27
Yarparänanpaj Ebal jircaman wancacunata jawishan
1 Mayur Israelcunawan Moisesga llapan Israelcunata niran: «Canan willapashä mandamintucunataga llapanta cumliy-llapa. 2 Jordán mayuta chimparir, Tayta Dios goycushunayquipaj caycaj nasyunman yaycur jawinqui wanca rumicunata. Yuraj cananpäna iscuwan pintanqui. 3 Chay wancacunaman isquirbinqui canan willapaycashäcunata. Chayno isquirbinqui Tayta Dios unay caj awiluyquicunata aunishanman yaycurishayqui örallami. Chaychöga Tayta Dios nishannömi mishquipis lëchipis yacunöraj achca caycan. 4 Chay wancacunataga Jordán mayuta chimparcur Ebal jircaman jawinqui. Canan nishänölla yuraj cananpaj iscuwan pintanqui. 5 Nircurmi Tayta Diosninchïpaj altarta chaycho perganqui. Chay altarta perganayquipäga ama ima fyërruwanpis rumicunata llagllanquichu, chaypa ruquenga llaglläni rumicunallawan perganqui. 6 Tayta Diosninchïpa altarnenga imaypis llaglläni rumicunallawan pergasha canman.* Éxo. 20.25 Chay altarchömi rupachina sacrifisyucunata paypaj rupachinqui. 7 Alli goyaypita sacrifisyu uywacunatapis pishtanqui. Chaymi Tayta Diospa ñaupancho fistata rurar micunqui. 8 Nishänöpis mana gongaypa chay wancacunaman nishä laycunata llapanta sumaj isquirbinqui.»* Jos. 8.30–32
9 Chaypitana Leví trïbu cüracunawan Moisesga waquin Israel-masincunata niran: «Wiyaycäramay Israelcuna. Gamcunaga canan junajpita canqui Tayta Dios acrashan runacunami. 10 Chaymi payta wiyacur llapan mandamintuncunata laynincunata canan willapashäta cumlinqui.»
Mana wiyacojcunapaj maldisyun cananpaj nishan
11 Chay junajlla Moisesga Israelcunata niran: 12 «Jordán mayuta llapaniqui chimparcäriptiquega Simeón trïbu, Leví trïbu, Judá trïbu, Isacar trïbu, José trïbu, Benjamín trïbu runacuna Gerizim jircaman wichanga. Chaypitanami nimonga Israelcuna Diosta wiyacur bindisyunta chasquinanpaj cashanta.* Deut. 11.29; Jos. 8.33–35 13 Ebal jircamanna wichanga Rubén trïbu, Gad trïbu, Aser trïbu, Zabulón trïbu, Dan trïbu, Neftalí trïbu runacuna. Paycunami chaypita nimonga Israelcuna Diosta mana wiyacorga maldisyunta chasquinanpaj cashanta. 14 Leví trïbu runacunanami llapan Israelcuna wiyananpaj nimonga:
15 « ‹Pipis fyërruta chullurcachir u gueruta llagllaypa ïduluta rurashpan pacayllapapis aduraj cäga maldisyunasha cachun.* Éxo. 20.4; 34.17; Lev. 19.4; 26.1; Deut. 4.15–18; 5.8 Chayno rurajcunataga Tayta Dios melanäcunmi.›
«Niptin llapan runacunana
‹¡Nishayquino cachun!› nenga.
16 « ‹Pipis mamanta u taytanta mana rispitaj cäga maldisyunasha cachun› nir.* Éxo. 20.12; Deut. 5.16
«Niptin llapan runacunana
‹¡Nishayquino cachun!› nenga.
17 « ‹Bisïnunpa chacranta guechuyta munar linda witichej cäga maldisyunasha cachun› nir.* Deut. 19.14; Job 24.2; Prov. 22.28; Ose. 5.10
«Niptin llapan runacunana
‹¡Nishayquino cachun!› nenga.
18 « ‹Nänipa gapra alli aywacuycajta llutanpa pantacächej cäga maldisyunasha cachun› nir.* Lev. 19.14
«Niptin llapan runacunana
‹¡Nishayquino cachun!› nenga.
19 « ‹Jäpa runacunata, wacchacunata, biyüdacunata mana alli ricaj cäga maldisyunasha cachun› nir.* Éxo. 22.21; 23.9; Lev. 19.33–34; Deut. 24.17–18
«Niptin llapan runacunana
‹¡Nishayquino cachun!› nenga.
20 « ‹Pipis papäninta pengayman churar märistanwan cacoj cäga maldisyunasha cachun› nir.* Lev. 18.8; 20.11; Deut. 22.30
«Niptin llapan runacunana
‹¡Nishayquino cachun!› nenga.
21 « ‹Ima uywawanpis cacoj cäga maldisyunasha cachun› nir.* Éxo. 22.19; Lev. 18.23; 20.15
«Niptin llapan runacunana
‹¡Nishayquino cachun!› nenga.
22 « ‹Mamallapitapis u taytallapitapis pañin caycajwan cacoj cäga maldisyunasha cachun› nir.* Lev. 18.9; 20.17
«Niptin llapan runacunana
‹¡Nishayquino cachun!› nenga.
23 « ‹Pipis suyranwan cacoj cäga maldisyunasha cachun› nir.* Lev. 18.17; 20.14
«Niptin llapan runacunana
‹¡Nishayquino cachun!› nenga.
24 « ‹Runa-masinta raysunpita wañuchej cäga maldisyunasha cachun› nir.* Éxo. 20.13; 21.12–14
«Niptin llapan runacunana
‹¡Nishayquino cachun!› nenga.
25 « ‹Juchaynaj runata wañuchinanpaj päguta chasquircur wañuchej cäga maldisyunasha cachun› nir.
«Niptin llapan runacunana
‹¡Nishayquino cachun!› nenga.
26 « ‹Cay willapashäcunata mana wiyacoj cäga, mana cumlej cäga maldisyunasha cachun› nir.* Jer. 11.3; Gál. 3.10
«Niptin llapan runacunana
‹¡Nishayquino cachun!› nenga.
*27:6 Éxo. 20.25
*27:8 Jos. 8.30–32
*27:12 Deut. 11.29; Jos. 8.33–35
*27:15 Éxo. 20.4; 34.17; Lev. 19.4; 26.1; Deut. 4.15–18; 5.8
*27:16 Éxo. 20.12; Deut. 5.16
*27:17 Deut. 19.14; Job 24.2; Prov. 22.28; Ose. 5.10
*27:18 Lev. 19.14
*27:19 Éxo. 22.21; 23.9; Lev. 19.33–34; Deut. 24.17–18
*27:20 Lev. 18.8; 20.11; Deut. 22.30
*27:21 Éxo. 22.19; Lev. 18.23; 20.15
*27:22 Lev. 18.9; 20.17
*27:23 Lev. 18.17; 20.14
*27:24 Éxo. 20.13; 21.12–14
*27:26 Jer. 11.3; Gál. 3.10