16
Sohp
1-2 I rongehr soangen lokaia kan mahs;
kansenamwahu me kumwail kihong ie, wia lokolok ehu rehi.
3 Kumwail pahn wie koasoakoasoi kohkohlahte?
Sohte pahn imwin amwail koasoi kan?
4 Ma kumwail me mi nan dewei, a ngehi nan dewemwail,
I kak koasoia mehkoaros me kumwail koasoakoasoia.
I kak itikala moangei ni mwomwen loalokong
oh kapwilewei ei koasoi.
5 I kak kakehlakahkin kumwail ei kaweid
oh wiewia koasoi kansenamwahu ong kumwail.
6 Ahpw ei koasoi kan sohte kak wia mehn sawas,
oh ei nennenla sohte kameleileidi ei medek.
7 Maing Koht, komwi ketin katioweielahr;
komwi ketin mweidohng ei peneinei en mehla.
8 Komwi ketin koliedier; komwi me ei imwintihti.
Tih oh kiliet me luhwehdi,
oh aramas kin wiahki me met iei kadehdehpen dipei.
9 Koht ketin dapengpeseng paliwerei nan sapwellime engieng;
e kin ketin kamoakamoale ie nan sapwellime engieng.
10 Aramas kin kepitkin ie;
re kin kapiliepene oh pohr meseiet.
11 Koht ketin mweidielahr nan pehn aramas suwed kan.
12 Mahs I kin momour ni popohl,
ahpw Koht ketin koledier tepinwerei
oh wokih ie oh kauweiehla.
Koht ketin wiahkin ie wasahn sosohng en kesik
13 oh kin ketin kadarodohng ie arep sang wasa koaros—
arep me kin lel ie oh kauweiehla;
ahpw e sohte kin ketin poakeiehla.
14 E kin ketin kauweiehla pak tohto;
e kin ketin kasikih ie duwehte sounpei men me sahlielkilahr eh lingeringer.
15 I kin mwahiei oh likawih likoun nsensuwed,
oh lohdier oh mwomwohd nan pwelpar.
16 I sengisengehr lao poaren mesei kat weitahtahla,
oh poaren mesei kat mpwospeseng oh toal pahn kilin mesei kat,
17 ahpw I sohte dipikihda mwekid suwed ehu,
oh ei kapakapohng Koht me mehlel.
18 Oh Sampah, ke dehr ekihla sapwung kan me wiawihong ie!
Ke dehr mweidohng ngilen ei peki sawas en pwuhng en nennenlahte!
19 Mie emen me ketiket nanleng
me pahn iangiehla oh uhpalihkin ie. Sohp 19.25.
20 Kompoakepahi kan kin kepitkin ie;
poaren mesei kin kakerehdi pilen mesei ong Koht.
21 I men emen en sewese ie rehn Koht,
duwen aramas emen eh kin pekipeki sawas ong kompoakepah.
22 Ei sounpar akan samwalahr,
oh I alialu nan ahlo me sohte me kin pwurala mwuri.