Wati Wangkatjarangku Maikalu Walkatjunkunytja
Micah
Nyangatja Ngaṉmanytju Nyakula Wangkanytjaku
Nyangatja Godaku tjukurpa wati wangkatjara ini Maikalu walkatjunkunytja. Panya paluṟu Godaku tjukurpa wangkangu aṉangu panya Tjamiṟiyanya nguraṟa tjuṯangka munu Jerusalemanya nguraṟa tjuṯangka kuḻu. Wati nyara paluṟu kuranyitja tjuṯangka munu tjukurtjara tjuṯangka munu wangkatjara tjuṯangka kuḻu puḻkaṟa wangkara painingi, panya tjana mulamulangku aṉangu tjuṯa tjukaṟuruṟa kanyintja wiyanguṟu. Panya tjana ngunti wangkapai munuya aṉangu ngaḻṯutjara tjuṯa ngunti kuraṟa tjanampa kutjupa kutjupa tjuṯa tjulyalpai. Munuya paluṟu tjana Godanya mulamulangku waḻkulpai wiya winpinpingku kutju unytjungku wangkapai.
Ka Maikalu tjanala wangkangu, “Nyura alatji rawa nyinanyangkampa Godalu nyurampa kutjupa kutjupa kura puḻka iyalku.” Uwa, Maikalu kuranyukutungku nyangangi munu kuliningi panya mayatja puḻka wirkankuku ngura ini Bethlehemala munu paluṟu wiṟuṟa aṯunymaṟa kanyilku aṉangu Godaku walytja tjuṯa. Nyanga alatji paluṟu Jesunya wangkangi, ka panya ngulalta Matthew-lu kulinu Maikalu walkatjunkunytja munu tjukurpa panya palunyaṯu walkatjunu. (Nyawa Maikalu walkatjunkunytja 2:6 munu Matthew-ku tjukurpa 5:2.)
Uwa, nyangatja Maikalu tjukurpa walkatjunkunytja tjara kutju ngarinyi, panya nganaṉa kuwaripangkuṯu palyaṉi, palu uwankarala walkatjuṟa wiyantja wiyaṯu.
Tjukurpa nyanganpa ngarinyi:
1:1-5 Godalu palumpa walytja tjuṯa ngurkantankunytjikitjangku kalkuntja
2:1-10 Israelkunu tjuṯangku kura tjuṯa palyantja
5:2-5 Godalu mayatja puḻka tjanampa iyantjikitjangku kalkuntja
6:1-7 Israelkunu tjuṯangku kura tjuṯa palyantja
6:8 Palyanyku nyinanytja Godanya pukuḻarinytjaku
7:18-20 Godalu tjananya kura palyantjitjanguṟu kalypangku wantinytjikitjangku kalkuntja
1
Godalu Palumpa Walytja Tjuṯa Ngurkantankunytjikitjangku Kalkuntja
1 Ngayuluṉa wati ini Maikanya ngura ini Maṟatjatjanya nguraṟa. Ka wati ini nyanganpa Tjatjamanya, Aatjanya munu Itjakayanya tjana manta Judah-ku mayatja puḻka nyinangi wanapari wanapari. Ka nyara paluṟu tjana nyinanytja-aṟangka Mayatja Godalu ngayunya tjukurpa puḻka tjuṯa nintiningi aṉangu Israelnga nguraṟa tjuṯatjara munu Judah-nya nguraṟa tjuṯatjara kuḻu, ka nyanganpa ngayulu kulintjatjanungku walkatjunanyi.
2 Kaya kuwari ngayula kulila aṉangu uwankarangku manta winkinguṟu. Panya Godalu Mayatja Puḻkangku nyuranya ilkaṟinguṟu kura palyannyangka nyakula wangkara kuranmananyi. 3 Paluṟu kuwari nguwanpa pitjanyi ngura nyara ilkaṟinguṟu munu paluṟu mayatja puḻkangku puḻi murpu puḻka tjuṯa wiyalku, 4 ka puḻi paluṟu tjana uṟuringkuku, panya wax waṟungku kampanyangka uṟuringkupai, palu puṟunypa. Munu puḻi paluṟu tjana uṟuringkula karu puṟunypa wala winki ukalingkuku waṟarangka puṟunypa. 5 Palu nyaaku wanyu alatjiriku? Wiya, aṉangu Israelkunu tjuṯangku munu Judah-nya nguraṟa tjuṯangku kuḻu kura tjuṯa rawangku palyannyangka alatjiriku, panya paluṟu tjana Godala rawa tungunpungangi.