145
Llapan runapis Tayta Diosta alabachun
David isquirbishan alabansa.
Álef
1 Gam fiyupa munayniyoj Raynë cashayquitami willacushaj Tayta Dios.
Imaycamapis alabaycäshayquimi.
Bet
2 Waran waranmi alabashayqui.
Imaycamapis alabaycäshayquimi.
Guímel
3 Tayta Diosga fiyupa munayniyojmi.
Chaymi alabananchi camacan.
Pay munayniyoj cashanga
tantiyaytapis mana atipaypämi.
Dálet
4 Tayta Dios gam rurashayquicunapämi taytancunapis wamrancunata willapanga.
Munayniquiwan rurashayquicunatapis willaconga.
He
5 Munayniyoj achicyaypa achicyaj cashayquita willaconga.
Nogapis willacushaj fiyupa almiraypajcunata rurashayquicunata.
Vav
6 Munayniyoj cashpayqui fiyupa manchariypajcunata rurashayquicunatami parlanga.
Noganami willacushaj munayniyoj cashayquita.
Zayin
7 Fiyupa alli cashayquitami parlanga.
Allita rurashayquipitanami cushicur cantanga.
Jet
8 Tayta Diosga fiyupa alli, cuyapäcojmi.
Payga juclla manami rabyacunchu.
Payga fiyupa cuyacojmi.* Sal. 103.8; Stg. 5.11
Tet
9 Tayta Diosga pï-maypäpis allimi.
Ima rurashancunatapis cuyarmi rican.
Yod
10 Tayta Dios, llapan rurashayquicuna alabaycushunqui.
Wiyacushojcuna aduraycushunqui ari.
Caf
11 Paycunaga sumaj mandashayquipämi parlanga.
Munayniyoj cashpayqui rurashayquicunatapis willaconga.
Lámed
12 Munayniyoj cashayquita,
fiyupa achicyaypa-achicyaycaj munayniqui cashantapis runacunata musyachenga.
Mem
13 Gam mandashayquega mana ushacajmi.
Mandashayquega imaycamapis maquillayquichömi canga.
Sámej
14 Tayta Diosga tunejcunata charinmi.
Ñacaycajcunatanami alliman churan.* Sal. 146.8; 147.6
Ayin
15 Tayta Dios, llapanpis gamtami shuyarpaycäshunqui
yargashan öra micuyta tarichinayquipaj.
Pe
16 Chaura gamga alli cashpayquimi
sacsananyaj tarichinqui llapan cawajcunata.
Tsade
17 Tayta Diosga llapan aunishantapis cumlinmi.
Llapan rurashancunatapis cuyapanmi.
Qof
18 Tayta Diosga llapan shongunpa mañacojcunata yanapanmi.
Resh
19 Payta rispitajcuna imatapis mañacushantaga llapantami camacächin.
Mañacuptin imapitapis salbanmi.
Shin
20 Tayta Dios imapitapis chapanmi payta rispitajcunataga.
Fiyu runacunatami ichanga usharin.
Tav
21 Nogaga Tayta Diosllatami alabashaj.
Juchaynaj Tayta Diosta llapan adurachun cananpis imaycamapis.