4
Tayta Diosta chacaypa mañacushan
Cay salmoga David isquirbishanmi. Cuerdasniyoj instrumentuta tucar cantananpämi caycan.
1 Conträcunapita chapämaj Tayta Diosnë,
¡mañacamuptë yanapaycamay ari!
Llaquicuycaptë gamga shacyächimarayquimi.
¡Cananpis cuyapämashpayqui wiyaycamay ari mañacamushäta!
2 Munayniyoj-tucoj runacuna, ¿imaycamaraj manacajman churaycämanqui?
¿Imaycamaraj manacajcunallata ashircaycanqui?
¿Imaycamaraj llullacuyllata munarcaycanqui?
Selah
3 Tantiyacuy-llapa, Tayta Diosga mandamintunta cumlejcunallatami cuyan.
Tayta Diosga mañacuptë wiyamanmi.
4 ¡Manchapacuy-llapa! ¡Juchata ama ruraychu!* Efe. 4.26
Imata ruranayquipäpis cämayquicho wegurashayqui öra yarpachacuy.
Selah
5 Llutan yarpashayquicunata cacharir Tayta Diosta wiyacur caway-llapa.
Tayta Diosllaman yäracuypis.
6 Achcajmi nircaycan: «¿Piraj alli cawayta tarichimäshun?» nir.
¡Tayta Dios, alli ñawillayquipa nogacunaman ricäramuy ari!
7 Aypalla rïguyojpitapis, aypalla bïnuyojpitapis masrämi gamga shongöta cushicachinqui.
8 Nogaga jaucami puñucöpis.
Tayta Dios gamman yäracushpämi cushishallana cawä.* Sal. 3.5; Prov. 3.24