1 'Mɔ Pɔlʋ, 'mɔ ‑yɩ 'crɩɛn ‑bʋ 'crɩ. 'Mɔ ‑Yusu 'Klɩsʋ a ‑mɔnanyɔ* ꞊nɩɔ, ‑ɛ nu꞊o, ‑aan Wanyɔ Nyɩsʋa kɔ ‑Yusu 'Klɩsʋ 'hʋɛn‑, ʋ nʋ‑ lee 'mʋ. ‑Yusu 'Klɩsʋ a 'mʋ, ɛ nɔ‑ kɔ ‑bʋ nu dɛ ‑mʋ', ‑a yɩ ‑ple. 2 Timote, ‑mɔ 'n yɩ ‑mɔ 'crɩɩ ‑nɩ. 'Mɔ Nyɩsʋa naa 'lɩ, 'tɩ‑ ꞊nɩ kuo ‑Yusu ꞊wlʋ yɩ. Ɛ nɔ‑ nu꞊o, ꞊nɩ mɔ 'na 'yu. ‑Aan 'Baɩ Nyɩsʋa kɔ ‑aan Kʋkɔnyɔ ‑Yusu 'Klɩsʋ 'hʋɛn‑, bʋ nu ‑mʋ ꞊haandɛ ‑mɔ, bʋ yru ‑na nyaɩ, kɔ, bʋ ‑nyi ‑mʋ kɩbʋwɛɛnlɛ ‑wɛ.

3 ‑Ɛ ‑bɩ 'kɩ, ti ‑mʋ' ‑kɔ 'yri 'n mi la 'lɩ Masedʋanɩblʋgba 'kwli, 'n lee la ‑mʋ nɩ, ‑bʋ nɩ la 'lɩ Efɛsɩdɩɔ 'kwli bʋ. ‑Tɩ nɩ ‑do a 'mʋ, 'n lee la ‑mʋ, ɛ nɔ‑ 'n 'tɩɛ hlɛ, 'kɩ ‑bʋ nɩ 'lɩ Efɛsɩdɩɔ 'kwli bʋ, ‑ɛ nu꞊o, 'kɩ 'lɩ Efɛsɩ, nyibli ‑bɩ nɩ 'lɩ, ‑ʋ tʋɛ nyibli ‑tɩ ‑mʋ', 'n 'yɩ ꞊nʋ ‑tɔɔ ‑nɩ, 'kɩ 'ʋ Nyɩsʋa a ‑tɩ a ‑ta'. Lee ꞊nʋ, bʋ 'kee nɛ 'a nunuo. 4 Lee ꞊nʋ ‑wɛ, bʋ 'kee hɩledʋɩ a pʋpʋʋ, 'kɩ 'ʋ Nyɩsʋa a ‑tɩ ‑mɔ', kɔ, bʋ 'kee gblɛ a pʋpʋʋ ‑wɛ, 'kɩ 'ʋ ‑aan 'baɩnʋ a ꞊hrɩn a ꞊hrɩn a ‑ta'. ‑Tɛblɩdʋ a 'mʋ, ɛ ni꞊e nɩ, nyibli 'ʋ pɩ gblɛ dɩakɩ, kɛɛ, 'waa gblɛ a 'mʋ, ɛ 'nɩ ‑hɛɛ꞊ɛ nyibli, 'kɩ bʋ wɛn dɛ ‑mʋ', Nyɩsʋa ‑hʋɛ kɩ, ‑ɛ ni꞊e, 'tɩ‑ 'ʋ kue ꞊nɛ ꞊wlʋ yɩ, 'tɩ‑ Nyɩsʋa 'ɛ wɛ ꞊nʋ. 5 Dɛ ‑mʋ', ‑ɛ mɔ dɛ gbagbʋ, 'kɩ 'lɩ Nyɩsʋa a tɔɔlɛ 'kwli, ɛ nɔ‑ mɔ ‑Yusu a nyibli bʋ kɔ nʋɛlɛ. Nyiblo 'bʋ nɩ 'ʋ, 'a ꞊wlʋ 'bʋ 'sii 'ʋ yɩ, ɛ kɔ, 'bʋ 'yɛ nɩ yɛɛ ꞊nɛ ‑tɩ, 'bʋ kuo ‑Yusu ꞊wlʋ yɩ ‑tɛɛ, ‑ɛ ‑bɩ nyiblo a 'mʋ, ɛ di kɔ nʋɛlɛ a 'mʋ, ‑kɔtɩ 'n hlɛ. 6 Kɛɛ, 'kɩ 'lɩ Efɛsɩ, ɛ kɔ tɔɔnyʋ ‑bɩ, 'ʋ hie 'ʋ ꞊haantɔɔlɛ bʋ, 'ʋ pɩ gblɛ, ‑ɛ 'yɩ 'tu yɩ ‑kʋɛ. 7 Ʋ ‑hʋɛ bʋ mɔ Nyɩsʋa a tetetɔɔnyʋ gbagbɩ, kɛɛ, ‑tɩ ‑mʋ', ʋ tʋɛ ‑nɩ, ʋ 'yɩ꞊ɩ ‑yi, kɔ, ‑tɩ ‑mʋ', 'waa 'mumu, ʋ pʋ ꞊han‑tɩ, ‑ɛ kɔ kɩ ʋ yɩ 'ʋ ‑hlee ‑nɩ dɩakɩ, ʋ 'nɩ ‑yru꞊o lɩ꞊ɩ' lɛ.

8 ‑A yi꞊e nɩ, ‑ɛ mɔ, Nyɩsʋa a tete mɔ ꞊haandɛ ꞊nɩɔ, 'bʋ mɔ, ‑tɩ ‑bʋ, ɛ hlɛ, ꞊ba yɩ꞊ɩ nyibli a tɔɔlɛ nɩ ni. 9 ‑Ba kɔ 'a yiyie, ‑ɛ mɔ, Nyɩsʋa 'yɩ tete a 'mʋ ‑nu, 'kɩ 'ʋ nyibli ‑mʋ', ‑ʋ 'sii 'ʋ yɩ ‑mɔ, kɛɛ, ɛ nu꞊o nɩ, 'kɩ 'ʋ dɛ'kukununyʋ ‑mɔ. Nyiblidʋ 'a mʋ, ʋ 'nɩ ꞊tuu꞊o 'ʋ Nyɩsʋa kɔ 'a tete 'hʋɛn‑ 'ʋ, kɔ, 'ʋ 'yɩ 'ʋ 'waa 'bio ‑tonyibli a 'ʋ꞊tuulɛ ‑kɔ, kɔ, 'waa ꞊wlɩ yraa Nyɩsʋa a ‑tɩ nɩ, 'ʋ 'lɛ nyibli, mɔ 'ye ꞊bɩɩ bʋ mɔ 'waa 'baɩ kɔ 'waa 'dii 'hʋɛn‑, 10 'ʋ ni 'lawlu, kɔ 'a ‑nɛ 'kugbapudɛ ꞊dʋ 'hʋɛn‑, nyɩbɛpʋ 'ʋ ni 'waa 'bio nyɩbɛpʋ nʋgbɩ ‑mɔ', 'ʋ yɩ ‑tonyibli 'yri, 'ʋ ni ꞊nʋ ꞊koyo ‑mɔ', 'ʋ kɔ hɩ lɛ, kɔ, 'bʋ hla ‑tɩ, ʋ 'nɩ ‑nu꞊o lɩ꞊ɩ. Nyiblidʋ a 'mʋ, ‑tɛblɩ a pɛpɛ ‑mʋ', ʋ ni, ɛ kɔ Nyɩsʋa a ꞊haantitie, ‑ɛ mɔ ꞊haantɔɔlɛ 'hʋɛn‑, ɛ 'yɩ ‑pɛ. 11 Kɛ‑ Nyɩsʋa a ꞊haantitie ni 'a tɔɔlɛ. ꞊Haantitie a 'mʋ, Nyɩsʋa nɔ‑ lee 'mʋ, ꞊bʋ pʋ꞊ʋ nyibli. ꞊Haantitie a 'mʋ, ɛ tʋɛ nɛ ‑a mʋ Nyɩsʋa a ‑tɩ a 'yi'bʋbʋa, Nyɩsʋa ‑mʋ', ‑ɛ yɩ ‑a mʋ plɔ a bleelɛ ‑nyi.

12 'N yɩ ‑nyi ‑Yusu 'Klɩsʋ 'wio, ‑ɛ mɔ ‑aan Kʋkɔnyɔ. Ɛ nɔ‑ ‑nyi 'mʋ 'klɩ, 'kɩ ꞊bʋ nu 'a ‑kʋan ‑bʋ, ɛ ‑nyi 'mʋ. 'N yɩ ‑nyi꞊e 'wio, ‑tɛ ɛ ‑nu, 'ɛ ‑ha 'lɩ 'mʋ, 'kɩ ꞊bʋ mɔ 'a ‑kʋannunyɔ, 13 'mɔ ‑bʋ, ti ‑hi la a ti 'yri, ‑ɛ yɩ la 'a 'nyrɛ yɩ nyre, ‑ɛ ꞊tui la꞊a ꞊hɩʋɛn, ɛ kɔ 'a nyibli 'hʋɛn‑, ‑ɛ ‑hɛ la꞊a 'yri lɛ. Kɛɛ, Nyɩsʋa yru 'na nyaɩ, ‑ɛ nu꞊o, 'n 'yɩ la ‑Yusu 'Klɩsʋ ꞊wlʋ yɩ ‑kuo ‑nɩ, kɔ, dɛ ‑mʋ', 'n ni la, 'n 'yɩ la꞊a ‑yi. 14 ‑Ɛ ‑bɩ ‑aan Kʋkɔnyɔ ‑Yusu nu 'mʋ ꞊haandɛ ‑mɔ dɩakɩ, 'kɩ 'lɩ dadʋke 'kwli. Ɛ nu꞊o nɩ, 'nɩ kuo ꞊nɛ ꞊wlʋ yɩ, kɔ, 'nɩ kɔ 'a nʋɛlɛ.

15 Ɛ kɔ win ‑bɩ, 'ɛ mɔ ‑tɛɛ a win. Nyibli a pɛpɛ blɛɛ yɩ, bʋ kuo ꞊nɛ ꞊wlʋ yɩ. Win a 'mʋ, ɛ nɔ‑ ‑bʋ: ‑Yusu 'Klɩsʋ di 'nɛ‑ ‑tʋtʋ kɩ, ‑ɛ di꞊e nu, ɛ 'mʋ dɛ'kukununyʋ wa. 'Na 'mumu ‑bʋ, 'n mɔ la dɛ'kukununyʋ a nyiblo gbagbʋ. 16 ‑Tɛblɩ 'kukui, 'n ni la a ‑tɩ, ɛ nɔ‑ nu꞊o, Nyɩsʋa 'ɛ yru 'na nyaɩ, 'ɛ nu꞊o, ‑Yusu 'Klɩsʋ 'ɛ 'la ꞊wlʋ dɩakɩ, 'kɩ 'ʋ 'na ‑ta', 'ye ꞊bɩɩ 'na ‑tɛblɩ 'kukui, 'n ni la, bʋ ‑hʋ. Kɛ‑ ɛ ‑nu, 'ɛ tɔɔ ꞊nɛ nyibli yɩ, ‑ɛ mɔ, 'ye ꞊bɩɩ nyiblo a ‑tɛblɩ 'kukui bʋ ‑hʋ, ‑Yusu 'Klɩsʋ kɔ ꞊wlʋ a 'lɩla, 'kɩ 'ʋ nyiblo a 'mʋ ‑mɔ', ‑ɛ di꞊e nu, 'a ‑nɛ nyiblo 'mʋ꞊ʋ ꞊wlʋ yɩ ‑kuo ‑nɩ, Nyɩsʋa 'mʋ nyiblo a 'mʋ 'klɔ yrayrʋ, ‑ɛ 'yɛ nɩ ‑wɛ 'lɩ ‑nyi. 17 Nyɩsʋa bʋ kɔ ‑tɩ a 'yi'bʋalɛ kɔ 'ʋ꞊tuulɛ ti a pɛpɛ. Ɛ nɔ‑ mɔ 'klɔhiebodɩɔ. Ɛ 'nɩ 'kʋ꞊ʋ lɩ 'klɔ ‑mɔ 'klɔ. Nyiblo 'nɩ 'ye꞊e lɩ꞊ɩ. Ɛ nɩ ‑do, ɛ nɔ‑ mɔ Nyɩsʋa. Kɛ‑ ɛ nɩ 'mʋ.

18 'Na 'yu Timote, titie ‑bʋ, 'n yɩ ‑mʋ ti, 'n ‑hʋɛ꞊ɛ nɩ, 'a ‑tɩ 'nɩ 'hruo 'lɩ ‑mʋ ‑mɔ. ꞊Tu 'ʋ 'klɩ, yɩnɔ‑kʋan ‑bʋ, ‑ni, ‑bʋ nu꞊o ‑tɛɛ, ꞊wɩ yɩ, ‑tɛ 'sɛyotayu ni, 'ɛ ‑wɛn tʋ. Ɛ 'nɩ 'hruo 'lɩ ‑mʋ ‑mɔ, ‑ɛ mɔ, Nyɩsʋa a ꞊gbɛtʋ, ɛ nɔ‑ ‑nyi ‑mʋ ‑kʋan ‑bʋ, ‑ni. Ɛ nɔ‑ naa la 'lɩ꞊ɩ 'a winwlɔn‑hanyʋ* wlɔn, 'ʋ hla la꞊a. 19 'Cibi 'ʋ ‑Yusu a ꞊wlʋ a yɩkuolɛ. Pʋ ‑na ꞊wlʋ a win nʋa yɩ bʋ, ꞊nɩ ꞊ha ‑tɛblɩ ‑mʋ', ‑ɛ kɔ kɩ ‑na ꞊wlʋ yɩ 'ʋ ‑mʋ ‑mɔ 'plɛɛ ‑nɩ nu. Ɛ kɔ nyibli ‑bɩ, 'ye ꞊bɩɩ 'waa ꞊wlɩ bʋ yɩ ꞊nʋ 'nyrɛ nɩ ꞊hɛn, ʋ 'nɩ ‑pʋ꞊ʋ lɩ 'waa ꞊wlɩ nʋa yɩ bʋ. Ɛ nɔ‑ nu꞊o, 'ʋ ‑sa, 'kɩ 'ʋ ‑Yusu a ꞊wlʋ a yɩkuolɛ ‑mɔ. 20 'Kɩ 'lɩ ꞊nʋ 'nyɩ, 'kɩ Himene kɔ Alɛsadrɩ 'hʋɛn‑, ʋ nɩ 'lɩ. Ɛ nɔ‑ nu꞊o, 'nɩ pʋ ꞊nʋ 'kuo ‑hʋɩn* a nyiblo gbagbʋ Satan ‑jɩ', ‑ɛ di꞊e nu, ʋ 'mʋ ꞊hɩʋɛn 'ye, ʋ 'mʋ꞊ʋ yi, ‑ɛ mɔ, nyiblo 'nɩ 'ye꞊e lɩ Nyɩsʋa ‑tɩ ‑hʋɩn 'hʋɩ lɛ.