RUD
Oaralap en Pwuhk wet
Koasoi meleilei en Rud wiawi ni mwehi suwed en Sounkopwung kan. Rud, lihen Mohap men, me pwoudiki ohlen Israel men. Ni eh pwoudo eh melahr, Rud ahpw kasalehiong en eh pwoudo eh nohno eh nan kapehd loalopwoat oh kehlail ong Koht en Israel. Kedekedeo, Rud eri diarada eh pwoud kapw, ohl emen sang nanpwungen kisehn eh pwoud en mahso. Eri, sang ni pwopwoud wet e ahpw wiahla nohnohn nohno kahlap en Depit, nanmwarki me keieu lapalap rehn nanmwarkien Israel kan.
Koasoi kan en nan pwuken Sounkopwung kan kin kadehdehda duwen paisuwed me kin lelohng sapwellimen Koht aramas akan ni ar kin sohpeisang. Pwuhken Rud ahpw kadehdehda duwen paiamwahu me kin kohong mehn liki men me kin sohpeiong Koht en Israel oh wiahla kisehn sapwellime aramas loalopwoat akan.
Audepe ni Oaralap
Naomi wa Rud pwuralahng Pedleem 1.1-22
Rud tuhwong Pohas 2.1—3.18
Pohas pwoudikihda Rud 4.1-22
1
Elimelek oh Eh Peneinei Kolahng nan Mohap
1-2 Mahsie, ni ahnsou me mehn Israel kan saikinte ahneki nanmwarki, lehk lapalap ehu ahpw wiawi nan wehio. Eri, ohl emen ede Elimelek, kisehn peneineien Eprat me kin kousoan Pedleem nan wehin Suda, e ahpw kolahng keiru nan wehin Mohap, iangahki eh pwoud oh neira pwutak riemen, Mahlon oh Kilion. 3 Eri, Elimelek ahpw mehla oh Naomi kelehpwkilahr neira pwutak riemeno, 4 me pwoudkidahr serepein en Mohap riemen: eden emen Orpa, a eden emen Rud. Mwurin sounpar eisek, 5 Mahlon oh Kilion ahpw pil mehla, oh Naomi kelehpwlahr, solahr nah pwutak riemeno oh eh werek.
Naomi oh Rud Pwuralahng Pedleem
6 Mwurin ahnsou kis Naomi ahpw rongada me KAUN-O ketin kupwuramwahwihalahr sapwellime aramas akan ni eh ketikihong irail pweidahn wahn sapwarail kan. Eri, liho ahpw kaunopada en mweselsang wehin Mohap iangahki en nah pwutak riemeno ara pwoud ko. 7 Irail eri mwesel pwuralahng wehin Suda. 8 Eri, ni arail kohkohla nanialo, Naomi ahpw ndaiong ira, “Kumwa pwuralahng ni imwamwa ko rehn amwa nohno. KAUN-O en ketin kupwurei kumwa, nin duwen amwa pil wia mwahu ong ie, oh pil ong amwa pwoud me melahr ako. 9 Oh KAUN-O en pil ketin kupwure pwe kumwa en pil pwurehng pwopwoudida, pwe en mie amwa peneinei oh wasahn kousoan.”
Naomi ahpw metik ira oh kamwurimwuriong ira. Ira ahpw sengiseng 10 oh ndahng, “Soh! Se pahn ianguhkewei rehn omw aramas akan.”
11 Naomi ahpw sapeng ira, nda, “Nei serepein kompoakepahi, kumwa uhdahn pahn pwurowei. Dahme kumwa men iangiehki? Pala I pahn kak pwurehng neitik pwe kumwa en pil pwoudikihda nei pwutak kan? 12 Kumwa pwurowohng nan amwa peneinei; pwe I mahlahr, solahr kak pwurehng pwopwoudida. Ia duwe, ma I pahn koasoia me I koapworopworki me I pahn pwurehng pwopwoudida, de ma I pil pahn pwopwoudida pwohnget oh naitikihedi pwutak, 13 kumwa pahn men awiawi lao ira laudla pwe kumwa en pil pwoudikihda? Met pahn kak irehdihsang kumwa en pwoudikihda emen tohrohr? Nei kompoakepahi ko, kumwa ese me soahng wet sohte kak wiawi, pwe KAUN-O solahr ketin kupwure ie. I inenen poakeikumwahla.”
14 Ira eri pwurehng sengiseng. Eri, Orpa ahpw metik Naomi oh kamwurimwuriong, e ahpw pwuralahng rehn kiseh kan; ahpw Rud sohte men mweselsang Naomi.
15 Naomi eri ndaiong Rud, “Kilang! Serepein me kumwa pwoudiki pirien ehuo e pwuralahngehr rehn eh peneinei oh eh koht. Kohla iangih pwuralahng rehn omw peneinei.”
16 Rud ahpw sapeng, nda, “Ke dehr nda I en pwuralahsang uhk; ke dehr irehdihsang ie I en iang uhk. Wasa kis ke pahn kohla ie, iei wasa me I pil pahn kohla ie; wasa kis ke pahn kousoan ie, iei wasa me I pil pahn kousoan ie. Kisehmw kan iei kisehi; oh omw Koht iei ei Koht. 17 Wasa ke pahn mehla ie, iei wasa me I pil pahn mehla, oh seridi ie. I kahukihla me sohte mehkot pahn kak kadohwankitapeseng, mehlahte.”
18 Eri, ni Naomi eh esedahr me Rud ngoangki mehlel en iangih, e ahpw sohla koasoia mehkot.
19 Ira ahpw seiseiloak lao lel Pedleem. Eri, ni ara lelehr wasao, aramas akan koaros inenen pwuriamweiki mehlel, oh lih akan ahpw nda, “Kaidehn Naomi met?”
20 Naomi ahpw sapeng irail, nda, “Kumwail dehr ekerkin ie Naomi, ahpw kumwail ekerkin ie Mara,a NAOMI...MARA: Ni mahsen en Ipru Naomi wehwehki “nsenammwahu” oh Mara wehwehki “pahtou.” pwehki Koht Wasa Lapalap, ketikihong ie apwal laud. 21 Ni ei mweselsang wasaht, I ahneki soahng tohto; a KAUN-O ahpw ketin kapwureiehdo kahiep. Dahme kumwail kahdanekiniehki Naomi, ni KAUN-O Wasa Lapalap, eh ketin keriaielahr oh wiakauweielahr?”
22 Eri, iei met duwen Naomi eh pwurodo sang wehin Mohap, iangahki Rud, lihen Mohap men me pwoudikihda nah pwutak. Ira ahpw lel Pedleem nin tepin ahnsoun dolung wahntuhke parli.