1 Ali'in xamaestrojnin lhamap'a'sin chi an lapanakni yu ixjajunkan fariseojnin jamacha'an Jerusalén, tala'cha'alhi an Jesús, tajuniy:

2 ―¿Tasu li amint'alhtanan jantu ta'ilhtuyi tacha an tanajun an yu laktatanincha, jantu tama'ch'a'ayi akxni talakwajini?

3 An Jesús yucha wachu jajuniy:

―¿Chi uxitnan tasu li an ixlamap'a'sin Dios lhimap'axayatcha wa milhamap'a'sinchak'ani? 4 Mu an Dios najun: “K'a'asmatnini yu junan minpay chi minati.” Chi nawpalay: “Yu xkayaj juniya ixpay chi ixnati kaniya'.” 5 Walh uxitnan nawnat'iti li jantu tani lay masi jantu kata'a'tayjulh ixlakpaynink'an an lapanakni, yu tama'lhtask'iniy la'a'tayjun, mu li yu ixtaxta'nilh ixlakpaynink'an li kataxta'ni'oyacha Dios. 6 Ch'unch'ach'a p'unawnat li jantucha task'iniya li kata'a'tayjulh ixpayk'an chi ixnatik'an an lapanakni. Lhimap'axayatcha an ixchiwinti Dios wa minchiwintichak'an. 7 ¡Uxitnan wa layat'itcha! Ts'awjcha talhichiwinin an Isaías yu ixlichiwiniy ixchiwinti Dios akxni nawlh:

10 Wa chuncha jat'asani'olhi an Jesús an lapanakni, chi jajuniy:

―K'a'asmatt'itcha, chi k'alhimach'a'xat'it: 11 Jantu yu an yu ukani lhkilikiy an lapanak, yu jalhkilikinin yucha an tacha kilhtaxtukan chiwinti.

12 Pus an ixt'alhtanan an Jesús stalh tala'alh tajuniy:

―An fariseojnin jantu oxi talhiwilalh akxni an ta'asmatlhi t'ach'a an naw.

13 Pero an Jesús jajuniy:

―Wa tuchicha jach'itin yu jantu yu ch'anta an kimPay, yu wilhchalh anu lakt'iyan, kap'ulhumaj'ankana'. 14 Yu'unch'a k'ajamak'a'unt'itcha, yu'uncha la'la'lhtulu'un, chi wa ixt'ala'la'lhtulu'unchak'ani tat'alama'ch'apalhi'anta, wa ayxtami kawarj ta'ana tan a'talhman.

15 An Pedro alhtaylh juniy:

―Akilajuniwi tuchini nawputuncha t'ach'a an na'un.

16 Pus an Jesús alhtaylh juniy:

―¿Wach'u jant'uk'a' lay lhimach'a'xayat'it? 17 ¿Jant'u k'ats'ayat'iti li chux an yu ukan la kimpajank'ani tajuyachalh, chi ixli'astan maj'ancho'okancha? 18 Pero an chiwinti, la kijalhunutk'ani minachalh, yucha yu lhkilikiy an lapanak la ixjatsukunti. 19 Mu an laka jalhunuti minachalh an lakmakxkay jatapast'ak'at, tacha an yu jama'ninin, chi yu talat'atamay yu jantu talat'at'ajun, chi yu wa aya talay, chi yu ja'alhawnan, chi yu wa maslakatinin, chi yu wa aya juniy Dios u xamati ixt'alapanak. 20 Yucha yu lhkilikiy an lapanak pero li wa jantucha akma'ch'a'alh chi ak'ulhcha li tu'u, yucha jantu jalhkilikinin.

21 Taxtulhcha ancha an Jesús, alhcha xalakaat'un Tiro chi Sidón. 22 Walh pumatam t'aku jamacha'a Canán, la'cha'alhi an Jesús, chi p'ascha ixa'alay ixjuniy:

―¡Jamach'alhkat Jesús, ists'alh David, iksk'iniyan lamapaynin! An kintsi wa la'apaxto'ta la'atam makxkay'un, chi sawalhcha mama'alh'ajni.

23 Pero an Jesús jantu k'is alhtaylh. Pus tajuniy an ixt'alhtanan:

―K'a'un li ka'ancho'ochalhcha, mu kintach'a'o'atan chi t'asajmintacha.

24 An Jesús najun:

―Kit'in kimakminkanta li wa yucha an jamacha'an Israelhi ajkapuxkawlh, mu tats'an'ata.

25 Pero an t'aku la'cha'alhi an Jesús chi tatso'ottanilhcha la ixlakapu', ixtapayniniycha ixjuniy:

―¡Ak'ilhi'a't'ay'ut'i Jamach'alhkat, Jesús!

26 Pero yucha wa juniy:

―Jantu oxi li kajama'osunikalhcha yu ta'ut'ajun jas'at'an chi kajamaka'anikalhcha an x'oyun.

27 An t'aku juniy:

―Chuni Jamach'alhkat Jesús, pero an x'oyun ta'usak'a masi wa xala'tach'e'echa an ts'aluku yu patajuy laka mesa.

28 Pus akxni an Jesús juniy an t'aku:

―Uxint'i jak'iklak'a'inin sawalh, kajunacha yu lak'ask'in.

Pus an istsi an t'aku wa akxni ta'oxicho'olhcha.

29 Ancho'olhcha an Jesús, alhcha waniy xa'alamalh Galilea. Chi tama'ast'a'alhcha a'stitawk'a, anchacha sa' tawlhchalh. 30 Lhilhuwi la'cha'ankalh, chi ixtalhicha'aniycha yu wa la'ch'anlh'awilin, chi yu wa la'la'lhtulu'un, chi yu wa laj'a'atapanin, chi yu wa lakmaklht'ulukun, chi ali'incha ta'an'anin, wa tuchicha ta'an'at ixtapakxanta. La ixlakapucha an Jesusi ixtayajuy chi yucha ixjak'uch'uycha. 31 Tacha an ts'anakscha ixlakyakalh, sawalhcha ixtalhi'a'niya li an yu jantu lay ixtachiwiniy, ixtachiwiniycha, chi an lakmaklht'ulukun ixtata'oxicha, chi an la'ch'anlh'awilin oxicha ixtalakalhtanan, chi an la'la'lhtulu'un oxicha ixtajalakawanan. Sawalhcha ixtalaknajuni li an ixDiosk'an jamacha'an Israel, ay sawalh.

32 Jat'asanilhi an ixt'alhtanan an Jesús, jajuniy:

―Ijkamapayniya ani lapanakni, mu la'at'utucha wilhchani ani tat'ajun, chi jantu tu'u yu katita'ulh. Chi ajkamala'achacho'olhcha wa chuncha, wa lay inta tala'la'awitijtayalh laka tij.

33 An ixt'alhtanan tajuniy:

―Wanaj lhilhuwi tacha ani ayxto'kan, para kajamalhilaaniw. ¿Tanischa lay ka'iyaw lhuw pan li ani jantu tu'u lakwilakalhi?

34 An Jesús jajuniy:

―¿Tasu a'xchuxcha pani lhit'ant'at?

Yu'uncha tajuniy:

―A'xtujun chi lakats'uniycha lakt'ikt'i jatanti.

35 Pus an Jesús jajuniy an lapanakni li katalaktawlh'olhka an lakaat'un. 36 Chi yucha xa'a'ilhcha an a'xtujun pan chi an jatanti, chi xta'lhicha lhimala'puchajun, ixli'astan la'ch'e'elhcha, wa chuncha jala'xta'nilhcha an ixt'alhtanan, chi yu'uncha tamala'pitsinilhcha ixchuxk'an an lapanakni. 37 Ixchuxchak'ani talak'ulh chi talhikiklalhcha. Ixli'astan la'atujun kanastaja a'tsamcho'olh yu wa xaxajnicha tapusakcho'olh. 38 An lapanakni an yu talakwaylh, la'at'at'i milh, an t'akunin chi an jas'at'an yu tama'waylh wachu, jantu jat'aput'e'ekalh. 39 Jala'axa'ala'olh an Jesús an lapanakni, tajulhcha an laka barco, alhcha tanchun xalakaat'un Magdala.