11
1 Iabini, Hasoa edi Vasavasa va i ataiei headi i hetamaridi Iobaha, Madona edi Vasavasa, eo Simirona edi Vasavasa, eo Asapa edi Vasavasa aridi eai.
2 Vasavasa headi hinage oea tupi roharoha teha bauri eai, eo Vasavasa headi gonu eai Sinerota teha eavana eai, eo headi hinage arotau eai, eo Doa sigasigana eai, teha lalasi eai.
3 Eo Kanana teha aruabo, eo teha lalasi, eo Amoraiti, eo Hitaiti, eo Peresaiti, eo Iebusaiti oea tupidi eai, eo Haivaiti Hemoni ubuna eai, Misepa oeana eai.
4 Isi se lau, isi eo edi tauiala moutuadi hinage, tatao se gamagari, mamohoi isi doha geregere gabogabo hasarina eai se gamagari ariri, eo hosi, eo kariota se gamagari ariri.
5 Teina Vasavasa gamagaridi se oigogo‐esega se laoma se abi‐numa Meroma goilana eai, Isaraela bena se ialaidi.
6 Guiau i ribalau Iosua arinai i ene, Isi tabu u matausiedi; maraitom, mahana doha ede ina, se mateohi abo ea mosedi Isaraela matadi eai; edi hosi abo au nigoidi, edi kariota abo oeagi eai au gabudi.
7 Iosua abo i laoma, eo tauiala gamagaridi maenaeao, i hetagugudi Meroma goilana eai, se ialaidi.
8 Guiau Isaraela nimadi eai i mosedi, to se lauelepaidi, eo se henaudi se lau e Sidona eai se lage, eo Misirepota‐maima eai se lage, eo Misepa teha aruabo arotauna eai se lage, se lauelepaidi i lau e nige esega i mia.
9 Iosua Guiau ena riba gamagaridi i lauvataidi: edi hosi i nigoidi, eo edi kariota oeagi eai i gabudi.
10 Nei asubenana ne Iosua i uio abo Hasoa i girihai, elepa eai edi Vasavasa i unui: beabeana Hasoa va teina basileia gamagaridi i sae tavatavaidi.
11 Isi tatao gamagaridi boeana eai se lauelepaidi se unuhematedi: nige esau i mia i eahua: Hasoa hinage i gabu.
12 Vau Vasavasa va edi eanua gamagaridi, eo edi Vasavasa hinage Iosua i girihaidi i lauelepaidi, i hebaaeaaririedi, doha Mose, Guiau ena heaheari, i lauhesomdi.
13 Eanua lailai headi Isaraela sora nige se gabudi, Iosua Hasoa mo i gabu.
14 Teina eanua edi gogo, eo edi bulumakau, Isaraela nanatunaeao se abigaibuidi isi isibom edi ginauri: tatao mo gamagaridi se lauelepaidi, nige tau esau i mia i eahua.
15 Doha Guiau ena heaheari Mose i lauhesom, Mose hinage Iosua i lauhesom, Iosua hinage i abivatai: ginauri gamagaridi Guiau Mose i lauhesom va Iosua i abiheohidi.
16 Arinai Iosua oea i girihaiohi, oea tupidi, eo oea maudoudoina teha eavana eai, Gosena oeana maudoudoina, eo arotau eo gonu, eo Isaraela edi oea, eo edi gonu.
17 Halaki tupina eai i sae Seia eai, i lau e Balagada eai, Labanona arotauna eai, Heamona tupina ubuna eai: edi Vasavasa gamagaridi i abidi, i lauelepaidi, i unuidi hinage.
18 Teina Vasavasa gamagaridi aridi eai Iosua huia roharoha eai i ialaidi.
19 Nige eanua esau Isaraela maena se labini: Haivaiti tataodi isibom Gibeona taumiaidi: gamagaridi se ialaidi, eo se girihaidi.
20 Paana ede Guiau nuadi i heoiuradi, bena se laoma Isaraela se ialaidi, ia abo i hebaaeaaririedi, nige i nuatuidi; bena i hebaaeadi mo, doha Guiau Mose i lauhesom.
21 Nei huiana ne Iosua i laoma Anakimi tataodi bena i helautomdi oea tupidi eai, eo Heberona eai, Debiri hinage, eo Anabi, eo Iueda oea tupidi eai, eo Isaraela oea tupidi eai: Iosua i hebaaeaariedi, eo edi eanua hinage.
22 Isaraela nanatunaeao edi tano eai nige Anakimi esau i mia; headi mo se mia Gasa eai, eo Gati eai, eo Asidodi eai.
23 Tano maudoudoina Iosua i girihai, doha hinage riba gamagaridi Guiau i ribalau Mose arinai: Iosua abo i mosei Isaraela aridi eai, boga esau enana, eo boga esau enana, oea eai va se iala lautom.