1 Tan ixla'pust'ajun an Jesús, la'ts'ilh pumatam la'lhtuluw lapanak, wa chunchacha tsukulh. 2 An ixt'alhtanan tajuniy:

―Maestro, ¿tisiyuchacha ilhtulh ixtala'alhin li chunchacha la'awlhi, ixpaynin u yucha?

3 An Jesús jajuniy:

―Jantu xliyu ani wa ka'ilhtulhcha tu'u ixtala'alhin u an ixpaynin, wa xliyu an Dios masuputuni ixtapatsat la ixlakatunaj ani lapanak. 4 Li tunkuwka, task'iniya li ka'ilhtuw an ixtapatsat an yu kimakminta, mu mintacha an jatats'isni, akxni jantucha lay tapatsakan. 5 Li ikt'ajunka an lakamunulhpa, ikxajatapulhkunu an lakamunulhpa'.

6 Akxni chunchacha naw'olh, a'chujlhicha an lakaat'un, chi ilhtulhcha pulh'om. Lakpuxapamuk'alhcha an la ixla'chulh an yu jantu ixjalakawanan lapanak. 7 Ixli'astan juniy:

―K'ap'inchicha la'puch'a'a an tan nap'an wilh xkan junkan Siloé ―nawputun Mala'achakanta.

Pus alhcha la'puch'a'a', walh tasp'itcho'ochalh, ixjalakawanancha. 8 An yu waniy ixjalakt'awilh la ixcha'a chi an yu ixtala'ts'in tan ixtawlay isk'in tu'u la'a'tayjun, ixtanajun:

―¿Ani chu jantu yu an sa' ixtawlay isk'in la'a'tayjun?

9 Ali'in ixtanajun:

―Mu chun, yucha.

Ali'in ixtanajun:

―Mu jantu, masi wanaj chuncha tasuy jantu yu'.

Pero yucha ixnajun:

―Chun, kit'in.

10 Wa chuncha talhisakmilh tajuniy:

―¿Ch'i t'asich'a laych'a lhijalak'awanan chawayi?

11 Yucha jajunilh:

―Yucha anchunu tajuniy li Jesusi ilhtulh pulh'om, chi kilakpuxapamuk'alhcha, ixli'astan kijuniy: “K'ak'ila'p'uch'a'acha an laka Siloé, tan nap'an tajun xkan.” Pus ik'alhcha, chi ikla'puch'a'alhcha, walh ijkalakawanalhcha.

12 Pus tajuniy:

―¿Tanischa t'ajun anchunu lapanaki?

Yucha jajuniy:

―Jantu ijk'atsay.

13 Talhi'alhcha an tan ixtawilanalh an fariseojnin an yu la'lhtuluw ixjunita lapanak. 14 Akxni la'oxilh an pulh'om an Jesús chi malakawanilhcha an yu jantu lay ixjalakawanan akxni jantu ixtapatsakan wilhchani ixjunita. 15 An fariseojnin wachu talhisakmipalhi tani laycha lhijalakawanalh. Pus yucha jajuniy:

―Wa kilakpuxapamuk'alhcha an pulh'om, chi ikla'puch'a'alhcha chi chaway ijkalakawanancha.

16 Pus an ali'in fariseojnin ixtanajun:

―Anchunu lapanak jantu Diosi makminta, mu tapatsayi akxni masi jantu tapatsakan wilhchan.

Pero ali'in ixtanajun:

―¿Pero tasicha lay kalhilak'ilhtulh ani tanlhun li wa ma'lhta'alhiniycha?

Pus tatala'apitsilhcha, tatakilhmakt'uyulhcha. 17 Wa chuncha talhisakmipalh a'tami an yu la'lhtuluw ixjunita lapanak, tajuniy:

―An yu malakawanin, ¿tisu lapanakch'a na'uni?

Yucha najun:

―Kit'in iknajun pumatam yu lhichiwiniy ixchiwinti Dios.

18 Pero an judiojnin jantu ixtakiklaka'iya li la'lhtuluwi ixjunita chi li laycha ixjalakawanan, wanaj tat'asanilh ixpay chi ixnati 19 chi talhisakmilhcha, tajuniy:

―¿Yucha aniya mints'alhk'an, yu nawnat li wa la'lhtuluwi tsukulh? ¿Tasicha lhijalakawanan chawayi?

20 An ixpaynin taja'alhtayanalh tanajun:

―Ijk'atsayawi li ani yucha kints'alhk'an, chi li wa la'lhtuluwi tsukulh. 21 Pero jantu ijk'atsayaw tani lhijalakawanancha chaway, chi jantu ijk'atsayaw tichini malakawanilhcha. Yuch'ach'a k'alhisakmit, mu aycha, yuchacha katajunan.

22 An ixpaynin wa chuncha tanawlh, mu ixtatalhanan, mu an judiojnin ixtatamakajuntacha li yu kanawna li an Jesús yucha Cristo, katamakxtukana an tan ixtata'ayxt'o'a yu tajakiklaka'inin. 23 Xliyu talhinawlh an ixpaynin: “Yuch'ach'a k'alhisakmit, mu aycha.”

24 An judiojnin a'tam tat'asanipalhi an yu la'lhtuluw ixjunita, chi tajuniy:

―Akilajuniw yu sawalh la ix'ukxlakapu Dios. Kitnan ijk'atsayawi li anchunu lapanak wa ma'lhta'alhini'.

25 Yucha jajuniy:

―Li ma'lhta'alhini, kit'in jantu ijk'atsay. Yu ijk'atsay, li jantu lay xajkalakawanan, pero chaway ijkalakawanancha.

26 A'tam talhisakmipalh tajuniy:

―¿Tasicha ilhtuni? ¿Tasicha ilhtulh li malakawaniyncha?

27 Yucha jajuniy:

―Iklajuniwcha, pero jantu kilakiklaka'iyaw. ¿Tasu li a'tam aklajumpalawi? ¿Chu wachu sna ixt'alhtanani ump'ut'unat'it?

28 Wa chuncha tamamaxanilhcha, chi tajuniy:

―Uxint'i ka ixt'alhtanak'at'i anchunu lapanak, pero kitnan ixt'alhtanan an Moisés. 29 Kitnan ijk'atsayaw li an Dios xa'alalhi an Moisés, pero anchunu lapanak jantu ijk'atsayaw tanchuncha minchalh.

30 An yu la'lhtuluw lapanak ixjunita jajuniy:

―¡Pus yuchacha yu lhi'a'nincha! Uxitnan jant'u k'ats'ayat tanchuncha minchalh, walh chi kit'in kimalakawanilhcha. 31 Chi k'atsayawi li an Dios jantu ja'asmatniya an ma'lhta'alhinin, pero yu kiklaka'iya an Dios chi ilhtuniya yu najun, yucha asmatniy. 32 Jantu a'tam asmatkanta li xamati lay kamalakawanilh yu wa la'lhtuluw la'awlh. 33 Li ani lapanak jantu Diosi makminta, jantu lay tu'u ka'ilhtulh.

34 Pus yu'uncha tajuniy:

―Uxint'i wa tala'alhinch'a p'uts'uk'u, ¿chi uxint'icha akilamasuniyaw?

Pus tatamakxtulhcha an tan ixtata'ayxt'o'a an yu tajakiklaka'inin.

35 Walh an Jesús k'atsaalhi li tatamakxtulh, pus akxni paxto'lhi lhisakmiy juniy:

―¿Uxint'i k'iklak'a'iya an isTs'alh Dios?

36 Yucha alhtaylh juniy:

―¿Jamach'alhkat, tisiyuchacha, para li ajkiklaka'ilh?

37 An Jesús juniy:

―La'ts'int'a'uncha, kit'in, yu t'ach'iwint'a'un.

38 Wa chuncha an lapanak tatso'ottatawlhnilhcha la ixlakapu an Jesús, chi juniy:

―Ijkiklaka'iyani, Jamach'alhkat.

39 An Jesús juniy:

―Kit'in ikminta nawna ani lakamunulhpa tanyuchacha yu oxi chi yu jantu, para li an yu jantu tajalakawanan, katajalakawanalh, chi an yu tajalakawanan jantu katajalakawanalh.

40 Ali'in fariseojnin yu ancha ixtat'ayanalh, mu ta'alha'asmat'acha, pus tajuniy:

―¿Chu wachu la'la'lhtuluw'uni kitnan?

41 An Jesús ja'alhtaylh jajuniy:

―Li la'la'lhtuluw'uni k'a'ix'unt'it, jantu tu'u k'a'ixlits'uk'ut mintala'alhink'an, pero mu nawnat'iti li jalak'awananat'it chaway amintala'alhink'an mincuentajk'an.