1 Después de cain jihi, Jesús cjan ẍago iná ngain chojni que vacao are ngandehe lago que dinhi Tiberias. Janhi conhe: 2 tate yáto na, Simón Pedro; Tomás, tti Xancoata; Natanael, tti joixin rajna Caná de Galilea; co cayoi xitsihi Zebedeo; co iyó chojni que vacao Jesús. 3 Simón Pedro ndac̈ho ngain na:

―Janha sitse copescado.

Cain jehe na ndac̈ho na ngain:

―Janha na cai tsjin na.

Jañá savinttecji na coani na ná barco, pero ttie mé ẍonhi copescado tse na. 4 Co are ocoexinhi vingasán, Jesús ẍago ngandehe jinda, pero cain chojni mé venoeha na ixin jehe Jesús. 5 Cottimeja Jesús ndac̈ho ngain na:

―¿Aẍa ẍonhi copescado tse ra?

Co jehe na ndac̈ho na:

―Ẍa ẍonhi va.

6 Cottimeja Jesús ndac̈ho ngain na:

―Dancahngui ra nonchaha lado jian de barco, co rrotse ra va.

Co jamé joinchehe na, cottimeja ndoa hasta ni ic̈hoha dantsjengui na nonchaha de ngangui jinda ixin anto tsje copescado vingachjian nonchaha. 7 Cottimeja tti chojni que Jesús anto joinao, mé ndac̈ho ngain Pedro:

―¡Jehe Jesús!

Nandá coinhi Simón Pedro yá que ixin jehe Jesús, jehe Pedro jaicoa vingá lonttoe, lontto jidattexin ixin jehe joantsje lontto, co coataonhe jinda. 8 Co rato mé tti icha chojni que vacao Jesús ẍa vittohe na inchin cien metro cjinxin de ngandehe jinda. Cottimeja jehe na joí na ngandehe jinda conixin barco que jittianganji nonchaha jicaontja copescado. 9 Are ojoí na ngandehe nda ngataha jinche, vittja na ná montochjan de ẍoittja conixin ná copescado ngataha ẍohi, co niottja. 10 Jesús ndac̈ho ngain na:

―Sicoho ra canxion copescado que tse ra jaxon.

11 Simón Pedro cjan ngain barco para joica nonchaha que jiringa copescado co jehe coianganji nonchaha mé hasta tti ngandehe lago co nttiha jiringa de joxon copescado yeye hasta ciento cincuenta y tres va. Co masqui anto tsje va, vichjeha nonchaha. 12 Cottimeja Jesús ndac̈ho ngain na:

―Ẍacoi ra jintte ra.

Co ni ná de jehe nimé ẍaxaonha na para joanchianguihi na Jesús ixin quensen jehe ixin venohe na que jehe Jesús. 13 Cottimeja Jesús conchienhe, co jehe coá niottja co joanjo nio ngain jehe na, co cai copescado.

14 Jihi ninxin nttiha que ẍago Jesús ngain chojni que vacao después de xechon.

15 Are joexin joine na, Jesús joanchianguihi Simón Pedro co ndac̈ho:

―Simón, xitsihi Jonás, ¿arinao na janha icha que nitehe?

Pedro ndac̈ho:

―Ján, soixin noha que ján rinaho.

Jesús ndac̈ho:

―Mexinxin jaha darinda chojnina, jañá inchin tti ttingaria coleco dicao cuidado de ixin jehe va.

16 Yoxin nttiha, Jesús joanchianguihi iná co ndac̈ho:

―Simón, xitsihi Jonás, ¿arinao na janha?

Pedro ndac̈ho ngain:

―Ján, soixin noha que ján rinaho.

Jesús ndac̈ho:

―Mexinxin jaha darinda chojnina, jañá inchin tti ttingaria coleco dicao ciudado de ixin jehe va.

17 Ninxin nttiha joanchianguihi Jesús co ndac̈ho:

―Simón, xitsihi Jonás, ¿arinao na?

Pedro tavechín ixin Jesús joanchianguihi ninxin nttiha ixin arinao jehe Pedro Jesús. Co Pedro ndac̈ho ngain Jesús:

―Soixin noha cainxin. Soixin noha que janha ján rinaho soixin.

Jesús ndac̈ho ngain:

―Mexinxin darinda chojnina, jañá inchin tti ttingaria coleco dicao ciudado de ixin jehe va. 18 Janha rrindattjo ndoa que jaha are ẍa joarihi icha chjan, jaha vaguitoxinha co savacji tti jaha vajinao, pero are otsonttaxí, jaha tsinxe rá co ojé ni sinttangá lonttoa, co tsjiho na tti jaha sinaoha tsji.

19 Are Jesús ndac̈ho jihi, jehe jinchequinxin na ixin queẍén senhe Pedro, co ixin jehe Pedro jañá sinchesayehe Dios. Cottimeja ndac̈ho Jesús ngain Pedro:

―¡Jaha nchehe sigue ditticaon na!

20 Are Pedro ngaria, jehe vicon que nttiha jirroé tti chojni que Jesús anto joinao, ẍajeho tti vehe ngaca Jesús are joine na ngain quiai pascua co joanchiangui ngain Jesús co ndac̈ho: “Soixin, ¿quexehe tti tsjagoe chojni que ningaconha ttinó ttjen soixin?” 21 Co are Pedro vicon jehe mé, jehe Pedro joanchianguihi Jesús co ndac̈ho:

―Xí jihi, ¿queẍén tsonhe xa?

22 Jesús ndac̈ho ngain Pedro:

―Si janha rinaho que jehe xa sechon xa hasta que are janha rrocjan na sihi iná, ¿jaha quehe ndosán? Jaha nchehe sigue ditticaon na janha.

23 Mexinxin ẍaxaon icha chojni que vacao Jesús que ixin jehe mé rroguenha. Pero Jesús ndac̈hoha ngain Pedro ixin chojni mé rroguenha, Jesús jeho ndac̈ho que: “Si janha rinaho que jehe xa sechon xa hasta que are janha rrocjan na sihi iná, ¿jaha quehe ndosán?”

24 Jehe chojni mé, mé tti janha, co janha tti vicon cain cosa jihi, co cjin na cain jihi. Co noa na que ndac̈hjan ndoa.

25 Cai jí icha cosa que Jesús joinchehe, pero si rroguetaxin ná co ná cosa mé, janha ẍaxanho que ngoixin mundo rroguittjaha rroguingachjian cain libro que rroguetaxin cain cosa mé. Amén.