1 Juchasapacunaga yarpan imanöpapis mana allita rurayllatami.

Manami imaypis yarpanchu Tayta Diosta manchacuytaga.* Rom. 3.18

2 Paycunaga yarpan waquinpita mas alli caycashanta.

Mana allita rurarpis manami imatapis gocunchu.

3 Paycunaga mana allita parlajllami, llullacojmi.

Yarpaynin mana captinnami allitaga mana rurannachu.

4 Cämanchöpis yarpaycan mana allita rurayllatana.

Llutan nänicho purejnöllami purircaycan.

Mana alli ruraytaga manami cachaycunchu.

5  Tayta Dios, cuyacoj cashayquimi ichanga syëlucama chayan.

Alli cumlej cashayquega pucutaypita mas janajcamami chayan.* Sal. 57.10

6 Alli arriglaj cashayquega altunnin puntacunanömi.

Imano cananpaj nishayquipis jatun lamarno rurimi.

Tayta Dios, gammi ricaycanqui runacunata, animalcunatapis.

7 Tayta Dios, gamga fiyupa cuyacojmi canqui.

Runacunaga älayqui rurinmanmi pacacuyta ashircaycan.

8 Wasiquicho aypalla micuy captinmi llapanpis sacsan.

Gamga yacutapis upuchinqui mishquej mayupitami.

9 Yacu pashtamoj-jinami gamlla pï-maytapis cawachinqui.

Gam alli ricaptiquimi pï-maypis alli cawan.

10 Gamman yäracamojcunata, alli runacunataga cuyapaycuy, alli ricaycuy.

11 Ama camacächiychu munayniyoj-tucojcuna lluchcacamänanta,

mana alli runacunapa maquinman chayanätapis.

12 Masqui ricay chay fiyu runacunata. Cananga mana allimanmi chayasha carcaycan.

Chaypitaga mananami llojshenganachu.