89
Tayta Dioswan David alli parlacushan
Ezraíta runa Etán yachachir isquirbishan.
1 Tayta Dios, cuyapäcoj cashayquipitami imaypis alabashayqui.
Imaypis willacushämi llapanta cumlej cashayquitaga.
2 Nogaga willacushaj wasipa alli simintunnöpis imaycamapis cuyacoj cashayquitami.
Gampa palabrayquega syëlu imaypis mana rucaj cashannömi.
3 Davidwanpis allimi parlacurayqui.
Acrashayqui sirbishojniquitami aunirayqui:
4 «Nogami camacächishaj gampita mirajcuna
imaycamapis ruquiqui mandaj cananpaj»* 2Sam. 7.12–16; 1Crón. 17.11–14; Sal. 132.11; Hech. 2.30 nir.
Selah
5 Tayta Dios, janaj pachacho caycajcunami alabashunqui
llapanta cumlej cashayquipita, milagrucunata rurashayquipitapis.
6 ¡Manami ima diospis, ni syëlucho caycajcunapis gammanga tincunchu!
7 Janaj pachacho llapan shuntacasha caycashanchöpis gamtaga manchacushunquimi.
Anjilcuna tumaparaycäshushayquichöpis gamga canqui fiyupa manchacuypaj munayniyojmi.
8 Ima-aycapäpis munayniyoj Tayta Dios ¿piraj gammanga tincunman?
Gamllami rasunpa cajtapis ruranqui; munayniyoj canqui.
9 Bötiypa bötiycaj lamarta gammi chawächinqui.
Wayrawan pullchajyaycajtapis chawächinqui.
10 Lamarcho manchacuypaj caycaj waräcuytapis wañusha runatanöllami ñitirishcanqui.* Job 9.13; Sal. 74.13
Chiquishojcunatapis munayniquiwanmi mashtaypa mashtarishcanqui.
11 Syëlupis cay pachapis gamllapami.
Gammi camashcanqui mundutapis, munducho caycajcunatapis.* Sal. 24.1–2; 95.4–5; 1Cor. 10.26
12 Mundutaga juc cuchunpita jucaj cuchuncama gammi camashcanqui.
Tabor puntawan Hermón puntapis cushishami gamta alabashunqui.
13 Gamga munayniyojmi canqui.
Gampa maquiquega llapanta binsinanpaj fiyupa callpayojmi.
14 Gam mandashpayquega allitami ruraycanqui, rasun cajtami ruraycanqui.
Cuyacoj cashayquitami nogacunata musyaycächimanqui.
15 Cushishami cawanga alabashojcunaga,
gampa ñaupayquicho purejcunaga.
16 Paycunaga jutiquita parlashpan cushisha goyan.
Allita ruraj cashayquipitapis cushicuchun.
17 Chayno goyanga munayniyoj cananpaj rispitasha cananpaj yanapaptiquimi.
Gam cuyacoj cashpayqui yanapämaptiquimi nogacuna munayniyoj cashaj.
18 ¡Tayta Dios, gammi canqui chapacuna escüdö!
¡Israelpa Santo Diosnin, gammi canqui nogacunapa raynë!
19 Unayga acrashayqui runacunata ribilaypami tantiyachirayqui.
Paycunatami nirayqui:
«Israel runacunapitami jinyunninta acrashcä.
Paytaga nogami yanapashcä mas allicho cananpaj.
20 Sirbimaj Davidtami acrashcä.* 1Sam. 13.14; Hech. 13.22
Ray cananpämi rispitädu asëtita umanman wiñapashcä.* 1Sam. 16.12
21 Paytaga imaypis yanapäshämi.
Munaynëwanmi sumaj callpayojyächishaj.
22 Chiquejcunapis manami magangachu.
Fiyu runacunapis manami binsengachu.
23 Payta chiquejcunataga llapirishämi.
Chay runacunataga ichic-ichicllami rurarishaj.
24 Paytaga yanapaycäshämi.
Aunishätapis cumlishämi.
Yanapaptëmi mas munayniyoj ricaconga.
25 Mediterráneo lamarpita Éufrates mayucama mandananpämi camacächishaj.
26 Paymi nimanga: ‹Gammi papänë canqui.
Diosnë canqui, Salbamaj, imapitapis chapämaj canqui› nir.
27 Nogapapis payga guechpa wamrämi canga.
Payga cay pachacho caj raycunapita mas munayniyojmi canga.* Apoc. 1.5
28 Paytaga imaypis chaynöllami cuyaycäshaj.
Paywan parlacushätaga manami imaypis rucachishächu.
29 Syëlu manaraj ushacashancamaga paypita mirar aywajcuna imaypis mandaycangami.
30 «Yachachishäta paycuna gongaycuptin,
imanöpis rurananpaj nishäno mana ruraptin,
31 laynëta mana cumliptin,
mandamintöcunata mana wiyacuptin
32 castigashaj gueruwan wiruypapis mana wiyacamashanpita, mana allicunata rurashanpita.* Deut. 8.5; 2Sam. 7.14; Sal. 94.12; Prov. 3.11–12; Heb. 12.5–11
33 Chaypis Davidtaga mana cachariypami cuyaycäshaj.
Paypaj imata aunishätapis manami cutiricushächu.
34 Paywan parlacushätaga manami rucachishächu.
Palabrätaga cumlishämi.
35 Davidtaga aunishcä jutëcho jurarmi.
Paytaga manami llullapäshächu.
36 Paypita mirar aywajcunaga imaypis mandaycangami.
Inti caycashancamaga mandaycangami.
37 Mandaj cashanga canga quillano.
Mana illgaypami mandaycanga syëlu manaraj ushacashanyäga.»
Selah
38 Chayno aunisha caycashpayquipis
manacajmanmi churashcanqui acrashayqui raytaga.
Paypäga fiyupami rabyacurcushcanqui.
39 Umancho caycaj corönantapis pampamanmi jitarishcanqui.
Sirbishojniquiwan alli parlacushayquitapis manami cumlishcanquichu.
40 Siudänincunapa curralnincunatapis gashargärishcanquimi.
41 Pï-maypis chaypa päsajcunaga munashantami suwapan.
Läduncho tiyajcunapis asipan.
42 Davidta chiquejcuna callpayoj cananpämi yanapashcanqui.
Chaymi binsisha.
Cananga chiquejcuna cushisha carcaycan.
43 Raypa fïnu sablin caycajcunatapis ronguyächishcanqui.
Pillyachöpis mananami yanapashcanquichu.
44 Munayniyoj caynintami guechushcanqui.
Sillunnintapis jitarishcanqui.
45 Mösu cashan timpupis manami alliga cawachishcanquichu.
Pasaypami pengacachishcanquipis.
Selah
46 Tayta Dios, ¿imaycamaraj pacaräcunqui?
¿Fiyupa rabyasha caycashayqui manachuraj päsanga?
47 Tayta Dios, yarpäriy ari noga päsacojlla cashäta.
Runacunaga yupasha watallami cawä.
48 Manami pipis canchu mana wañöga.
Sepultürapitaga manami pipis gueshpinchu.
Selah
49 Tayta Dios, ¿maytaj ñaupata cuyacoj cashpayqui
sirbishojniqui Davidta aunishayquega?
50 Tayta Dios, wiyaycuy ari.
Sirbishojcunataga achcaj runami asiparcaycan.
Imano gayapashancunatapis shongullächömi yarparaycä.
51 Tayta Dios, chiquishojcunaga asipaycämanmi.
Imay örapis gayaparcaycämanmi gam acrashayquicunataga.
52 Tayta Diosga imaycamapis alabasha cachun.
¡Chayno cachun!