1  Tayta Dios, rabyasha caycashpayquega ama piñacamaychu.

Ollgusha caycarpis ama castigamaychu.* Sal. 6.1; Jer. 10.24

2 Lëchayquipis cuerpöchömi jaticasha caycan.

Maquiquiwanmi ñacachimashcanqui.* Job 6.4; 16.12–13

3 Rabyasha piñacamaptiquimi intëru cuerpöpis manana sänunachu.

Juchäpitami tullöcunapis manana sänunachu.

4 Juchä atipashami caycä.

Chaymi lasaj guepino ñacaycächiman.

5 Mana yarpachacuypa rurashäpitami guerëcunapis ismur asyaricurisha.

6 Llaquishalla, jagayashalla, uysucushallami purëpis.

7 Rupaywan wajtäpis rauraycan. Intëru cuerpömi nanaycan.

8 Callpäpis mananami cannachu.

Wirur-ushashanömi nanapäcuycä.

Chaymi llapan shongöpa llaquicur ataycä.

9 Tayta Dios, imata munaycashallätapis gamga musyanquimi.

Llaquicuycashäcunapis manami pacaranchu.

10 Shongöpis tic-ticyaycanmi.

Callpäpis manami cannachu.

Ñawëpis chacaycannami.

11 Guerëcuna captinmi llapan amïgöcunapis, castäcunapis carullachöna carcaycan.* Job 19.13

12 Wañuchimayta munajcunaga togllatami churaparcaycäman.

Mana allita ruramayta munamajcunaga illgächimaytami yarparcaycan.

Imay örapis mana allita ruramayllatami yarpaycan.

13 Chaypis nogaga mana wiyaj upanömi cacö.

Mana rimaj upano imatapis mana rimacöchu.* Isa. 53.7

14 Imata nimaptinpis manami wiyaj-tucöchu.

Upanömi imata nimaptinpis mana cutichëchu.

15  Tayta Dios, gamtami shuyaraycä.

Nogapa faburnë gam rimarcuy ari.

16 Ichanga ruwacushayqui Tayta:

Tuniptë-imaga ama camacächiychu nogata asipämänanta.

17 Illajpitanami tunej-aywä.

Intëru cuerpö nanaycaj manami rätullapis chawaycunnachu.

18 Juchata rurashäpitami fiyupa llaquicö.

Chaymi jucha rurashäta willacushaj.

19 Chiquimajcunaga aypallanami miracurcusha.

Mana imatapis rimapaycaptillämi achcaj chiquicarcamasha.

20 Noga allita rurashäpita mana alliwanmi cutiycächiman.

Noga alli cajllata ruraptëmi paycunaga chiquicarcäraman.

21  Tayta Dios, ama japallätaga cachaycamaychu.

Ama gongaycamaychu ari.

22 Imaypis salbamaj Tayta Dios,

juclla yanapaycamay ari.