Lamentaciones
¿Ñacaycarpis sïguir Tayta Diosman yäracuycashwanrächu?
¿Imatapis mana rimacuyllapachu ñacacushun? ¿Ñacaycashanchi öra maychötaj Dios caycan?
¿Pitaj isquirbiran? Runacuna yarpan Lamentaciones libruta Jeremías isquirbishantami. Lamentaciones ninan caycan «llaquicur atashan» ninanmi.
¿Imataj caycan cay librucho? Lamentaciones libruchöga caycan pichga capïtulumi. Chayta isquirbiran wata 586 a.C. Jerusalén juchuchisha cashanpita y ushacashanpitami. Cay capïtulucunacho fiyupami llaquicuycan Jerusalén juchushanpita, chaycho tiyaj runacuna juc-lä nasyunman prësu aywashanpita. Chaynöpis yarpachacuycan chay castïgu chayashan paycunata merësishanta u mana merësishantapis. Yarpachacuycan shamoj watacunacho imanöpis cananpaj cashanta.
Cay librutaga pasaypa llaquishami isquirbiran. Chaypis cada fïla gallarejcho hebreo rimaypa letrancunata sumaj camacächiypa churasha. Pichgan capïtuluchömi chayno camacächisha. Hebreo rimaychöga ishcay chunca ishcaynin (22) letracunami caycan. Y cay librucho cada capítulo caycan 22, 22, 66, 22, 22 bersïculucuna. Quimsa caj capïtuloga ishcay chunca ishcaynin (22) partimi caycan. Ichanga cada parti caycan quimsa bersïculuyoj. Y chay quimsan bersïculunami juc casta letrallawan gallariycan. Chaymi quimsa caj capïtuloga caycan sojta chunca sojtanwan (66) bersïculu.
Cay libruta isquirbëga reconösiycanmi quiquincunapa juchanpita castïgu chayashanta. Ichanga castïguman chayar fiyupa ñacasha. Contrancuna yaycur llapanta ushaycuran. Runacunatana ñacachiypa wañuchiran (2.20–22).
1
Rimir caj llaquicuy
Álef
1 Ay Jerusalén, ñaupataga aypalla runami chaycho tiyaran.
Cananga imano chunyajshi ricacusha.
Ñaupataga sumaj rejsisha siudämi caran.
Cananga biyüda warminömi caycan.
Achca siudäcunapa raynannömi caran.
Cananga quiquinnami chay nasyuncunapa uywaynin caycan.
Bet
2 Chacaycuna fiyupa llaquicushpan icchushanyajmi wagaycan.
Cärancunapapis yacunörämi weguin jutuycan.
«Cuyämi» nir gatirajcunaga manami maygallanpis canchu shogananpaj.* Sal. 69.20; Jer. 9.17–19; 13.17
Llapan yanasancuna ticraparmi chiquicarcärisha.* Jer. 30.13, 14
Guímel
3 Judá runacunataga juc-lämanmi prësu apasha.
Chaychönami sasa aruycunacho aruchir, fiyupa ñacarcaycächin.
Ñaupata paycunaga llapanpa mandajninmi caran.
Cananga mananami jamaytapis tarichinnachu.
Gaticachajcunaga chariycurmi
llaquicachir fiyupa ñacarcaycächin.
Dálet
4 Sión lömaman aywaj caminucunaga fiyupa llaquicuypaj chunyajmi ricacusha.
Fistacunamanpis mananami pipis shamunnachu.
Siudäman yaycuna puncupis pasaypa chunyajmi caycan.
Siudächöga cüracunallami wagaycan.
Jipashcunapis fiyupa llaquicurcaycan.
Quiquin siudäpis fiyupami llaquicuycan.* Isa. 3.26; Jer. 14.2
He
5 Chiquejcunanami munaynincho chararaycan.
Contrancunaga mas allimannami chayasha.
Jerusalencunataga achca juchata rurashanpitami Tayta Dios ñacaycächin.
Wamrancunatapis chiquejcunami prësu apasha.
Vav
6 Jerusalenpaga illgashami cuyayllapaj cayninpis.
Mandajnincunapis, lluychu guewata ashejnömi purircaycan.
Balurninpis mana captinmi
chaquintapis garchayllapa aywarcaycan gaticachajcunapa ñaupanta.
Zayin
7 Jerusalenga yarpärin japallan, llaquisha quëdashanta.
Yarpärin ima-aycatapis fiyupa aypallata charashanta.
Yarpärin chiquejcunapa munayninman chayashanta,
chay öra pipis mana yanapashanta.
Chiquejcuna chayta ricashpan asiparan
mana alliman chayashanpita.
Jet
8 Jerusalenga fiyupami juchata rurasha.
Chaynöpami pï-maypis manacajman churasha.
Ñaupata rispitajcuna, cananga manacajmanmi churarcaycan disigrasyaman chayashanta ricashpan.
Chaypitami payga wagaycan.
Pengacuyllawanmi ticracurcusha.* Eze. 16.35–37
Tet
9 Juchata rurashpanmi röpantapis ganrachisha caycan.
Manami yarpachacuranchu imaman chayananpaj cashantapis.
Mana riguiypämi mana alliman chayasha.
Pipis manami canchu cuyapar shogananpaj.
Tayta Dios, ricäramay ari fiyupa llaquicuycashäta.
Chiquimajcunanami alliman chayasha.
Yod
10 Jerusalenpa ima-aycantapis chiquejcunami apacusha.* 2Rey. 24.13; 25.13–17
Siudächo tiyajcunaga ricashami
Diosta mana rispitajcuna callpaycur Templuman yaycojta.
Tayta Dios, gamga chay runacunapaj nirayqui Templuyquiman mana yaycunanpämi.
Caf
11 Jerusalencho tiyaj runacunaga llapanmi wagarcaycan.
Micuyta ashirmi purircaycan.
Micur cawananpämi micuywan rucaycärisha ima-aycantapis.
Paycunaga wagashpan Tayta Diosta ruwacuycan:
«Mana alliman chayasha caycajtaga ricäramay.
Disigrasyaman chayasha caycajta cuyapaycamay ari.»
Lámed
12 Jerusalén siudänami nin:
«Gamcuna, caminunpa purejcuna,
ichiycäriy sumaj yarpachacunayquipaj.
¿Pillaga ñacaycanchuraj noga fiyupa ñacaycashäno?
Tayta Diosmi rabyacurcushpan camacächisha cayno ñacanäpaj.
Mem
13 «Paymi janajpita-pacha ninata cachamusha tullöcama ruparamänanpaj.
Purinäman chapata churapämasha.
Chaymi guepaman cutichimasha.
Japallätami cachaycamasha.
Cananga ñacayllachömi caycä.
Nun
14 «Juchäcunaga yügunömi lasaycäman.
Quiquin Tayta Diosmi watarcamasha.
Callpäpis ushacaycannami.
Tayta Diosga cachaycamasha
ichipayta mana puydishä runacunapa munayninmanmi.
Sámej
15 «Tayta Diosga yagarachisha washämaj jinyu runacunata.
Paymi cachamusha magamänanpaj jäpa suldärucunatana,
paycuna nogapa jinyu suldäröcunata wañuchinanpaj.
Tayta Diosga llapiramasha juc runa bïnupaj übasta gapchirishannömi.* Isa. 63.3; Joel 3.13; Apoc. 14.20; 19.15
Ayin
16 «Chaypitami fiyupa wagaycä.
Ñawëchöpis weguillami juntasha caycan.
Nogata shogamäga manami pipis canchu.
Manami canchu yanapämänanpäpis.
Wamräcunataga ushajpämi illgächisha.
Chiquimajcunami binsiycamashpan wañuchisha.»
Pe
17 Sionga maquintapis chojpacur-rämi mañacuycan.
Ichanga manami pipis canchu shogananpaj.
Tayta Diosmi camacächisha chiquejcuna Jacobta curalapaycärinanpaj.
Chiquejcunapäga Jerusalén caycan mana sirbejmi.
Tsade
18 Jerusalén nin: «Tayta Diosga rasun cajtami rurasha
pay nimashanta mana wiyacushäpita.
Marcacuna wiyamay-llapa.
Ricamay-llapa imano nanächicuycajtapis.
Nogapitaga mösucunata jipashcunatapis prësumi apacusha.
Qof
19 «Yanasä caj nasyuncunatami yanapämänanpaj ruwacurä.
Nishä paycunaga ticrapamashami.
Cüracuna, auquincuna jinan siudällacho wañusha
cawananpaj micuyta ashir purircaycashancho.
Resh
20 «Tayta Dios, fiyupa llaquicuycashäta ricäramay ari.
Shongöpis fiyupami tic-ticyaycan.
Pasaypa mana wiyacoj cashäta yarpäriptëga
shongöpis fiyupami nanacuycun.
Jawachöga wamräcunatami sabliwan wañuycächin.
Cay rurichöpis wañuyga caycanmi.* Jer. 4.19; 9.21
Shin
21 «Runacunaga wiyaycanmi llaquicur wagaycashäta.
Ichanga shogamänanpaj manami pipis canchu.
Llapan chiquimajcunami musyaycan mana allicho caycashäta.
Paycunami cushicurcaycan gam chayno castigamashayquipita.
Tayta Dios, nogata castigaycämashayquino paycunatapis castigayna ari.
Tav
22 «Paycuna mana allita rurashancunatapis
llapanta ricaycuy ari.
Juchata rurashancunapitaga castigaycuy
nogata castigamashayquino.
Alläpanami wagaycä.
Shongöpis nanaycanmi.»