54
Salbananpaj Diosta mañacushan
Zif runacuna Saulman aywaycur «Davidga nogacuna cajchömi pacaraycan» niran.* 1Sam. 23.19; 26.1 Chaypitami David isquirbiran cay alabansata.
1 ¡Tayta Dios, salbaycamay ari!
Munayniyoj cayniquiwan chapaycamay ari.
2 Tayta Dios, wiyaycuy ari mañacamushäta.
Quijacamushäta wiyaycamay ari.
3 Jäpa runacunami conträ ricacusha.
Fiyu runacunami wañuchimayta munaycäman.
Chay runacunaga manami yäracushunquichu.* Sal. 86.14
Selah
4 Chaypis Tayta Dios yanapaycämanquimi; cawaycächimanquirämi.
5 Gammi camacächinquipaj chiquimajcuna mana allita ruramashan quiquincunaman chayananpaj.
Tayta Dios, chiquimajcunataga illgarachiy ari.
6 Noganami llapan buluntänëpa ofrendata garashayqui.* Núm. 15.3
Gam alli cashayquipita alabashayqui.
7 Gamga llapan llaquicuypitami jorgamashcanqui.
Llapan chiquimajcuna mana alliman chayajtapis ricachimashcanquimi.