1 'Mɔ ‑bʋ, ‑ɛ mɔ 'cʋɛ a ye'nanyɔ, 'mɔ ‑yɩ 'aan 'cʋɛ, ɛ kɔ 'a nyibli a pɛpɛ 'hʋɛn‑ ‑mɔ 'crɩɩ ‑nɩ. 'N nʋɛ nɛ 'a mʋ nɩ ‑tɛɛ. Ɛ 'yɩ 'mɔ nɩ ‑do 'pa‑, 'n 'yɩ 'a mʋ ‑nʋɛ ‑nɩ. Nyibli a pɛpɛ ‑bʋ, ‑ʋ yi Nyɩsʋa a ‑tɩ a ‑tɛɛ, ʋ nʋɛ nɛ 'a mʋ nɩ ‑wɛ. 2 'N nʋɛ nɛ 'a mʋ nɩ, ‑kɔtɩ a kɔ 'mʋ 'hʋɛn‑, ‑a yi Nyɩsʋa a ‑tɩ a ‑tɛɛ nɩ, 'kɩ 'lɩ ‑aan ꞊wlɩ kɩ, kɔ, ɛ 'mʋ 'lɩ ‑aan ꞊wlɩ kɩ 'cibi ‑nɩ 'a ‑nɛ ti.

3 ‑Aan 'Baɩ Nyɩsʋa kɔ 'a 'Yu ‑Yusu 'Klɩsʋ 'hʋɛn‑, ʋ di nu ‑a mʋ ꞊haandɛ ‑mɔ, kɔ, ʋ 'mʋ ‑aan nyaɩ yru, kɔ, ʋ 'mʋ ‑a mʋ kɩbʋwɛɛnlɛ ‑nyi. ‑A mʋ ‑mʋ', ‑ʋ yɩ ‑tɩ a ‑tɛɛ ꞊wien lɛ kʋɛ, 'tɩ‑, ‑ʋ nʋnʋɛ ‑nɩ, kɛ‑ ɛ di 'mʋ ꞊ti, 'kɩ 'ʋ ‑a mʋ ‑mɔ.

4 'N kɔ mɔ plɔ a bleelɛ dɩakɩ, ‑tɛ 'n 'wɩn mɔ, ‑ɛ mɔ, 'aan 'cʋɛ a nyibli ‑bɩ, ʋ nɛ ‑tɛɛ a 'hru. ‑Tɛ ‑aan 'Baɩ Nyɩsʋa pʋ lɛ, ‑ba nu ‑tɛblɩ a nunuo, kɛ‑ ʋ ni 'a nunuo. 5 'A ‑tɩ o, 'a mʋ 'cʋɛ a nyibli a pɛpɛ, dɛ 'n ‑hʋɛ ꞊bʋ lee nɛ 'a mʋ, ɛ nɔ‑ mɔ ‑ba nʋnʋɛ ‑nɩ. Dɛ a 'mʋ, ɛ 'yɩ tetebʋ yrayrʋ 'pa‑, a 'yɩ ‑hʋan nɩ 'wɩn. Ɛ mɔ tetebʋ ꞊nɩɔ, a 'wɩn, kʋɛ la 'lɩ ti ‑mʋ' 'yri bʋ, ‑ɛ kɔ 'yri ʋ ꞊tuu la 'ʋ ‑Yusu 'Klɩsʋ a ‑tɩ a hɩhla ‑wlu. 6 'Bʋ mɔ, ꞊ba nʋɛ Nyɩsʋa kɔ nyibli 'hʋɛn‑, ‑ɛ ‑bɩ ɛ ꞊hɛn 'nyrɛ, ‑a ꞊tui 'ʋ Nyɩsʋa a tete nɩ. ‑Tɩ ‑mʋ', a 'wɩn, kʋɛ la 'lɩ ti ‑mʋ' 'yri bʋ, ‑ɛ kɔ 'yri ʋ ꞊tu la 'ʋ ‑Yusu 'Klɩsʋ a ‑tɩ a hɩhla ‑wlu, ɛ nɔ‑ mɔ, ba nʋnʋɛ ‑nɩ.

7 'N yɩ 'a mɔ꞊ɔ 'nɩ ‑lee ‑nɩ, ‑kɔtɩ hɩlɛkɔnyʋ ‑hʋɔhʋɩ, nʋ‑ 'hrɩɩ 'nɛ‑ 'klɔ ‑bʋ kɩ. Ʋ 'yɩ꞊ɩ kɩ ‑wɛn, ‑ɛ mɔ, ‑Yusu 'Klɩsʋ ‑hɛ ‑tonyiblo, 'ɛ di 'nɛ‑ 'klɔ kɩ. Nyiblo 'bʋ yɩ 'pʋplɛ lɛ nɩ ni, ɛ mɔ ‑Yusu 'Klɩsʋ a yraanyɔ ꞊nɩɔ, ‑ɛ kɛɛ nyibli. 8 'A ‑tɩ, ba ꞊tu 'aan dɩɔnʋ 'yie, ‑ɛ di꞊e nu, ‑kʋan a pɛpɛ, a ‑nu, ɛ 'nɩ ꞊ha dadʋ' pa, kɛɛ, a 'mʋ ꞊haandɛ ‑mʋ' 'ye, Nyɩsʋa pʋ lɛ, ɛ di 'a mʋ ‑mɔ nu.

9 Ba kɔ 'a yiyie, 'bʋ mɔ, nyiblo 'bʋ 'yɛ nɩ na 'hru ‑mʋ', ‑Yusu 'Klɩsʋ tɔɔ nɛ ‑a mʋ, kɛɛ, 'bʋ yɩ yɩ nɩ ‑bii ‑nɩ, 'bʋ yɩ ‑tɛblɩ ‑bɩ nɩ ni, nyiblodʋ a 'mʋ, ɛ 'yɩ Nyɩsʋa ‑yi. Kɛɛ, nyiblo 'bʋ nɩ 'ʋ, 'hru ‑mʋ', ‑Yusu tɔɔ nɛ ‑a mʋ, 'bʋ yɩ꞊ɩ nɩ nɛ 'a ‑nɛ ti, nyiblo a 'mʋ, nɔ‑ yi ‑aan 'Baɩ Nyɩsʋa, ɛ kɔ 'a 'Yu 'hʋɛn‑. 10 'A ‑tɩ, 'n yɩ 'a mʋ 'nɩ ‑lee ‑nɩ, 'bʋ mɔ, nyiblo 'bʋ di 'lɩ 'a mʋ ‑mɔ, ‑tɛ ‑Yusu 'Klɩsʋ ni la tɔɔlɛ, 'bʋ mɔ, 'bʋ 'yɛ nɩ nu tɔɔlɛ lɛ, ‑ɛ ‑bɩ a 'nɩ 'blee 'lɩ꞊ɩ kʋa, 'kɩ 'lɩ 'aan 'kayu bʋ, kɔ, ba hlɔɔ ꞊nɛ ‑mɔ lɛ. 11 Nyibli ‑mʋ', ‑ʋ 'yɛ nɩ di꞊e ‑mɔ lɛ nɩ ‑hlɔɔ ‑nɩ, ɛ ꞊hɛn 'nyrɛ, ‑ɛ mɔ, yɩnyredɛ a 'mʋ, nyiblo a 'mʋ, ɛ ni, ɛ kɔ ꞊nʋ 'hʋɛn‑, ʋ pɛ nɩ.

12 'N kɔ ‑tɛblɩ ‑hʋɔhʋɩ ꞊bʋ lee nɛ 'a mʋ, kɛɛ, 'nɩ ‑hʋa꞊a lɩ ꞊bʋ hlaa 'nɛ꞊ɛ 'crɩɛn ‑bʋ 'kwli, ‑ɛ nu꞊o, 'n ‑hʋɛ ꞊bʋ di 'lɩ 'a mʋ ‑mɔ, ‑ɛ di꞊e nu, ‑a 'mʋ yɩ bʋ ‑nɩnɩ ‑nɩ, ‑a 'mʋ꞊ʋ hla, ‑aan dɔdʋ 'mʋ ꞊cɛ.

13 'Aan 'bio 'cʋɛ a nyibli ‑bʋ, ‑ʋ nɩ 'nɛ‑, ʋ 'bɛti 'a mʋ.