1 Taxtulh an Jesús, jat'amilhcha la ixt'un an ixt'alhtanan. 2 Walh, akxni jantu tapatsakan wilhchan, tsukulhcha masuyi an laka tajtan. Lhuwi yu sawalhcha ixtalhi'a'niy. Ixtanajun:

―¿Tani laklanilhcha an jatapast'ak'at chi tacha an jak'uch'ununcha la ixmaka'a? ¿Tisu jatapast'ak'atcha ani xta'nikanta? 3 Pero mu yucha an jaxpitni', an ists'alh María, an ixt'ala'ajunk'an Jacobo chi José chi Judas chi Simón chi an ixjap'isa'an wachu aniya tawilanalh.

Tucha oxi ixtalhiwilay an Jesús an lapanakni. 4 Pus an Jesús jajuniy:

―Jantu xamati yu lhichiwiniy ixchiwinti Dios la'ts'imputunkan la ixt'un chi la ixt'alalhila'ts'inin chi la ixcha'a'.

5 Pus jantu tu'u lay ilhtulh ancha tu'u yu laj'ay tanlhun an Jesús, yu masuy ix'alhp'asninti an Dios, wa ali'in ta'an'anini jak'uch'ulh yu jalakpach'apalh. 6 Wachuncha sawalhcha lhi'a'niya an Jesús li jantu k'is tajakiklaka'inini yu'uncha. Ix'ancha masunu an lakt'ikt'i la'acha'anaxni.

7 Jat'asanilhcha an ixpumakawt'uyk'an ixt'alhtanan an Jesús, chi tsukulhcha jamala'pitsiy ixpumat'uyunk'an. Ja'ilhtulhcha li layi katalhajaya an tanlhuncha lakmakxkay'un. 8 Jajuniy li jantu tu'u katalhi'alh, ixnik'an, chi ixbolsajk'an chi tumin, wa ma'atamin ixpalikk'an, 9 chi ixwarachijk'an, pero alht'uy ixla'ch'itk'an jantu. 10 Jajuniy:

―Wa t'anch'unch'a k'ach'ip'ina'it laka cha'a wa anch'ach'a k'at'awla'it, sta akxni k'at'axt'uch'o'oya'it an la'acha'an. 11 Chi wa t'anch'unch'a jant'u la'a'ik'anat, u jant'u asmatnik'anat, akxni t'axt'uch'o'oyatcha, k'ach'ank'alhap'uxk'ana'it'iti an po'xmi para li katak'atsaalh, mu yu chuncha talay jantu ta'asmatputun, [palay katama'alh'ajnana akxni ka'ukla'oya', walh masi an la'acha'an Sodoma chi an la'acha'an Gomorra palay wa ixlak'anti katama'alh'ajnana'].

12 Pus tataxtunilhcha, ixtanajuncha li katamapaxalhcha ixjatapast'ak'atk'an an lapanakni. 13 Ixluwchak'ani tak'uch'ulh yu wa ixtala'apaxt'o'a makxkay'un, chi ixluchak'ani yu ixta'ukmuk'aycha asayte yu wa ixtata'an'ay, chi ixtatak'uch'uycha.

14 An rey Herodes k'atsaalhi li an Jesús sawalhcha ixmispakan. Ixtalaknajun yucha an ixjama'paxanancha Juani la'awcho'olh xliyu lay lhilak'ilhtuy masi yu la'lhima'anxkay laj'ay tanlhun, yu masuy ix'alhp'asninti an Dios. 15 An ali'in ixtanajun:

―Yucha an Elías.

Chi an ali'in ixtanajun:

―Ka xamaticha yu wachu chun tacha an yu ixtalhichiwiniy ixchiwinti Dios ma'anchacha.

16 Akxni asmatlhi an Herodes, najun:

―Yucha an Juancha la'awcho'olh an yu iklhinawlh li ka'a'cha'xkalh.

17 Mu yucha an Herodesi ixmalaklhchajuta an Juan, xliyu chuncha lhinajun, ixch'i'ulatacha laka kadena, wa xliyu li an Herodes ixt'at'awniya an ixt'iwi wa ixt'ala'ajuncha, junkan Felipe, an ixjamach'a Felipe ixjunkan Herodías. 18 Chi mu an Juan ixjuniya an Herodes:

―Jantu oxi li t'ats'uk'uniy an ixt'iwi mint'ala'ajun Felipe.

19 Pus xliyu an t'aku Herodías sawalhcha ixma'niputuni an Juan, pero jantu lay ixma'niy. 20 Mu an Herodes ixtalhamniya an Juan, mu ixk'atsayi li yucha oxi ixt'ajun, yucha jantu ix'ilhtuyi ixtala'alhin, pus an Herodes oxi ixlist'ak'a an Juan. Sawalhcha ix'alha'asmatputuni an Herodes an Juan, pero jantu oxi ixlimacha'xay. 21 Milh la'atam wilhchan akxni la'tsapalhcha k'ata an Herodes tacha ixput'ajun, jat'awaylh an ix'a'tayjunin chi an xalaj'ajin lapanakni xalakaat'un Galilea. 22 Pus an istsi an t'aku Herodías tanuchalh chi jat'ínilhcha. Walh an Herodes oxicha lhiwilalh chi an yu ixjat'alakwajin wachu', pus an Herodes juniy an jatsi:

―Wa t'uch'ich'a k'isk'inip'ut'un, ak'isk'inincha.

23 Chi jurarlanilhcha, juniy:

―Akxta'niyani wat'uch'ich'a ak'isk'iniya'a, sta paytat an kilhich'alhkat.

24 Pus an jatsi taxtulh chi juniy an ixnati:

―¿Tisuncha aksk'inilh?

An ixnati an jatsi juniy an istsi:

―Yucha an ix'a'tsulh jama'paxanaj Juani k'ask'int'i.

25 So'ojo tanucho'ochalh an jatsi, juniycha an rey:

―Yucha an ix'a'tsulh jama'paxanaj Juani ak'ixt'a'nin laka la'atam pulatoj.

26 Pus an rey sawalhcha ta'oxila'alhilh, pero mu ixjunitacha li kaxta'niya sawalhi watuchicha kask'iniya an jatsi, chi ixta'alha'asmat'ojotacha ixchuxk'an, pus jantucha ta laputulh. 27 Watukancha mak'alhi pumatam isoldado, juniy li kalhiminilhi an ix'a'tsulh jama'paxanaj Juan. Pus chunchacha ilhtulh an soldado. Ki'a'cha'xlicha an Juan an laka pulach'in. 28 Chi lhicha'alhcha an a'tsulh laka pulatoj an soldado, pus xta'nilhcha an jatsi', chi an jatsi yucha xta'nilhcha an ixnati. 29 Akxni tak'atsaalhcha an ixt'alhtanan an Juan, taki'inilhi an ixlakatunaj, chi tamaknulhcha.

30 An ixt'alhtanan Jesús tat'atala'xto'lhicha chi tajuniycha tuchini ta'ilhtulhcha chi tuchini tamasulhcha. 31 Yucha jajuniy:

―K'at'at'itcha, katala'xtinuw, tan wa jasa'nik'acha k'at'ijast'aknana'it.

Mu lhuwi yu ixtacha'an chi yu ixtatasp'itcho'oyachalhcha, pus jantucha layi masi wa katitawaylhcha. 32 Tapu'alhcha la'atam barco tan wa jasa'nik'a. 33 Pero mu ixluwk'ani yu tala'ts'ilh tan tapu'alh. Pus tamispalhi an Jesús, wachuncha chux an la'acha'anaxni an lapanakni tataxtulh talakats'alaj'alh, yu'uncha p'ulh tacha'alh. 34 Akxni tatakutlhicha an laka barco, an Jesús jala'tsincha tan ts'anan ixtayanalh, pus jamapayniycha, mu wa tacha borregojnincha yu jantu xamati jalhist'ak'a. Pus tsukulhcha jamasuniy lhuw tanlhun. 35 Sawalhcha ta'oxay, an ixt'alhtanan an Jesús tala'alh, tajuniy:

―Sawalhcha ta'oxay, chi ani wa jasa'nik'a. 36 K'aja'un li kata'alhcha an lakt'ikt'i la'acha'anaxni, katatamawyacha ancha yu kata'uya'.

37 Yucha ja'alhtaylh, jajuniy:

―K'ajamawatcha uxitnan.

Yu'uncha tajuniy:

―¿Tasicha? Ka wanajcha la'lhuwi ajkalhimawaw pan ixchuxk'an.

38 Pus jajuniy:

―¿Tasu a'xchuxcha pani lhit'ant'at'it? Ak'ila'ts'int'it.

Akxni tala'cha'ancho'olh, tajuniy:

―A'xkisi pan chi ma'at'uy jatanti.

39 Ixchuxk'an jajuniy li katatala'apitsilhcha kilhmaktamin, chi li katalaktawilhcha an tan st'a'an malh jats'in. 40 Pus talaktawilhcha, kilhmaktamin taminciento chi kilhmaktamin t'up'uxamkawin. 41 Yucha xa'a'ilhcha an a'xkisi pan chi an ma'at'uy jatanti chi tala'st'alhcha an lakt'iyan, xta'nilhcha lhimala'puchajuni an Dios. La'ch'e'elhcha an pan chi jaxta'nilhcha an ixt'alhtanan para li katamala'pitsilhcha, chi an jatanti wanajcha chun. 42 Ixchuxchak'ani oxi talak'ulh tacha talhikiklalhcha. 43 La'akawt'uy kanastaja a'tsamcho'olh yu wa xaxajnicha an pan chi an jatanti, yu jantucha ta'u'olh. 44 La'akisi milh lapanakni yu an talakwaylh.

45 Ixli'astan an Jesús jajuniy an ixt'alhtanan li katapu'alhcha an ixtapiktutam lakxkan an barco, tanchun la'acha'an junkan Betsaida, mu yucha ma katijala'axa'alaya an lapanakni para li kata'ancho'oyacha. 46 Jala'axa'ala'olh, alhcha tapayninini Dios a'stitawk'a. 47 Walh puts'istacha, ixpaytatcha an lakxkani ix'anta an barco. Wa ix'akstucha ixt'awnachalh an Jesús lakaat'un. 48 Chi mu jala'ts'incha tacha lhita'ayj talay tax'elhniy an barco an ixt'alhtanan, mu an un wa ixjalakatast'uka, pus ka tacha las trescha tunkunmintacha jala'alhcha. Ukxjalhtanaj'alhcha an xkan, ixjapu'iniputuncha ixja'ilhtuy. 49 Akxni tala'ts'ilh li ukxjalhtanani an lakxkan, tanajun li sna wa takuwincha, ixtalakt'asaycha. 50 Mu ixchuxchak'ani ixtala'ts'in ixtalaktalhanancha, pero yucha watukan jaxa'alalh, jajuniy:

―¡Oximaj'ayi k'a'unt'it, jant'u k'alakt'alhanant'it, mu kit'in!

51 Jala'tajuchalh an laka barco an Jesús, sa'cha walhi an un, pus sawalhcha ixtalhi'a'niy, 52 mu wachuka jantuka' ixtalhimacha'xapalayi an tan ixlalhawata pan, mu jantu ixtakiklaka'iya li layi ka'ilhtulh.

53 Akxni tapatakutchalhcha an lakxkan, tacha'alhcha xalakaat'un Genesaret. 54 An Jesús watukan tamispalhi akxni tatakutlhicha an laka barco. 55 Pus watukan tata'a'pitsi'olhi an lapanakni, ta'alhcha lak'iynini an ta'an'anin, chi talakch'ixlicha'a'nilhcha la ixputamatk'an an ta'an'anin an Jesús, tan an ixtak'atsay li ancha ixt'ajun. 56 Watanchuncha ixcha'an an Jesús, laj'ay la'acha'anaxni, chi lakt'ikt'i la'acha'anaxni, u masi tan wa jalhi'ay, an laka laktij ixtamamaycha an yu wa ixtata'an'ay chi ixtatapayniniycha li ma kajamakawnilhi masi wa katapikch'apanichalhcha an ixla'ch'it. Ixchuxk'an an yu ixtach'apaniyachalh an ixla'ch'it, ixtatak'uch'uycha.