neu ita Lamatuan.”✡ Sosoda Kokoa-kikiok kara 117:1
12 Baꞌi Yesaya surak numa mamanak laen nai Susura Malalaok nae,
Numa Isai anan mane Dauk,
neu ko ndia tititi-nonosin esa kalua mai.
Neu ko Ana ndia toꞌu parenda soa-neu hatahori nusa-nusak laen nara.
Ara bubuluk ena Ana nae mai.
Boe ma ara rahani a neun,
huu ara ramahena neun.”✡ Yesaya 11:10
13 Manetualain dadi okak numa basa hata fo ita tamahenak mai. Mete ma ei mamahere neun, na, Ana ndia tao nala ei dalem mara ramahoko ma lino-lendek. Elan fo Manetualain Dula-dale Malalaon koasan tao nala ei tamba mamahere tebe-tebe laꞌe-neu hata fo Ana nau taok.
Lamatuak nadenu Paulus fo laꞌok neu tui-bengga Ndia Hara Lii Malolen
14 Toranoo nggara ein! Au amahere tebe-tebe ena ae, ei dalem mara sofek no hata fo neulauk kara ena, ei bubuluk noꞌun seli ena, ma ei bisa esa nanori-nafada esa. 15 Au surak no ledo-ledon talo ia nai susurak ia fo fee nesenedak laꞌe esa bali soa-neu ei, laꞌe-neu dedeꞌak mata-matak kara. Au surak talo ia, nahuu Manetualain natudu Ndia dale susuen neu au, 16 neu Ana soꞌuk nala au fo dadi uu Yesus Karistus nedenun, fo muste uu tui-bengga Manetualain Hara Lii Malolen soa-neu hatahori nusak ta Yahudir. Au akalalaꞌok au ueng naa, sama leo malangga anggama fo nau tao sadia hatahori noꞌuk kara dadi leo tunu-hotuk esa fo tao namahoko Manetualain dalen. Manetualain Dula-dale Malalaon ndia tao nala sara dadi reu lolo-laok, fo Manetualain bisa simbok kasa.
17 No au akaesa ua Yesus Karistus, huu naa de au bisa soꞌuk au matang nai Manetualain matan. 18 Au kokolak afada kada Karistus tataon a mesan, ma talo bee de, Ana pake au. Au ta ambarani kokolak dedeꞌak laen. Hatematak ia hambu hatahori ta Yahudir ramanene neu Karistus, nahuu Manetualain pake au fo atudu eno-dalak pake au kokolang ma au leleo-lalaꞌong. 19 Karistus fee au koasa numa Manetualain Dula-dalen mai ena, mita fo au bisa tao tanda heran mata-matak kara. Ana fee koasa neu au fo atudu ae, Karistus naa, see. No dalak naa, au afada hatahorir rai bee a mesan ena, basa-basan laꞌe-neu Karistus Hara Lii Malolen. Huu naa de au afada numa kota Yerusalem mai, ndule basan losa dae Ilirikum deka no Italia. 20 Numa lele uluk mai, au duꞌa hambu ae, “Au daleng hii nalan seli nau afada laꞌe-neu Karistus soa-neu hatahorir, fo bei ta ramanene rita Ndia Hara Lii Malolen!” Te au ta hii fee nenorik nai mamanak fo hatahori laen nara fee nenorik ena na. 21 Nai Manetualain Susura Malalaon dale neni surak nae,
“Hatahori nusa-nusak fo bei ta ramanene rita laꞌe-neu Lamatuak,
sira naar, ndia neu ko mete-ritan.
Hatahori fo bei ta ramanene hata esa boe na,
sira naar, ndia neu ko bubuluk laꞌe-neu Ndia.”✡ Yesaya 52:15
Paulus ator nanaen fo nae neni kota Roma neu
22 No au ueng talo naa, huu naa de au bei ta dadi uu tiro-dangga ei.✡ Roma 1:13 23 Tehuu hatematak ia au ueng manai ia basan ena. Doon seli losa teu-teuk kara ena, au daleng hii nalan seli fo ae uu tiro-dangga ei. 24 Mete ma au uni nusa Sapanyol uu, dei fo au tuli uu tiro-dangga ei. Mete ma au tuli taak nai ei ena, na, ei oo bisa sou au mia doi dalak uni Sapanyol uu boe.
25 Tehuu hatematak ia au ae uni Yerusalem uu dei, fo aono-lalau Lamatuak hatahori kamaheren nara marai naa. 26 Huu ita toranoon nara marai profensi Makedonia ma profensi Akaya, fee doi kolete ena, fo tulu-fali hatahori kasian nara fo mana ramahere neu Karistus nai Yerusalem.✡ 1 Korentus 16:1-4 27 Ara nau tao talo naa, nahuu rameda rahuta soa-neu ita toranoon nara marai Yerusalem. Huu hatahorir maruma nusa-nusak laen marai bee a mesan oo simbok hata fo neulauk ena fo Manetualain Dula-dalen feen nakahuluk kana soa-neu hatahori Yahudir boe. Dadi nandaa mete ma hatahori saranik ta Yahudir nau pake sira hata-heton fo doi-sou sira toranoon hatahori Yahudir.✡ 1 Korentus 9:11
28 Dadi mete ma au tao akababasak ues ia ena, fo fee doi-souk ia neu ita toranoon nara marai Yerusalem, au ae tuli fo tiro-dangga ei, neu au laꞌo uni Sapanyol uu. 29 Mete ma au neti, neu ko au nau uni babaꞌe-babatik noꞌun seli numa Karistus mai.
30 Toranoo nggara ein! No Yesus Karistus dadi neu ei Lamatuam, ma Manetualain Dula-dalen tao nala ei esa sue esa, huu naa de au oke fo ei hule-haradoi tebe-tebe fo Manetualain tulu-fali au. 31 Moke-hule fo Manetualain nanea au nai profensi Yudea, fo hatahori fo ta mana nau namahere neu Manetualain, boso tao manggarauk neu au. Ma moke-hule fo mete ma au uu aono-lalau hatahori saranik kara marai Yerusalem, na, ara simbok au no malole. 32 Mete ma Manetualain nau, na, au bisa mai tiro-dangga ei no dale nemehokok. Au nau hahae aong faa nai ei naa. 33 Au hule-haradoi fo oke Manetualain sama-sama no ei. Ana ndia bisa tao nala hatahori leo-laꞌo no mole-damek. Tebe!