48
Yakob hule ua-naleꞌ fee Yusuf anan, Efraim no Manase
1 Ta doo bea boeꞌ te, lahenda mai rafada Yusuf rae, papa na hedi beraꞌ so. De ana no anan dua si, Manase no Efraim, fo reu dama baꞌin Yakob. 2 Yakob namanene Yusuf asa mai so, boe ma ana laꞌa ao na fo natuuꞌ neuꞌ koi lain.
3 Boe ma ana nafada Yusuf nae, “Ana Usu, e! Faiꞌ naa ra Manetualain fo Manakuasa Kahereꞌ Nan Seli, natudu Ao na neuꞌ au so, nai koro Lus nai dae Kanaꞌan. Nai naa Ana helu au. 4 Ana dedea nae, ‘Neuꞌ ko Au fee o upu-ana mara tamba dodouꞌ, ela o tititi-nonosim dadi reuꞌ lahenda nusa bauinaꞌ. Neuꞌ ko Au boe fee nusaꞌ ia neuꞌ o tititi-nonosi mara, fo dadi neuꞌ sira posakan losaꞌ dae-bafoꞌ a noe.’
5 Besaꞌ ia, o anam Efraim no Manase, sira hak na leo iaꞌ: au leo Masir mai, te boki sira dua so. Leo mae leoꞌ na boe, besaꞌ ia au tao dua si sama leoꞌ au ana boki kara, leoꞌ Ruben no Simeon. 6 Tehuu maneniko o boki seluꞌ, sona ria nana o anam. Au ta tao si reuꞌ ana ki soꞌ. Ela sira dei sipo posakaꞌ neme sira aꞌan Efraim no Manase mai. 7 Au tao leo naꞌ, fo afarene o mamam Rahel. Tepoꞌ fo ami fali meme Mesopotamia mai leo Kanaꞌan meu, losa eno taladaꞌ naneneaꞌ koroꞌ Efrata nai dae Kanaꞌan, boe ma o mama ma boki de maten. Tepoꞌ ria, au susa an seli! Boe ma au atoi ni nai enoꞌ fo leo koro Efrata neu a, suu na.” (Besaꞌ ia ara fee koroꞌ ria nade, Betlehem.)
8-10 Yakob* Susura Makamoiꞌ dedea Ibrani nae, “Israel”. dedea basa de botiꞌ laka na, boe ma nita Yusuf ana nara rai na. Basa de ana natane Yusuf nae, “Ae! Bea ana ni ia ra?
Yusuf nataa nae, “Ia ra nana anaꞌ fo Manetualain fee au nai Masir ia.”
Basa boe ma Yakob dedea nae, “Maneniko leoꞌ na, sona mo si mai raneneaꞌ ro au, fo au hule-haradoi neuꞌ Manetualain ela fee si ua-naleꞌ.” Yakob namalasi so, ma mata nara rasasapu so. Huu ria na, de ana ta bisa nita dae, matetuꞌ soꞌ. Boe ma Yusuf no ana nara reu raneneaꞌ ro Yakob, fo ana holu si ma deꞌi. 11 Basa boe ma ana dedea no Yusuf nae, “Doo-naru basa ia, au afi ae bate ta aneta o, o soꞌ. Tehuu besaꞌ ia, Manetualain tao lena ria bali, losaꞌ au bei bisa ita o ana mara.”
12 Basa de Yusuf naheoꞌ heni ana nara reme Yakob mai,† Susura Makamoiꞌ dedea Ibrani nae, “Yusuf naheoꞌ ana nara reme Yakob lela na mai.” boe ma ana sundaꞌ undulaka na, ma mata-idun neta dae a, nai papa na matan. 13 Basa de Yusuf foa. Boe ma ana fee ana nara rapadeiꞌ raneneaꞌ ro papa na. Ana fee ana uluꞌ a, Manase, napadei neuꞌ Yakob boboa ona na; ma fadiꞌ a, Efraim neuꞌ Yakob boboa ii na. 14 Yakob sakaꞌ fua lima na fo hule fee dua si ua-naleꞌ, te ana narali na lima ona na fuan neuꞌ Efraim, fadiꞌ a laka na, ma ana fua lima ii na neuꞌ Manase aꞌa a, laka na. 15 Boe ma ana hule-haradoi fo ela Manetualain fee Yusuf ua-naleꞌ nae,
“O baꞌim Isak papan Abraham,
ma o baꞌi bokim Isak,
sira dua tuka raroo Manetualain hihii-nanaun.
Manetualain boe naboi-nasamao au so, eme muri ana ka mai losaꞌ besaꞌ ia.
16 Ana poꞌi-tata na au eme basa soe rupaꞌ ara mai.‡ Susura Makamoiꞌ dedea Ibrani nae, “Au hule fo Manetualain eilaꞌo-limalopen nemeꞌ nusatetu-ikutemaꞌ a mai, poꞌi-tata naa au emeꞌ basa soe rupaꞌ ara.” Tehuu lahenda malelaꞌ Susura Makamoiꞌ ruma rae, nai lalaneꞌ ia Manetualain natudu Ao Na, tepoꞌ fo Ana pake eilaꞌo-limalopen neme nusatetu-ikutemaꞌ a mai, fo poꞌi-tata naa Yakob neme soe rupaꞌ ara mai. Meten nai Tutui Masososaꞌ 16:7; 21:17; 22:11, 15.
De au hule boe, fo Ana fee ua-naleꞌ neuꞌ anaꞌ ia ra ma tititi-nonosi nara.
Boe ma maneniko ara hule-haradoi neuꞌ Manetualain,
ara ta rafarene henin baꞌi Abraham, baꞌi Isak, ma au nade ka.
Ela leoꞌ bea na sira tititi-nonosin tamba dodouꞌ,
fo dadi lahenda nusa bauinaꞌ nai dae-bafoꞌ ia.”
17 Tehuu Yusuf nita papa na fua lima ona na neuꞌ Efraim fadiꞌ a laka na, de ana narali papa na lima na, fo fuan neuꞌ Manase aꞌa a laka na. 18 Ana nafada papa na nae, “Papa, e! Bosoꞌ tao leo naꞌ. Te Efraim nana fadiꞌ ria. Uluꞌ a ta ria fa. Papa ka muste fua lima ona ma neuꞌ Manase, aꞌa a laka na. Huu fo ana uluꞌ a hak na ria.”
19 Tehuu papan Yakob ta nau fa. Ana nae, “Ana on, e! Tebe au bubuluꞌ! Tehuu neuꞌ ko Manase dadi kahereꞌ, ma ria tititi-nonosin tamba dodouꞌ losaꞌ dadi lahenda nusa bauinaꞌ. Tehuu fadin Efraim neuꞌ ko kahereꞌ lena neme ria mai. Ma ria tititi-nonosin, neuꞌ ko dodouꞌ raan seli losaꞌ ara dadi lahenda nusa kahereꞌ dodouꞌ.”
20 Basa boe ma ana nafada ana sira dua nae, “Maneniko lahenda Israel hule Manetualain fee lahenda ua-naleꞌ, sira boe seseiꞌ emi dua nade mara. Neuꞌ ko ara hule rae, ‘Ela leoꞌ bea na Manetualain fee o ua-naleꞌ, sama leoꞌ Ana fee ua-naleꞌ neuꞌ Efraim no Manase.’ ”
No ria na, Yakob boe seseiꞌ nauluꞌ Efraim fadiꞌ a nade na, besaꞌ ko Manase, aꞌa a nade na.
21 Basa boe ma Yakob nafada Yusuf nae, “Ana ki on, e! Ta doo a soꞌ, te au mate. Tehuu neuꞌ ko Manetualain tulu-fali emi, ma noo faliꞌ emi leo bei-baꞌi mara nusa-namon meu. 22 Tehuu besaꞌ ia, au bati fee o lena nemeꞌ aꞌa-fadi mara mai. Huu fo au fee tamba o leteꞌ nai dae Kanaꞌan, fo maulu na au alea an neme lahenda Amori ra mai, tepoꞌ fo au atati o si a.”
*48:8-10 Susura Makamoiꞌ dedea Ibrani nae, “Israel”.
†48:12 Susura Makamoiꞌ dedea Ibrani nae, “Yusuf naheoꞌ ana nara reme Yakob lela na mai.”
‡48:16 Susura Makamoiꞌ dedea Ibrani nae, “Au hule fo Manetualain eilaꞌo-limalopen nemeꞌ nusatetu-ikutemaꞌ a mai, poꞌi-tata naa au emeꞌ basa soe rupaꞌ ara.” Tehuu lahenda malelaꞌ Susura Makamoiꞌ ruma rae, nai lalaneꞌ ia Manetualain natudu Ao Na, tepoꞌ fo Ana pake eilaꞌo-limalopen neme nusatetu-ikutemaꞌ a mai, fo poꞌi-tata naa Yakob neme soe rupaꞌ ara mai. Meten nai Tutui Masososaꞌ 16:7; 21:17; 22:11, 15.