1 Ixt'ajun pumatam lapanak wa ixta'an'ay ixjunkan Lázaro, jamacha'a Betania, la ixla'acha'an an Marta chi an ixp'isa'a María. 2 Ani María ixt'alajamatsan an Lázaro, yucha yu lhich'ampaxalh perjume an Jamach'alhkat Jesús chi ch'anxakalhcha la ix'ay. 3 Pus an ixt'uyunk'an ixt'alajamatsanan an Lázaro, tamala'achanilhi chiwinti an Jesús tan tajuniy:

―Jamach'alhkat, an yu map'ayniy wa ta'an'ay.

4 An Jesús, akxni asmatlhi, najun:

―Ani ta'an'at jantu katijama'ninilh, yucha apalij wa kapumasukana an ixta'ayat Dios, chi an ixta'ayat an isTs'alh Dios.

5 Chi masi sawalh ixmapayniya an Jesús an Marta, chi an ixp'isa'a chi an Lázaro, 6 la'at'uy wilhchani tamakawpalhchalh an tan ixt'ajun masi junikalhcha li an Lázaro wa ixta'an'ay. 7 Ixli'astan jajunilh an ixt'alhtanan:

―Ka'ampalawi xalakaat'un Judea.

8 An ixt'alhtanan tajuniy:

―Maestro, jantuka' ma'ani an judiojnin ancha ixtalakat'alhmaputunacha'an, ¿ch'i a't'amch'a t'ip'imp'alay?

9 An Jesús jajuniy:

―¿Chu jantu la'akawt'uy horaja lhit'ajun an wilhchan? Yu akxni tunkuwi jalhtanan jantu kati'ayst'uk'ukalh, mu la'ts'ini an xajatapulhkunu ani lakamunulhpa'. 10 Pero yu puts'ista jalhtanan, ayst'uk'ukan, mu jantu pulhkuyi ancha.

11 Ixli'astan jajumpalay:

―An ki'amigojk'an Lázaro lhtatalhcha, pero ikti'an makujunu'.

12 An ixt'alhtanan an Jesús tajuniy:

―Jamach'alhkat, li lhtatalhcha, nawputun li katak'uch'uya'.

13 Pero an Jesús yucha ixjajunt'ajun li an Lázaro nilhcha, pero an ixt'alhtanan ixtanajun li yu wa lhtatakancha sawalh.

14 Wa chuncha an Jesús ts'awjcha jajunilh:

―An Lázaro nilhcha, 15 chi oxi iklhiwilay milakatak'an uxitnan li jantu ani xakt'awnachalh para li k'ak'iklak'a'it'it. Ka'awcha la'ts'inin.

16 Wa chuncha an Tomás yu ixtajuniy lhist'uy, jajuniy an ali'in ixt'alhtanan:

―Wachu ka'awi kitnan, para li wachucha kat'aniyaw.

17 Akxni cha'alh an Jesús, la'at'at'icha wilhchani ixmaknukanta an Lázaro. 18 An la'acha'an Betania waniy la'acha'an Jerusaleni ixlitamakajun, ka wa tacha la'at'utu kilometrojo ixlima'at. 19 Ixluwk'an an judiojnini ixta'anta la'ts'inin an Marta chi an María, ixtat'alama'oxamixiycha li nilh an Lázaro ixt'alajamatsank'an an Marta chi an María. 20 Akxni an Marta k'atsaalhi li an Jesús ixcha'ant'ajuncha, taxtulhcha, alhcha lakatastuknu'. Pero an María tamakawlhi an la ixcha'ak'an. 21 An Marta juniy an Jesús:

―Jamach'alhkat, li ani k'axt'a'ulh, an Lázaro jantu kaxnilh. 22 Pero wachu ijk'atsapalayi masi sta chaway k'ask'inin watuchicha an Dios, kaxta'niyan.

23 An Jesús juniy:

―An Lázaro kala'awcho'oya'.

24 An Marta alhtaylh juniy:

―Mu chun, ijk'atsayi li kala'awcho'oya akxni kala'awcho'okana', yu xati'astancha wilhchan.

25 An Jesús juniy:

―Kit'ini yu ikpula'awcho'okan chi ijkatsukunti. Yu kinkiklaka'iy, masi kanilh, katsukucho'oya'. 26 Chi wa tichicha yu t'ajunka chi kinkiklaka'iy, jantu katini'alhilh. ¿K'iklak'a'iya ani yu ijkunan?

27 An Marta alhtaylh juniy:

―Chuni, Jamach'alhkat, kit'in ijkiklaka'iya li uxint'i Cristojk'at'i, isTs'alh Dios, yu t'ant'a ani lakamunulhpa'.

28 Akxni chunchacha naw'olh an Marta, alhcha t'asanini an María, ixt'alajamatsan, kalakscha junilh:

―An Maestro aniya t'ajun chi t'asaniyan.

29 An María wa chuncha asmatlhi, las tayalh chi alhcha la'ts'ini an Jesús. 30 An Jesús jantuka' ixtanuyachalhi an la'acha'an. Wa anchaka ixt'ajun tan an kila'kilalh an Marta. 31 Akxni tala'ts'ilhi an María li tayalhcha, chi lascha taxtulh, an judiojnin an yu ancha ixtat'awilanalh laka cha'a yu ixtama'oxamixiy tach'a'o'alh, ixtanajun li sna an tan aknukanachalhcha alh alhunu'.

32 Akxni cha'alhcha an María tan ixt'ajun an Jesús, tatso'ottanilhcha la ixjach'aja', juniy:

―Jamach'alhkat Jesús, li ani k'a'ixt'a'ulh, an Lázaro jantu ka'ixnilh.

33 An Jesús akxni la'ts'incha an María li ix'alhuncha chi an judiojnin an yu tat'acha'alh wachucha ixtalaj'alhun, an Jesús sawalhcha ta'oxila'alhilh. 34 Chi jalhisakmilhcha, jajuniy:

―¿T'anisch'a maknut'it?

Yu'uncha tajuniy:

―Jamach'alhkat, k'at'at'icha la'ts'ini'.

35 Wa chuncha an Jesús alhulhcha. 36 Pus an judiojnin ixtanajun:

―¡Jo' k'ala'ts'int'it, sawalhcha ka ixmapayniy!

37 Pero an ali'in ixtanajun:

―Ani mu yucha layi malakawanilh an la'lhtuluw, ¿chu jantu layi ta ka'ixlit'alalh para li jantu ka'ixnilhi an Lázaro?

38 An Jesús, mu a'tamcha ixlita'oxila'alhipalay, pus alhi an tan ix'aknuyachalh an Lázaro. Wa tan'apilho'o'o an lakachiwxin, ixlakapuyawkantacha chiwxi an tan ixputanukanachalh. 39 An Jesús jajuniy:

―K'ama'osut'iti an chiwx.

An Marta, an ixt'alajamatsan an yu ixniytacha, juniy an Jesús:

―Jamach'alhkat, ka makxkaycha akamin, mu la'at'at'icha wilhchani niyta.

40 An Jesús juniy:

―¿Chu jantu ijkunani li jak'iklak'a'inin, k'ala'ts'ina'a an ix'alhp'asninti Dios?

41 Pus wa chuncha tama'osulhcha an chiwx an tan ix'aknukan, chi an Jesús tala'st'alhcha, najun:

―KimPay ikxta'niyan lhimala'puchajun, mu k'i'asmatnin. 42 Ijk'atsayi li lhilhiji k'i'asmatniy pero tuchi chuncha iklhinajun ixlakatak'an ani tayanalh lapanakni, para li katakiklaka'ilhi li uxint'i k'imakt'ant'a.

43 Ixli'astan akxni chunchacha naw'olh, p'ascha chiwinilh, najun:

―¡Lázaro, k'at'axt'ucha!

44 Pus an yu ixnitacha taxtulhcha, an la ixlakmaka chi an la ixlakch'aja ixla'la'apach'inikantacha laka laksliwilh la'ch'it chi an la ix'ukxpu yu aycha la'ch'iti ixpula'apach'inikanta. An Jesús jajuniy:

―K'ala'ax'ott'itcha chi kachajcha ana'.

45 Tacha ani ilhtulh an Jesús, ixluwk'ani takiklaka'ilh an judiojnin an yu ixtala'cha'anta an María, mu tala'ts'ilhcha tacha an ilhtulh. 46 Pero an ali'in ta'alh la'ts'inini an fariseojnin, chi tajunilhi tani ilhtulhcha an Jesús. 47 Pus an xalaj'ajin sacerdotejnin chi an fariseojnin tata'ayxto'lhi laka ay junta chi talajuniy:

―¿Tasu ka'ilhtuyawcha? Ani lapanak wa stakcha lakmasut'ajuni tanlhun yu la'lhima'anxkay. 48 Li wa chuncha kamakawniyaw, katakiklaka'i'oya', chi an yu jamacha'an Roma katamina chi katalakt'ilhiya an kintajtank'an chi an kilakaat'unk'an.

49 Pero pumatam yu yu'uncha, ixjunkan Caifás, xa'ay sacerdoteje ixjunita anchunu k'ata, jajuniy:

―Uxitnan jant'u t'u'u k'ats'ayat, 50 ch'i jant'u lhak'ap'up'inat'iti li palay oxi para kitnani li wa pumatam lapanaki kajalhinilh ixchuxk'an an lapanakni, walh jantu li ta ixlijalhi'ay lakwilakalh an kilakaat'unk'an kalakt'ilhikalh.

51 Tacha an nawlh, jantu wa ix'akstucha chuncha nawputulh, wa xliyu yucha xa'ay sacerdoteje ixjunita anchunu k'ata, pus la'asiyaj manawnilhcha an Dios li an Jesús kajalhiniya an ixlapanakni. 52 Chi jantu wa ixlakatacha ani lapanakni, wachu ixlakata li kajapuma'ayxto'kana an ixjas'at'an Dios yu ta'a'pitsinin. 53 Pus chunchacha, akxnicha wilhchani tatamakawlh an xajamach'alhkatni judiojnin li katama'niyacha an Jesús.

54 Xliyu an Jesús jantucha ixjatalakasuniya an judiojnin, taxtulhcha an xalakaat'un Judea, alhcha tanchun la'acha'an junkan Efraín, waniy tan wa jaxixnintacha. Anchacha jat'atamakawlh an ixt'alhtanan.

55 Chi waniycha ists'an'ay ixpaxkuk'an an judiojnin, pus ixluwk'ani yu wa ancha la'la'acha'anaxni ixtawilanalh tatama'ast'a'alhi Jerusalén akxni jantuka' ix'a'tayniy an paxku, para li katastalan'alh. 56 Ixtapuxkajuycha an Jesús chi ixtalajumpaxay an laka tajtan:

―¿T'asch'a lhiwilayat'iti? ¿Kamina laka k'atan u jantu?

57 An fariseojnin chi an xalaj'ajin sacerdotejnin ixtalhinajuntacha li ma xamati la'ts'in an Jesús, ma kanawlh, para li katach'apayawlhcha.