1 Akxni chunchacha jajun'olh an Jesús, jajuniycha an ixt'alhtanan:

2 ―K'ats'ayatcha li wa la'at'uycha wilhchani ts'an'ay ixk'atan paxku, an isTs'alh Lapanak kama'axta'kanacha para li katamakxtukmuk'alhcha laka Cruz.

3 Wa chuncha an xalaj'ajin sacerdotejnin chi an xamaestrojnin lhamap'a'sin chi an laktatanincha yu ancha ixla'acha'ank'an, tata'ayxto'lhicha an la ixjatalakxtut an xa'aycha tukan sacerdote, yu junkan Caifás. 4 Chi anchacha talhilakchiwinilh tani katalhi'o'xcho'och'apayawlhcha an Jesús, para li katama'nilhcha. 5 Pero talajuniy:

―Tukan k'atan jantu, para li jantu katala'talh'amalh an lapanakni.

6 An Jesús, la'acha'an Betaniaja ixt'ajun, la ixcha'a Simón, yu ixlakap'uch'i'ojota. 7 Walh ancha la'cha'alh pumatam t'aku yu ixli'anta la'atam perjume la xafrasco, yu wanaj la'lhuw ixtapalay, chi ukmuk'akalhi an Jesús akxni sa' ixwilh laka mesa. 8 Chi mu tala'ts'incha an ixt'alhtanan an Jesús, pus talhitalh'amalh, tajuniy:

―¿Tasu li wa lha'amanancha an perjumeje? 9 Yucha layi kaxlist'akalh la'lhuw, chi kaxjamala'pitsinikalhcha an jakilhpatinin.

10 Pero an Jesús asmat'a, pus jajuniy:

―¿T'asu li la'a'aymayatcha ani t'aku'u? Oxicha tacha ani ki'ilhtulh. 11 Mu an jakilhpatinin lhilhiji k'ajat'a'aklats'uk'uya'it'it, kit'in jantu. 12 Ani t'aku kilakamuk'alhcha an perjume ixlakata li mala'asijniycha li akxni akimaknukana'. 13 Chaway sawalh, klajunaw, wa tanchuncha kalhichiwinkana ani laj'oxi chiwinti, chux lakamunulhpa, wachu kalhichiwinkana an yu ilhtulh ani t'aku', para li kalhipastakkalh.

14 Xapumatam an ixpumakawt'uyk'an ixt'alhtanan an Jesús, yu ixjunkan Judas Iscariote, jala'alhi an xalaj'ajin sacerdotejnin, 15 chi jajuniy:

―¿Tasuncha kilaxta'niyaw para li aklama'axta'niw an Jesusi?

Yu'uncha taxta'nilh a'xp'uxamkaw tumin de plata. 16 Pus sta akxni wa ixlipuxkawniycha tani kalhima'axta'lhicha.

17 Walhcha la'atam wilhchan ixk'atan pan yu jantu lhiyalh lhamaskajan, tala'cha'alhcha an ixt'alhtanan an Jesús, tajuniy:

―¿T'anisch'a na'un akmala'asijniw para li k'awaycha laka paxku?

18 Yucha jajuniy:

―K'ala'p'inchi'it tichi lapanak an la'acha'an, k'a'una'it: An Maestro najun: “Waniycha kimpanch'e'ex, an la mincha'a akmak'ataniya an paxku ali an kint'alhtanan.”

19 Pus an ixt'alhtanan an Jesús chunchacha ta'ilhtulh tacha an jajunilh, tamala'asijnilhcha ixlakata an paxku.

20 Akxni tats'isilhcha, jat'atawilhcha laka mesa an ixpumakawt'uyk'an ixt'alhtanan an Jesús. 21 Chi akxni ixtalakwayt'ajuncha, jajuniy:

―Sawalhi ani yu klajunaw, xapumatam yu uxitnani akima'axt'a'a'.

22 Pus sawalhcha ixtata'oxila'alhiy, atamj atamjcha ixtalhisakmiy, ixtajuniy:

―¿Kit'in sna'a, Jamach'alhkat Jesús?

23 Wa chuncha yucha ja'alhtaylh jajuniy:

―Yucha an kint'atamaj'oy la kimpulatojo akima'axt'a'a'. 24 Sawalhi li an isTs'alh Lapanak ts'ajwi ti'an, tacha an lhits'o'muk'akanta, pero an lapanak an yu kama'axt'a'a an isTs'alh Lapanak kapulhik'atsaya'. Yucha palay oxi jantu katsukulh.

25 Wa chuncha an Judas Iscariote, an yu kama'axt'a'a, alhtaylh juniy:

―¿Maestro, chu sna kit'in?

An Jesús juniy:

―Uxint'ich'a naw.

26 Chi ixtalakwayt'ajunka, an Jesús xa'a'ilhcha an pan, chi xta'lhicha lhimala'puchajun, la'ch'e'elhcha jaxta'nilhcha an ixt'alhtanan, jajuniy:

―Ni'ijcha, k'a'ut'itcha, ani kilakatunaj.

27 Ixli'astan xa'a'ipalh la'atam vaso yu ixputajun xaxkan uva, chi wachucha lhixta'nilh lhimala'puchajuni an Dios, chi jaxta'nilhcha an ixt'alhtanan, jajuniy:

―Minchuxchak'ani k'ap'u'ott'it ani vaso, 28 mu ani yucha kijak'alhni, yu sast'icha putamakawkan li ani jak'alhni kamaj'ankana, para li lhuw lapanakni katapumala'mixilh ixtala'alhink'an. 29 Kit'in klajunaw sta chaway jantu akti'otcho'olhi an xaxkan uva, sta akxni aklat'alaj'otcho'otacha'aw yu sast'icha an la ixlich'alhkat kimPay.

30 Akxni talakmilhpa'olhcha la'atam milhpat, ta'alhcha a'stitawk'a tan junkan Laka Olivojnin. 31 Ancha jajuniy an Jesús:

―Ani katats'isiya wanaj akilamakaw'oyaw. Mu ts'o'muk'akanta an la ixchiwinti Dios tan najunta: “Akma'niya an yu jalhist'ak'a ixborregojnin, chi an ixborregojnin wanaj tilh katata'a'pitsi'oya'.” 32 Pero akxni akla'awcho'oyacha kit'ini aklatap'ulhniyaw ak'ana xalakaat'un Galilea.

33 An Pedro, alhtaylh juniy:

―Masi katamakaw'ojon, kit'in jantu aktimakajun.

34 An Jesús juniy:

―Kit'in sawalhi yu ijkunan li chaway ani katats'isiya, akxni jantuka' k'is tu'u katit'asalh puyux, a't'utu k'anawna'a li jant'u k'imisp'ay.

35 Pero an Pedro juniy:

―Masi akima'nikalh wachu jantu a'tam aktinawlh li jantu ikmispayan.

Chi an ali'in ixt'alhtanan wachu chuni tajunilh.

36 Wa chuncha jat'acha'alhcha an ixt'alhtanan an Jesús, tan jalakch'ananankanta junkan Getsemaní, jajuniy:

―K'alakt'awlatka ani, kit'in ikti'an anu', ikti'an tapaynini'.

37 Pus ja'aylhi'alhcha an Pedro, chi an ixt'uyunk'an ists'alan tichi lapanak junkan Zebedeo, walh sawalhcha tsukulh ta'oxila'alhiya an Jesús. 38 Jajuniy:

―An kintak'atsan sawalhcha ta'oxila'alhiy, wa tacha akniyacha ijk'atsan. Ani akilapakxaw jant'u k'alaklht'at'at'it.

39 Pus stalhcha alh lakats'uniy, tatso'ottalhcha chi tamuntitachalhcha an lakaat'un, tsukulhcha tapayniy, najun:

―KimPay, li lay, ak'imala'xt'inunini ani ay lhima'alh'ajna pero jantu tacha kit'in klakask'ini kawalh, tacha uxint'i lak'ask'ini kawalh.

40 Ixli'astan jala'cha'ancho'olhcha an ixt'alhtanan, walh ixtalaklhtatanancha. Pus junkan an Pedro:

―¿Jantu layi masi wa tamcha hora akilat'a'alhkujwi? 41 K'ak'ujt'it ch'i k'at'ap'aynit, para li jant'u k'alhila'ts'int'anuk'ant'it li k'a'ilht'up'ut'ut yu jantu oxi. Mu an takuwin yucha ilhtuputuni yu oxi, pero an lakatunaj yucha yu jantu k'ut'ilh.

42 A'tam ampalh, a'tam tapaynipalhi ixlipu'a't'uycha, najun:

―Kimpay li jantu layi ak'int'imala'xt'inunin ani ay lhima'alh'ajna, chunchacha kawalh t'ach'a oxi lhiwilay.

43 Jala'cha'ampalh a'tami an ixt'alhtanan, a'tamcha ixtalaklhtatanampalay, mu sawalhcha ixjala'cha'an ilhtatapututk'an. 44 Pus jamakawlh, a'tam ampalh, ixlipu'a't'utucha alh tapaynini'. Wanajcha yu chiwinti nawpalh. 45 Wa chuncha jala'cha'ampalh an ixt'alhtanan, jajuniy:

―¿Jast'aknant'awnatka ch'i laklht'at'ayatka'? Chilhcha panch'e'ex, an isTs'alh Lapanak kama'axta'kanacha la ixmakak'an an la'ma'lhta'alhinin. 46 K'alaj'ost'ayatcha, ka'awcha, jo', mintacha an yu akima'axt'a'a'.

47 Ixchiwint'ajunka an Jesús, la'cha'alhcha an Judas, xapumatam an ixpumakawt'uyk'an ixt'alhtanan, t'o'o'ocha jat'acha'alh lhuw lapanakni, ixtalaklhi'antacha ix'espadajk'an chi ixk'iwk'an. Yu'uncha an xalaj'ajin sacerdotejnin chi an laktatanincha yu ancha xalapanakni ixtalhinajunta. 48 An ja'o'xcho'onuj Judas la'asiyaj ixjajunitacha tani kajapumasuniyacha, ixjajunita:

―Yucha an akla'xtikilhtast'uk'a yu Jesús, k'ach'ap'ayawya'itcha.

49 Pus an Judas la'cha'alhcha an Jesús la'axa'alalhcha, juniy:

―¡Xaycha, Maestro!

Chi la'xtikilhtastuklhicha. 50 Pus an Jesús alhtaylh:

―Kint'ala'ajun, ¿t'isunch'a la't'ant'a?

Wa chuncha an ali'in t'o'cha tala'cha'an'olhi an Jesús, tach'apayawlhcha. 51 Pero xapumatam yu ixtat'a'anta an Jesús, xtalan xa'axtulhi an ix'espada chi xtalh akatuch'uk'up'uxli xapumatam ixma'tsuku an yu tukancha xa'ay sacerdote. 52 Wa chuncha an Jesús juniy:

―K'ama'at'i ami'espada, mu yu espadaja pulasay, wachu espadaja kapuniya'. 53 ¿Ch'u na'uncha li jantu layi aktapayninilh an kimPay chi akijamakminilh palay de la'akawt'uy batallón angelhnin? 54 Pero li chuncha, ¿tasucha lay kalhitapasaya tacha an ts'o'muk'akanta tan najun li chuncha katapasalhi?

55 Pus akxni an Jesús jajuniy an lapanakni:

―¿Chu ijka'alhawna li kilamintawcha ch'apayawnin laka espada chi laka k'iw? Lhilhiji xak'an masunu an laka tajtan, chi akxni jantu kilach'apayajuw.

56 Pero wa xliyu li chuncha katapasaya tacha an tats'o'muk'ata an yu ixtalhichiwiniy ixchiwinti Dios.

Wa chuncha an ixt'alhtanan an Jesús, wanaj tamakaw'olh, ta'oslicha.

57 An yu tach'apayawlh an Jesús talhi'anilhcha an Caifás, yu xa'ay tukan sacerdote, tan ixta'ayxto'nun an xamaestrojnin lhamap'a'sin chi an laktatanincha. 58 An Pedro wa ma'atcha ixch'a'o'alhi'anta sta an la ixjatalakxtut an yu xa'ay tukan sacerdote, chi tanuchalhcha, sa'cha jat'atawilh an yu ixtajalhistaknan, para li kala'ts'ilhcha tuchini katapasayacha.

59 Walh an xalaj'ajin sacerdotejnin chi chux an yu ancha ixta'ayxto'nun, ixtapuxkajuycha tu'u maslakatinti para li katalhimuk'alhcha an Jesús, chi laycha katama'nilh. 60 Pero jantu tu'u tala'cha'alh, masi ixluwk'ancha ixtacha'an yu ixtanajun tu'u yu jantu sawalh. Ixli'astan tacha'ampalh ixt'uyunk'an, 61 tanajun:

―Ani lapanak najun: Layi aklakt'ilhilh an ixtajtan Dios chi ixlila'at'utu wilhchan akla'oxicho'olh.

62 Pus tayalhi an yu tukancha xa'ay sacerdote, chi xa'alaycha an Jesús, juniy:

―¿Jant'u k'at'ija'alht'ayan? ¿Tisuncha tacha ani talhimuk'ayani?

63 Pero an Jesús jantu k'is alhtaylh. Wa chuncha an xa'ay tukan sacerdote jumpalay an Jesús:

―La ixtalakask'i an yu la'ajunta Dios ijkunan akilajuniwi li uxint'i Cristo, an isTs'alh Dios.

64 Pus an Jesús alhtaylh juniy:

―Uxint'ich'a naw, chi atumpaj klajunaw chaway ati'anta k'ala'ts'ina'itcha an isTs'alh Lapanak katawlanta tan oxi la ixpa'xti an Dios tan ch'alhkatnan, ch'i k'ala'ts'ina'it'iti akxni kaminanta lakt'iyan laka jataputs'i.

65 Wa chuncha, an yu xa'ay tukan sacerdote la'lh'alhcha an ixla'ch'it, najun:

―¡Wa aya juniya an Dios! ¿Ali jama'lhtask'iniyawi yu kata'alhtasulh? Alha'asmat'atcha tacha an wa aya juniy an Dios. 66 ¿T'asuch'a lhiwilayat'iti?

Yu'uncha ta'alhtaylh, tajuniy:

―¡T'acha'ancha kama'nikalh!

67 Pus akxni tsukulhcha tala'puchujway, chi ixtalakasamaycha chi ali'in ixtala'xtisaycha. 68 Ixtajuniy:

―Akilajuniwcha tichini muk'anincha Cristo.

69 An Pedro sa'cha ixwilh ma'spa jatalakxtut. Walh la'cha'alh pumatam t'aku ma'tsuku, juniy:

―Uxint'i wachu ixt'alhtanak'at'i an Jesús, jamacha'a Galilea.

70 Pero an Pedro najun ma jantu, ixchuxk'ani ta'alha'asmat'olh, najun:

―Jantu ijk'atsay t'uch'ini uniycha.

71 Ixli'astan an Pedro, alhi an jatalakxtut, walh a'tam la'ts'impalh pumatam t'aku ma'tsuku', an t'aku jajuniy an yu ancha ixtat'ajun:

―Ani wachu ancha ixt'a'aklat'ajun an Jesús, yu jamacha'a Nazaret.

72 Pero an Pedro a'tam nawpalhi li jantu mispay, najuncha li jantu sawalh, najun:

―¡Jantu ikmispayi tichini yuchacha lapanak!

73 Pants'ik'ischa jumpalh, an yu ancha ixtat'ajun tala'cha'alh an Pedro tajuniy:

―Chun sawalh uxint'i wachu yu yu'uncha, mu wanaj ch'unch'a ch'iwiniy.

74 Pus akxni wa aya najuncha, chi ixnajuncha li xasawalh, najun:

―Jantu ikmispayi anchunu lapanak.

Walh wa akxni t'asalhcha an puyux. 75 Pus akxni, an Pedro pastaklhicha tacha an ixjunita an Jesús, akxni junikalh an Pedro: “Jantuka' katit'asalh puyux, a't'utucha k'anawna'a li jant'u k'imisp'ay.” Pus taxtulh ma'spa, wa stakcha alhulh.