1 Pɔlʋ kɔ Silasɩ 'hʋɛn‑, 'kɩ ʋ naa 'lɩ Afipolisɩdɩɔ kɔ Apolonidɩɔ 'kwli, 'ʋ nyre 'lɩ Tesalonikɩdɩɔ 'kwli, ('ʋ pa 'lɩ Jasɔ ‑mɔ.) 'Kɩ 'lɩ 'dɩɔ a 'mʋ 'kwli, 'kɩ Nyɩsʋa a 'kayu nɩ 'lɩ, ‑ɛ kɔ bʋ ‑Juukʋɛ*, ʋ yɩ 'lɩ lɛ 'kukue ‑nɩ, 'a ‑nɛ ti. 2 'Kɩ Pɔlʋ mu 'lɩ, 'kɩ 'lɩ ‑wuwle‑nyrɔwɔ* 'kwli, ꞊wɩ yɩ, ‑tɛ ɛ ni꞊e lɛ. 'Kɩ 'lɩ ‑wuwle‑nyrɔwɩ nɩ ta 'kwli, nyibli ‑mʋ', ‑ʋ nɩ 'ʋ, 'ɛ ‑hɩhɩa ꞊nʋ Nyɩsʋacrɩɛn klɛ, 3 'ɛ tɔɔ ꞊nʋ, ‑ɛ mɔ, Wanyɔ ‑mʋ', Nyɩsʋa pʋ la lɛ, ɛ di la ya, Wanyɔ a 'mʋ, ɛ kɔ bʋ 'ye ꞊hɩʋɛn, ɛ 'mʋ 'kʋ, 'tɩ‑ Nyɩsʋa 'mʋ 'lɩ꞊ɩ 'kʋkʋnyibli 'nyɩ ‑ha, ɛ 'mʋ꞊ʋ 'klɔ ‑ha. ‑Ɛ ‑bɩ ɛ wɛn 'nɩ de: «‑Yusu, nɔ‑ mɔ Wanyɔ a 'mʋ, ‑kɔtɩ 'n yɩ 'a mʋ ‑lee ‑nɩ.» 4 'Kɩ 'lɩ ‑Juukʋɛ ‑mʋ' 'nyɩ, ‑ʋ ‑bɩ nɩ 'lɩ, ‑tɩ a 'mʋ, Pɔlʋ ‑hla, 'ʋ kuo ꞊nɛ ꞊wlʋ yɩ, 'ʋ bi Pɔlʋ kɔ Silasɩ 'hʋɛn‑ kɩ. Glɛkɩkʋɛ ‑hʋɔhʋɩ, ‑ʋ ‑hɛ la ‑Juukʋɛ, 'tɩ‑ ‑ʋ dɛ Nyɩsʋa, dɛ nɩ ‑do a 'mʋ, ɛ nɔ‑ ʋ ‑nu, ɛ kɔ 'dɩɔ a nʋgbɩ ‑hʋɔhʋɩ, nyibli ꞊tui 'ʋ.

5 Dɛ a 'mʋ, ɛ nu꞊o nɩ, ‑Juukʋɛ a nyibli gbagbɩ 'ʋ ꞊tui ca dɩakɩ, 'ʋ 'tɩ 'crɛkɔnyibli 'hru wlɔn lɛ, 'ʋ nu꞊o, 'dɩɔ a nyibli 'ʋ 'kukue lɛ, 'ʋ ‑tʋa 'dɩɔ a ꞊gbugblolɛ, 'ʋ mu 'lɩ Jasɔ a 'kayu bʋ, ‑tɛ ‑mʋ', Pɔlʋ kɔ Silasɩ 'hʋɛn‑, ʋ pa 'lɩ. ‑Tɛ 'dɩɔ a nyibli nyre 'kɩ 'lɩ, ʋ ꞊mʋɛ Pɔlʋ kɔ Silasɩ 'hʋɛn‑ lɛ, ‑ɛ di꞊e nu, ʋ 'mʋ 'lɩ ꞊nʋ nyibli yɩ gba. 6 Kɛɛ, ʋ 'yɩ 'lɩ ꞊nʋ bʋ ‑yɛɛ ‑nɩ. Ɛ nɔ‑ mɔ bʋ klɔ Jasɔ a 'mʋ, kɔ ‑Yusu a nyibli ‑bɩ 'hʋɛn‑, 'ʋ gba 'lɩ ꞊nʋ 'dɩɔ a ye'nanyʋ yɩ, 'ʋ ‑tʋa lɛ'gbugbolɛ, ʋ wɛn: «Nyibli ‑bʋ, ʋ ꞊gbugblo 'blʋgba a pɛpɛ ‑bʋ nɩ. ‑Ɛ ‑bɩ, kɩkɛ bʋ, ʋ nʋ‑ 'hrɩɩ kɛ 'nɛ‑ ‑a mʋ ‑mɔ, 7 'tɩ‑ Jasɔ 'ɛ 'ble ꞊nʋ kʋa, 'kɩ 'lɩ 'a 'kayu bʋ. Nyibli a 'mʋ, ʋ 'nɩ ꞊tuu꞊o 'ʋ Romakʋɛ a 'kɩɩn gbagbʋ a tete 'ʋ. Ʋ wɛn 'nɩ, 'kɩɩn ‑bɩ nɩ 'ʋ. 'A 'nyrɛ mɔ ‑Yusu.» 8 ‑Tɛ ʋ 'wɩn windʋ a 'mʋ, yrʋ 'yii 'ʋ nyibli kɔ 'dɩɔ a ye'nanyʋ 'hʋɛn‑ nɩ. 9 ‑Ɛ ‑bɩ 'dɩɔ a ye'nanyʋ a 'mʋ, ʋ lee Jasɔ kɔ 'a 'bio ‑Yusu a nyibli ‑bɩ 'hʋɛn‑ nɩ, bʋ ‑ha 'wli, ‑ɛ di꞊e nu, ʋ 'mʋ ꞊nʋ bʋ tɛ. ‑Tɛ ʋ ‑ha 'kɩ 'wli a 'mʋ, 'tɩ‑ 'ʋ tɛ ꞊nʋ bʋ.

10 ‑Tɛ 'tɔ ‑wɔn, ‑ɛ ‑bɩ ‑Yusu a nyibli a 'mʋ, ʋ nu꞊o nɩ, Pɔlʋ kɔ Silasɩ 'hʋɛn‑, 'ʋ mu 'lɩ Beledɩɔ 'kwli. ‑Tɛ ʋ nyre 'lɩ, ‑ɛ ‑bɩ 'kɩ ʋ mu 'lɩ Nyɩsʋa a 'kayu bʋ, ‑tɛ ‑Juukʋɛ* yɩ 'lɩ lɛ 'kukue ‑nɩ 'a ‑nɛ ti. 11 ‑Juukʋɛ ‑mʋ', ‑ʋ nɩ 'lɩ Bele, ‑tɛ ‑mʋ', Tesalonikɩdɩɔ a nyibli nɩ 'mʋ, ʋ 'yɩ 'mʋ lɛ ‑nɩ. Kɛɛ, Nyɩsʋa a ‑tɩ ‑mʋ', Pɔlʋ lee ꞊nʋ, 'waa ꞊wlɩ 'ble꞊e kʋa ‑tɛɛ. Ʋ nʋɛ bʋ pʋ Pɔlʋ nʋa yɩ bʋ. 'A ‑nɛ ‑nyrɔwɔ, kɛ‑ ʋ ni, 'ʋ tɛ 'lɩ Nyɩsʋacrɩɛn 'kwli lɛ, ‑ɛ di꞊e nu, ʋ 'mʋ꞊ʋ 'ye, 'bʋ mɔ, ‑tɩ a 'mʋ, Pɔlʋ tɔɔ ꞊nʋ, 'bʋ mɔ ꞊han‑tɩ. 12 'Kɩ 'lɩ ‑Juukʋɛ a 'mʋ 'nyɩ, 'waa ‑hʋɔhʋɩ, nʋ‑ kuo ‑Yusu ꞊wlʋ yɩ, 'kɩ 'lɩ Glɛkɩkʋɛ 'nyɩ, dɛkɔnʋgbɩ ‑hʋɔhʋɩ, kɔ nyɩbɛpʋ ‑hʋɔhʋɩ 'ʋ kuo ‑Yusu ꞊wlʋ yɩ. 13 ‑Tɛ ti gbi ‑hi, ‑ɛ ‑bɩ ‑Juukʋɛ ‑mʋ', ‑ʋ nɩ 'lɩ Tesalonikɩ, ʋ 'wɩn nɩ, ‑ɛ mɔ, Pɔlʋ nɛ Nyɩsʋa a ‑tɩ ‑mɔ lɛ, 'kɩ 'lɩ Bele. Nɔ‑ mɔ bʋ di Bele, bʋ hlee 'lɩ nyibli ‑mɔ, 'kɩ bʋ pʋʋ Pɔlʋ yrʋ lɛ. 14 Nɔ nu꞊o, ‑Yusu a nyibli 'ʋ gba Pɔlʋ 'hru wlɔn, 'kɩ 'lɩ 'yru wien. Silasɩ kɔ Timote 'hʋɛn‑, ʋ nʋ‑ ‑mɔ ‑bɩ, ʋ 'yɩ ‑mu. 'Kɩ ʋ 'tɩɛ nɩ 'lɩ Bele. 15 Nyibli ‑mʋ', ‑ʋ gba Pɔlʋ 'hru wlɔn, ʋ gba꞊a ‑gbagba, 'ʋ nyre 'lɩ Atɛnɩdɩɔ 'kwli, 'tɩ‑ 'ʋ ꞊hɩan ‑mɔ, 'ʋ di Bele. ‑Tɛ ʋ yɩ nɩ di, Pɔlʋ pʋ ꞊nʋ titie, 'kɩ bʋ lee Silasɩ kɔ Timote 'hʋɛn‑, bʋ kʋɛ꞊ɛ ꞊wien, ti nɩ ‑do a ti 'yri, 'bʋ mɔ, 'hru 'bʋ pɛ 'ʋ ꞊nʋ 'yie bʋ.

16 'Kɩ Pɔlʋ nɩ 'lɩ Glɛkɩkʋɛ a 'dɩɔ ‑mʋ', ‑ɛ mɔ Atɛnɩ 'kwli, 'ɛ yɩ Silasɩ kɔ Timote 'hʋɛn‑ ‑ple. 'Kɩ ɛ 'yee 'ʋ tuyonʋ. Tuyonʋ a 'mʋ, ʋ nu 'hɩ, 'ʋ nu ꞊nʋ, 'ʋ ‑hʋʋ 'lɩ 'dɩɔ a 'mʋ 'kwli. ‑Tɛ Pɔlʋ 'ye ꞊nʋ, ‑ɛ ‑bɩ ɛ bi yrʋ', 'ɛ kɛɛ nɛ 'a ꞊wlʋ lɛ. 17 'A ‑nɛ ‑nyrɔwɔ, 'kɩ 'lɩ Nyɩsʋa a 'kayu bʋ, kɛ‑ ɛ ni, 'ɛ yɩ 'lɩ ‑Juukʋɛ* ‑mɔ ‑hlee ‑nɩ, ɛ kɔ nyibli ‑mʋ', ‑ʋ ‑hɛ ‑Juukʋɛ, 'tɩ‑, ‑ʋ dɛ Nyɩsʋa, ɛ kɔ, 'a ‑nɛ nyiblo ꞊dʋ, nʋ‑ ɛ yɩ 'lɩ ‑mɔ ‑hlee ‑nɩ, 'kɩ 'lɩ 'dika. 18 Ɛ kɔ 'lulɛ‑hienyʋ ꞊dʋ, 'ʋ dɛɛ ꞊nʋ Epikulinyibli, kɔ Sitoinyibli. Ɛ kɔ ꞊nʋ 'hʋɛn‑, ʋ nʋ‑ yɩ hle. 'Kɩ 'lɩ ꞊nʋ 'nyɩ, ‑ʋ ‑bɩ wɛn 'nɩ: «Winlɛpʋnyɔ ‑bʋ, ‑bɩ' ɛ pɩ 'lɩ?» ‑Ʋ ‑bɩ nɩ 'ʋ, ‑tɛ ʋ 'wɩn, ‑ɛ mɔ, Pɔlʋ hla ‑Yusu a ‑tɩ, kɔ ‑Yusu kɔ ‑tonyibli 'hʋɛn‑ bʋ ‑hɔn 'lɩ 'kʋkʋnyibli 'nyɩ a ‑tɩ, ‑ɛ ‑bɩ ʋ wɛn: «Ɛ 'wɩ yɩ, dakɔ ‑bɩ a 'kuo a ‑tɩ ɛ hlɛ.» 19 ‑Ɛ ‑bɩ ʋ gba꞊a nɩ, 'kɩ 'lɩ 'dɩɔ a ‑gbolugbo yɩ, ‑ʋ yɩ lɛ 'kukue ‑nɩ, 'kɩ 'lɩ dʋgba ‑mʋ', ʋ dɛɛ Aleopasɩ 'lu, ʋ wɛn: «Tɔɔlɛ ‑bʋ, ‑yɛ 'lɩ, ɛ mɔ tɔɔlɛ yrayrʋ ꞊nɩɔ, 'kɩ 'ʋ ‑a mʋ ‑mɔ. ‑A ‑hʋɛ꞊ɛ nɩ, ‑bʋ yruo nɛ ‑a mɔ꞊ɔ lɛ, 20 ‑kɔtɩ ‑tɛblɩ ‑bʋ, ‑nɛ ‑mɔ lɛ, ɛ kɛɛ nɛ ‑aan ꞊wlɩ lɛ. 'A ‑tɩ, ‑a ‑hʋɛ꞊ɛ nɩ, ‑bʋ nu꞊o, ‑ba yru 'a 'mini lɛ, ‑a 'mʋ꞊ʋ yi, dɛ ɛ ꞊hɛn 'nyrɛ.» 21 Atɛnɩ a nyibli kɔ 'dagbɩ ‑mʋ', ‑ʋ 'ti 'lɩ Atɛnɩ, 'a ‑nɛ ti, kɛ‑ ʋ ni, 'ʋ yɩ lɛ 'kukue ‑nɩ, ‑ɛ di꞊e nu, ‑tɩ yrayrɩ ‑mʋ', ʋ 'wɩn, ʋ 'mʋ꞊ʋ 'waa 'bio ‑lee ‑nɩ.

22 Nɔ‑ mɔ Pɔlʋ bʋ 'du ye', 'kɩ 'lɩ ꞊nʋ 'nyɩ, bʋ pʋ lɛ: «'A mʋ Atɛnɩkʋɛ, 'n yɩ꞊ɩ 'nɩ 'ye, ‑ɛ mɔ, a mɔ nyibli ꞊nɩɔ, ‑ʋ ꞊tui 'ʋ 'kuo a gblegble 'ʋ dɩakɩ. 23 ‑Tɛ 'n nɛ wɛn 'aan 'dɩɔ 'kwli lɛ, 'n 'ye 'aan 'kuo a daalɛ a gblegble nɩ, 'nɩ 'ye ‑cɔhlʋnpiilɛ* ‑mʋ', ‑ɛ kɔ ye' ʋ 'crɩɩ 'ʋ, ‑ɛ mɔ: ‑cɔhlʋnpiilɛ ‑bʋ, ‑a nu꞊o nɩ, 'kɩ 'ʋ Nyɩsʋa ‑mʋ', ‑a 'yɩ ‑yi ‑mɔ. 'A ‑tɩ, Nyɩsʋa ‑bʋ, a 'yɩ ‑yi, nɔ‑ kɔ ‑tɩ 'n di 'a mʋ ‑lee ‑nɩ. 24 Nyɩsʋa a 'mʋ, nɔ‑ nu 'klɔ ‑bʋ, ɛ kɔ 'a ‑nɛ dɛ, ‑ɛ nɩ 'nɛ‑ 'klɔ a 'mʋ kɩ. Ɛ nɔ‑ mɔ yakɔ kɔ ‑tʋtʋ a Kʋkɔnyɔ. 'Kayo ‑mʋ', ‑tonyibli ‑pʋ, ɛ 'yɩ꞊ɩ 'pa‑, Nyɩsʋa 'yɩ 'lɩ꞊ɩ bʋ ‑nɩ. 25 Ɛ 'nɩ ‑hʋa꞊a lɩ꞊ɩ ‑tonyiblo bʋ pie ꞊nɛ ‑cɔhlʋn*, ‑kɔtɩ ɛ nɔ‑ nu ‑tonyibli, ɛ nɔ‑ yɩ ꞊nʋ ‑hʋnhlʋn kɔ ‑tɛblɩ a pɛpɛ 'hʋɛn‑ ‑nyi, ‑ɛ nu ‑tɛɛ, 'kɩ 'ʋ ꞊nʋ ‑mɔ. 26 'Kɩ ɛ naa 'lɩ nyiblo nɩ ‑do ‑mʋ', ‑ɛ mɔ Adamʋ 'lɩ, 'ɛ nu 'klɔ ‑bʋ a dakɔ a pɛpɛ, 'tɩ‑ 'ɛ ꞊tu ꞊nʋ blɛ, 'ɛ ‑nyi ꞊nʋ bʋnɩɩlɛ, 'kɩ 'nɛ‑ ‑tʋtʋ a pɛpɛ kɩ. Ɛ nɩ ‑do a 'mʋ, ɛ nɔ‑ wa dakɔ a 'blʋ‑paʋn 'nyrɛ lɛ, ɛ kɔ, ti ‑mʋ', dakɔ a 'mʋ, ʋ di 'ʋ ‑hi. 27 Ɛ nu ‑tɛblɩ a pɛpɛ a 'mʋ nɩ, ‑ɛ di꞊e nu, ‑tonyibli 'mʋ꞊ʋ lɛ ꞊mʋɔ, 'bʋ yɩ꞊ɩ lɛ nɩ ꞊mʋɛ, ʋ 'mʋ꞊ʋ kɩ yɛ. Ɛ mɔ ꞊han‑tɩ ꞊nɩɔ, Nyɩsʋa 'yɩ nyiblo ꞊dʋ ‑mɔ lɛ ‑hlɔɔ ‑nɩ, 28 ‑kɔtɩ kɛ‑ ʋ ‑pʋ: Nyɩsʋa, nɔ‑ ni꞊e, ꞊a pɩ ‑hʋnhlʋn, ꞊a nɩ 'klɔ, ꞊a yɩ lɛ ‑hihie ‑nɩ. Dɛ nɩ ‑do a 'mʋ, ɛ nɔ‑ 'aan 'crɩɩn.yinyʋ ‑bɩ 'crɩ, ‑ɛ mɔ: ‑Aan 'mumu, ‑a mɔ 'a 'yonʋ ꞊nɩɔ. 29 ‑Tɛ ‑a mɔ Nyɩsʋa a 'yonʋ, ‑a 'yɩ yɩ ‑blɛɛ ‑nɩ, ‑ba pʋ꞊ʋ ꞊han‑tɩ, ‑ɛ mɔ, Nyɩsʋa 'wɩ‑ tuyu yɩ, ʋ nu ‑gʋlʋ, kɔ 'plɩdɛ, kɔ 'hɩɔ, ʋ ‑nu, 'kɩ 'lɩ ‑tonyiblo a 'srɛ, kɔ 'a dɩɔnʋ a 'lulɛ‑hihie 'kwli. 30 Ti ‑mʋ' ‑kɔ 'yri ‑tonyibli 'yɛ la 'ʋ Nyɩsʋa nɩ ‑yii ‑nɩ, 'kɩ ɛ kɔ la ꞊wlʋ a 'lɩla, 'kɩ 'ʋ ꞊nʋ ‑mɔ. Kɛɛ, ‑tɛ ti nɛ ‑bʋ, Nyɩsʋa yɩ nyibli a pɛpɛ 'nɩ ‑lee ‑nɩ, ‑ʋ nɩ 'ʋ 'a ‑nɛ ‑tɩtɛ ꞊dʋ, 'kɩ bʋ hie 'ʋ 'waa ‑tɛblɩ 'kukui a pɛpɛ, ʋ ni bʋ, bʋ ꞊hɩan ‑mɔ, bʋ ‑nyi 'waa 'klɔ a pɛpɛ Nyɩsʋa. 31 'Tɩ‑, ɛ wa ‑nyrɔwɔ 'nyrɛ, ‑ɛ kɔ 'kwli ɛ di 'ʋ nyibli a pɛpɛ ‑bati lɛ ‑pʋʋ ‑nɩ, 'kɩ 'lɩ 'a yɩ'siilɛ 'kwli. 'Bʋ 'mʋ ‑bati a 'mʋ pʋ, nyiblo nɩ ‑do ‑mʋ', 'a ꞊gbɛtʋ ɛ wa 'nyrɛ, ɛ nɔ‑ ɛ di 'lɩ ‑naa ‑nɩ. Nyiblo a 'mʋ, nɔ‑ ɛ ‑ha 'lɩ 'kʋkʋnyibli 'nyɩ, ɛ ‑ha 'klɔ. Kɛ‑ ɛ nu nyibli a tɔɔlɛ, ‑ɛ mɔ, ‑tɛblɩ a 'mʋ, ɛ pʋ 'lɩ, ɛ di꞊e 'nɩ nu.»

32 ‑Tɛ ʋ 'wɩn ‑tɩ a 'mʋ, Pɔlʋ ‑hla, ‑ɛ mɔ, nyiblo bʋ 'kʋ, 'tɩ‑ bʋ 'hrɩ 'klɔ, ‑ɛ ‑bɩ ‑ʋ ‑bɩ ‑tʋa 'a 'caalɛ, ‑ʋ ‑bɩ wɛn: «‑A di pʋ ‑mʋ nʋa yɩ bʋ, ‑nyrɔwɔ ‑bɩ 'kwli, ‑tɩ nɩ ‑do ‑bʋ, ‑na ‑mɔ lɛ, ꞊mʋ꞊ʋ ‑mɔ lɛ na de.» 33 ‑Tɛ ʋ pʋ 'kɩ lɛ, ‑ɛ ‑bɩ ʋ kɔ Pɔlʋ 'hʋɛn‑, ʋ ‑hɩhɩɛ yrɛ. 34 Kɛɛ, 'kɩ 'lɩ ꞊nʋ 'nyɩ, ɛ kɔ nyibli ‑bɩ, 'ʋ bi Pɔlʋ kɩ, 'ʋ kuo ‑Yusu ꞊wlʋ yɩ. 'Kɩ 'lɩ nyibli a 'mʋ 'nyɩ, ‑ɛ ‑bɩ nɩ 'lɩ, 'a 'nyrɛ mɔ Denisɩ. Ɛ mɔ 'dɩɔ a ‑gbolugbo a nyiblo ‑bɩ ꞊nɩɔ. Nʋgba nɩ 'ʋ ‑wɛ; 'a 'nyrɛ mɔ Damalisɩ, kɔ, nyibli ‑hʋɔhʋɩ ‑bɩ nɩ 'ʋ, 'ʋ kuo ‑Yusu ꞊wlʋ yɩ.