1 Ixli'astan akxni chunchacha naw'olh an Jesús, jat'ataxtulhcha an ixt'alhtanan, jat'a'alhcha ixlitapiktutam la'x'ati junkan Cedrón, tan stak ixlakyalh olivo, anchacha jat'apatanulh an ixt'alhtanan. 2 An Judas, an yu kama'axt'a'a an Jesús, wachu ixjamispanan, mu an Jesús a'lhuwcha ancha ixjat'ata'ayxt'o'a an ixt'alhtanan. 3 Pus an Judas jat'acha'alhcha ixluwk'an soldadojnin chi ixpoliciajnink'an an xalaj'ajin sacerdotejnin chi an fariseojnin, ixtalaklhi'antacha ixpumaklhkuk'an chi k'iw yu ixlajkinkama'tajita chi ixpama'nink'an. 4 Pero mu an Jesús ixk'atsaycha tuchini katapasayacha, yuchacha p'ulhnaj jalakatastuklhi, jajuniy:

―¿Tisiyuch'ach'a p'uxk'awyat'iti?

5 Yu'uncha tajuniy:

―Yucha an Jesús jamacha'a' Nazaret.

An Jesús jajuniy:

―Kit'in.

An Judas an yu kama'axt'a'a wachucha ani ixjat'ayalh. 6 Akxni an Jesús jajunilh: “Kit'in”, tataticho'olh chi lakaat'uni tatama'ochalh, tala'ta'a'talh. 7 An Jesús a'tam jalhisakmipalh:

―¿Tisiyuch'ach'a p'uxk'awyat'iti?

Yu'uncha a'tam tajumpalay:

―Yucha an Jesús jamacha'a' Nazaret.

8 An Jesús jajuniy:

―Iklajunawcha li kit'in. Li kit'ini kilapuxkawyaw, ani ali'in k'ajamak'awnit'iti li kata'alh.

9 Tacha ani nawlh wa xliyu li katapasalhi tacha an ixnajunta an Jesús, akxni nawlh: “KimPay, an yu k'ijaxt'a'nin jantu xamati ts'an'alh.”

10 Wa chuncha an Simón Pedro, ix'atu'uk'alh ma'atam ix'espada, xtalan xa'axtulh, chi xtalh akatuch'uk'up'uxli yu lhi'oxi ix'a'ax'olh an ixma'tsuku an xa'ay tukan sacerdote, an ma'tsuku ixjunkan Malco. 11 An Jesús juniy an Pedro:

―¡K'amat'a'uch'o'o la xacubierta ami'espada! Li yucha an kimPaycha kixta'niy ani suniya lhima'alh'ajna, ¿chu laycha jantucha aktila'a'ilh?

12 Wa chuncha an soldadojnin, chi an ixcomandantejk'an, chi an ixpoliciajnink'an an judiojnin, tach'apayawlhcha an Jesús chi tach'iylhcha. 13 P'ulhnajcha talhi'anilh an Anás, mu ixput'ijo'at an Caifasi ixjunita, yu xa'ay tukan sacerdote ixjunita anchunu k'ata. 14 An Caifás yucha yu ixjajunita an judiojnin li palay oxi li wa pumatam lapanak kajalhinilh ixchuxk'an an lapanakni.

15 An Simón Pedro chi apumatam ixt'alhtana an Jesús ixtach'a'o'ata. An pumatam ixt'alhtana an Jesús t'atanuchalhi an la ixcha'a an xa'ay tukan sacerdote, mu yucha ixt'alamispay. 16 Pero an Pedro wa ma'spacha tamakawchalh, laka malhticha. Pus an ixt'alhtana an Jesús an yu t'alamispay an xa'ay tukan sacerdote, taxtulh, t'achiwinilhi an t'aku yu ixjalhistaknan an laka malhticha, pus ma'anuchalhi an Pedro. 17 Wa chuncha an t'aku an yu ixjalhistaknan an laka malhticha, juniy an Pedro:

―¿Chu jantu wachu ixt'alhtanak'at'i an anu lapanak?

Yucha najun:

―Jantu, kit'in jantu.

18 Chi mu lhik'asnini ixjunita, an ma'tsukunin chi an yu ixtajalhistaknan an laka tajtan, ixta'ulatacha jikmi, anchacha ixtala's'ont'ajun. An Pedro wachucha ani ixma'la's'onyalh.

19 An xa'ay tukan sacerdote lhisakmilhcha an Jesús ixlakatak'an an ixt'alhtanan chi tuchini yu ixmasuycha. 20 An Jesús alhtaylh juniy:

―Kit'in chux lakamunulhpa ixlitalakasuni xajkaxa'alay. Jantu tu'u yu wa la'asa'nik'acha akchiwinilh, o'sliyan li tan pulakchiwin ch'a'a chi laka laktajtani xakmasuy, tan tata'ayxto'ojoy an judiojnin. 21 ¿T'asu li k'it'inch'a k'ilhisakmiya? K'ajalhisakmit'icha an yu kinta'asmatnita, yu'unchacha katanawlh tuchini ijkalhixa'alatacha. Yu'uncha tak'atsayi tuchini iknajuntacha.

22 Akxni chunchacha nawlh an Jesús, xapumatam an yu tajalhistaknan an laka tajtan lo'scha la'xtisalh, juniy:

―¿Ch'unch'ach'a alht'ayst'uk'a an xa'ay tukan sacerdote?

23 An Jesús juniy:

―Li jantu oxi yu iknawlh, k'anawcha tuchini chunchacha, pero li oxi, ¿t'asu li k'imuk'aniycha?

24 Wa chuncha an Anás, mak'alhcha an Jesús tan ixwilhchalh an xa'ay sacerdote Caifás, tach'ilhi'anilhcha.

25 Walh an Pedro, anchaka ixyalh ixma'la's'ont'ajun, pus tajuniy:

―¿Chu jantu ixt'alhtanak'at'i wachu'?

Yucha najun ma jantu, najun:

―¡Jantu, kit'in jantu!

26 Walh pumatam ixma'tsuku an xa'ay tukan sacerdote, ixt'alalhila'ts'i an yu ix'akatuch'uk'up'uxta an Pedro, juniy:

―¿Chu jantu uxint'i an ikt'ala'ts'in an tan lakyalh xak'iw olivo?

27 An Pedro a'tam nawpalh ma jantu, walh wa naw'olhka, t'asalhcha an puyux.

28 Tamaxtulhcha an Jesús an la ixcha'a an Caifás, talhi'alhcha la ixpalacio an jamach'alhkat. Chi mu ixtunkunmintacha, an judiojnin jantu tatanulhi an laka palacio, para li jantu katalhkilikilhi ixjatsukuntik'an chi chuncha layi katawaylh laka Paxku. 29 Wa chuncha taxtulhcha an Pilato, chi jala'cha'alhcha, jajuniy:

―¿T'isunch'a lhi'alht'asuyat ani lapanaki?

30 Yu'uncha tajuniy:

―Li jantu tu'u ilhtuy tala'alhin, jantu xaklama'axta'niw.

31 Pus an Pilato jajuniy:

―K'alhip'inchi'itcha uxitnan, chi tacha najuntacha la milhamap'a'sink'ani k'ap'umama'alh'ajnichi'it.

An judiojnin tajuniy:

―Pero kitnan jantu kintamakawnikanani li akma'niw xamati'.

32 Chunchacha tanawlh para li katapasalhcha tacha an ixnajunta an Jesús, tani kapuniyacha.

33 Wa chuncha an Pilato tanupalhi an laka palacio, chi t'asanilhcha an Jesús, juniy:

―¿Uxint'i ixrejk'an judiojnin?

34 An Jesús juniy:

―¿Wa mi'akst'uch'a k'ilhisakmiy u xamati'ini talhixa'alatan kit'in?

35 An Pilato juniy:

―¿Chu sna ikjudio? Amint'amacha'an chi an xalaj'ajin sacerdotejnin yu'uncha tama'axt'a'an la kimakni. ¿T'isunch'a ilht'ut'a?

36 An Jesús juniy:

―An kilhich'alhkat jantu xanawin ani lakamunulhpa'. Li xanawin ani lakamunulhpa ka'ixwalh kilhich'alhkat, an ki'a'tayjunin ka'ixtalhilasalhi para li jantu akma'axta'kalh la ixmaknik'an an judiojnin. Pero an kilhich'alhkat jantu aniya xanawin.

37 Pus an Pilato juniy:

―¿Pus, uxint'i ka Rejk'at'i?

An Jesús alhtaylh, juniy:

―Kit'in ikRey, tacha uxint'ich'a nawt'a'un. Kit'in ixlakata yucha li iktsukulh chi yucha ikla'minta ani lakamunulhpa', para li aklhichiwinilhi an yu sawalh. Wa tichicha yu sawalhi tan t'ajun, asmat'a an kinchiwinti.

38 An Pilato juniy:

―¿Tisuncha yu sawalhi?

Chi akxni chunchacha nawlh, taxtupalh, jala'ampalhi tan ixtayanalh an judiojnin, chi jajuniy:

―Kit'in jantu tu'u ikla'cha'anini ixtala'alhin. 39 Pero uxitnan ch'unch'a lhismanit'at li iklamakawniyaw pumatam tach'in akxni Paxku. ¿La'a'iyat'iti li aklamakawniwi an ixRejk'an judiojnin?

40 Wa chuncha ixchuxk'an a'tam p'as talakt'asapalh, tanajun:

―¡Ani jantu! ¡Yucha an Barrabás!

An Barrabás, pumatam ja'alhawna ixjunita.