1 Akxni k'atsaalhi an Jesús li an fariseojnin tak'atsaalhi li ixnawkan li an Jesús palay ixjama'paxanan chi an Juan jantu, 2 masi an Jesús jantu yu ixjama'paxanan, yu'uncha an ixt'alhtanan, 3 an Jesús taxtulhi xalakaat'un Judea k'uxa'ancho'olhi xalakaat'un Galilea.

4 Chi ixlitask'iniya li kala'pusli o'sliyani xalakaat'un Samaria. 5 Pus cha'alhcha lakatam xala'acha'an Samaria, junkan Sicar, waniy la ixlakaat'un an Jacob yu ixta'nitacha an ists'alh José. 6 Ancha ix'ulata ixpozojo an Jacob, pus anchacha sa' tawilh an Jesús, mu sawalhcha ilho'onta la ixjalhtanti, wa k'ischa ix'atunkunt'ajuncha. 7 Walh cha'alh pumatam t'aku, jamacha'a Samaria, ixmakutuycha xkan, pus an Jesús juniy:

―Ak'int'a'ott'ika lakats'uniy mixkan.

8 Mu an ixt'alhtanan an Jesús ixta'anta an la'acha'an tamawnin yu kata'uya'. 9 An t'aku, jamacha'a Samaria alhtaylh, juniy:

―¿Tasu li k'isk'iniycha xkan li akt'a'otni li uxint'i jamacha'a Judeajk'at'i chi kit'in ijkamacha'a Samariaja?

Chuncha junilh mu an judiojnin chi an samaritanojnin jantu ixtalala'ts'imputum. 10 Pus an Jesús alhtaylh juniy:

―Li k'a'ixk'ats'at'i yu xt'a'a an Dios, chi tichini yuchacha an sk'iniyan xkan, uxint'i yuch'a k'a'isk'inin, chi yucha ka'ixta'nini xkan yu la'ajunta.

11 An t'aku juniy:

―Jamach'alhkat, jant'u t'u'u lhit'a'un yu k'ap'umak'ut'u an xkan, chi an pozo putalhman. ¿T'anisch'a k'a'iya'a xkan yu ak'ixt'a'niya'a yu la'ajunta? 12 ¿Chu sna palay ayk'at'i, palay jantu an kimpayk'an Jacob yu kintaxta'nin ani pozo, tan otlhi xkan chi an ixjas'at'an chi ixjatapakxat?

13 An Jesús juniy:

―Wa tichicha yu ot'a ani xkan kakikxixpala', 14 pero yu ka'ot'a an xkan yu kit'in akxta'niya jantucha a'tam katikikxixli. Mu an xkan yu kit'in akxta'niya la ixjatsukunticha kataxtutawla yu kaxta'niyacha ixjatsukunti yu jantu min'ojoy.

15 An t'aku juniy:

―Ak'ixt'a'nini yu yucha xkani Jamach'alhkat, para li jantucha ali ajkikxixli chi jantucha ali akmilh makutunu ani.

16 An Jesús juniy:

―K'ap'inchi t'asanini mint'apapa chi k'at'at'ana'acha.

17 An t'aku alhtaylh juniy:

―Jantu tu'u kint'apapa'.

An Jesús juniy:

―Chunchacha sawalhi t'ach'a an na'un li jantu tu'u mint'apapa'. 18 Ixkisinchak'ani jamak'a'unt'a chi chaway an yu lhit'a'un jantu mint'apapa'. Sawalhi an yu na'un.

19 Akxni chunchacha alha'asmat'a an t'aku, juniy:

―Jamach'alhkat, kit'in iklhiwilay ka ixchiwinti Diosi lhich'iwiniy. 20 Kitnan an kilakpaynink'an ani a'stitawk'a ixtatapayniniy Dios, pero uxitnan yu judiojnin nawnat li la'acha'an Jerusaleni katapayninikalh.

21 An Jesús juniy:

―Ani ijkunan sawalh, kachina panch'e'ex akxni k'at'ap'ayniniya'it'it an Dios wa tanchuncha masi jantucha ani a'stitawk'a chi Jerusalén. 22 Uxitnan jant'u k'ats'ayat'iti t'ich'ini t'ap'ayniniyatcha, pero kitnan ijk'atsayawi tichini iktapayniniyawcha, mu tuchi lhita'alhtaxtukan ixlakatak'an an judiojnin. 23 Pero an panch'e'ex kachinacha, chi chawaycha, akxni an yu ixlisawalh tatapayniniy an Dios katatapayniniya laka takuwin chi ixlisawalh, chi mu wachu an Dios, an yu tatapayniniy japuxkajuyi li katatapayninilh. 24 An Dios wa Takuwin, chi an yu tatapayniniy laka takuwin chi ixlisawalh task'iniya li katatapayninilh.

25 An t'aku juniy an Jesús:

―Ijk'atsayi li kamina an Mesías, yu junkan Cristo. Akxni kaminacha akintajun'oyani an tanlhun.

26 An Jesús alhtaylh:

―Yucha kit'in, kit'in yu ikt'achiwint'awnan.

27 Wa akxni tachincho'olhcha an ixt'alhtanan an Jesús, pus ixtalhi'a'niycha li ixt'achiwint'ajun pumatam t'aku'. Pero jantu xamati lhisakmilh tani ixnajuncha an t'aku u tuchini ixlit'alakchiwint'ajuncha. 28 Wa chuncha an t'aku makaw'ulalhi an ix'a'xaw, chi alhcha jamak'atsaanini an la'acha'an an lapanakni, jajuniy:

29 ―K'at'at'it, ka'aw la'ts'inin pumatam lapanak yu kijunilhi tuchini k'ilhtutacha. ¿Jantu yucha an Cristojcha?

30 Pus tataxtulhi an la'acha'an chi tala'cha'alhi an Jesús. 31 An ixt'alhtanan an Jesús yu'uncha ixtalhitapayniniyanalh, ixtajuniy:

―Maestro, k'awaycha.

32 Yucha jajuniy:

―Kit'in iklhit'ajun la'atam wayt yu uxitnan jant'u misp'ayat.

33 Pus an ixt'alhtanan ixtanajun:

―¿Xamati amaj lhiminilh tu'u yu ka'ulh?

34 An Jesús jajuniy:

―Kit'in kiwayt yucha li ak'ilhtulh tacha an lakask'in an yu kimakminta, chi li ak'ilhtu'olhi an ixtapatsat. 35 Uxitnan nawnat: “Ts'an'ayka la'at'at'i malhkuyu para li kajap'uxnunkalhcha”. Pero kit'in iklajunaw li k'alhak'ap'up'it'itcha an jach'ananti, mu k'at'atacha para li kajap'uxnunkalhcha. 36 Yu ma'tapatsay an tan jap'uxnunkan kamapalhnikana', chi mach'ixtamiy jatawk'ati an yu ma'tapatsay para li ka'alilh jatsukunti yu jantu a'tam katimin'olh, chi katalaj'achana an yu jach'ananalh ali an yu jap'uxnun. 37 Ts'awjcha tacha an nawkan, li: “Ali'ini yu tach'an chi ali'ini an yu tajap'uxnun.” 38 Kit'in iklamak'antaw para li k'ap'uxt'iti yu jantu uxitnan lhit'ap'ats'at'it, ali'ini yu tatapatsalh, chi uxitnanch'a yu oxi la'a'iyat an yu tala'tapatsalh yu'uncha.

39 Ixluwk'an an lapanakni an yu ancha jamacha'an anchunu xala'acha'an Samaria takiklaka'ilhi an Jesús, xliyu tacha an ixjajunitacha an t'aku', li an Jesús junilhi tuchini ix'ilhtutacha. 40 Wa chuncha tala'cha'alhi an jamacha'an Samaria an Jesús chi tajuniy li ma kajat'atamakawlh, pus jat'atamakawlhcha la'at'uy wilhchan. 41 Palaycha ixluwk'ani takiklaka'ilh an Jesús, mu wanajcha yucha ixta'alha'asmat'a. 42 Chi ixtajuniy an t'aku:

―Jantucha wa xliyu iklhikiklaka'iyaw li t'ach'a an na'un, wanajcha kitnani ik'alha'asmat'aw chi ijk'atsayawi li ani yucha sawalhi yu jama'alhtaxtunun ani lakamunulhpa', ani Cristo.

43 La'puslicha la'at'uy wilhchan, an Jesús taxtulhcha xalakaat'un Samaria, alhcha xalakaat'un Galilea. 44 Mu wanaj yucha ixnajunta, li yu lhichiwiniy ixchiwinti Dios jantu la'a'ikani la ixlakaat'un. 45 Akxni cha'alhcha Galilea, an jamacha'an Galilea tala'a'ilhcha an Jesús, mu ixtala'ts'intacha tacha an ixlak'ilhtutachalh tanlhun an la'acha'an Jerusalén, akxni k'atan ixjunita, mu yu'uncha wachu ixta'anta an laka k'atan.

46 Pus an Jesús a'tamcha ampalhi Caná, xalakaat'un Galilea, tan an ix'ilhtuta tacha xaxkan uva yu wa xkan. Walh an la'acha'an Capernaúm ixt'ajun pumatam xa'ay ixt'atapatsan an rey, wa ixta'an'ay ists'alh. 47 Akxni asmatlhi an ixt'atapatsan an rey li an Jesús Galileajcha ixt'ajun, la'alh chi ixtapayniniycha li kat'a'alhi la ixcha'a para li kak'uch'unilhi an ists'alh, mu ixnit'ajuncha. 48 Wa chuncha an Jesús juniy an lapanak:

―Uxitnan li jant'u la'ts'inat'iti tu'u yu lhi'a'nin jant'u jak'iklak'a'ininat'it.

49 An xa'ay ixt'atapatsan an rey juniy:

―Jamach'alhkat Jesús, li jantuka' niya an kints'alh watukancha ak'int'ap'it'i.

50 An Jesús juniy:

―K'ap'inch'o'ochicha mincha'a', amints'alh t'ajun.

An lapanak kiklaka'ilhi tacha an junilh an Jesús, pus alhcha. 51 Akxni ixcha'ant'ajuncha la ixcha'a, an ixma'tsukunin talakatastuklhicha, tajuniy:

―Amints'alh ta'oxilhcha.

52 Pus jalhisakmilhcha tuchi panch'e'excha akxni ta'oximaj'ayacho'olhcha. Tajuniy:

―Kutanchacha ta'oxay, la una, akxnicha makawlh an alhp'as iskakat.

53 Pus an ixpay an ts'alh lhimacha'xalhcha li chunchacha horaja ixjunita akxni an junilh an Jesús: “Amints'alh t'ajun.” Pus kiklaka'ilhcha yucha chi chux an yu ta jalhila'ts'in.

54 Yucha anicha yu ixlitipat'uycha yu laj'oxi masulh an Jesús, akxni minchalh xalakaat'un Judea chi cha'alhcha xalakaat'un Galilea.